Nehemiya 8:1-18
8 Lyene antu yonsi yakolongine ala yali ni pange lyonga pa musolo wa musumba umupiipi ni Mpongolo ya Manzi nupya yanenyile Ezila kakopolola* kuti alete ibuku lya Masunde yakwe Mose yano Yeova wapeezile Aina Izlaeli.
2 Fwandi Ezila simapepo watwazile ibuku lya Masunde uku yantu aakolongine, kuli kuti aonsi, anaci, na yonsi aali nu kuvwa nu kwiluka, pa wanda wa kutandikilako umu mwezi uwalenga 7.
3 Nupya wabelenzile umwi zwi lyuvwike mu musolo wa musumba umupiipi ni Mpongolo ya Manzi, kufuma katondo ukufika kasanya, wabelengiile aonsi na anaci, alino na yonsi ailukanga; nupya antu yaakutikisye uku mazwi aali umwi buku lya Masunde.
4 Ezila kakopolola* wimilile pali kasitandi ka mbao kano yapanzile aka kuomvya pa kukomaana kuko; nupya aimilile ukwi lunji umupiipi nawe a Matitiya, Syema, Anaya, Uliya, Hilikiya, na Maaseya; nupya aali kuli cimani a Pedaiya, Misyaeli, Malikiya, Hasyumu, Hasi-badana, Zekaliya, na Mesyulamu.
5 Ezila wayuzile ibuku ala na antu yonsi yakulolako, pano wimilile patumpuke ukucila yonsi. Nupya lino wayuzile ibuku, antu yonsi iimilile.
6 Lyene Ezila walumbanyizye Yeova Leza wa cumi nupya umukalamba, nupya antu yonsi yaswike iyati, “Ameni!* Ameni!” Nupya yakatwisye makasa umupela. Lyene yaafukamile Yeova ala iyalozya ivinso pansi.
7 Nupya Yesyua, Bani, Syelebiya, Yamini, Akubu, Syabetai, Hodiya, Maaseya, Kelita, Azaliya, Yozabadi, Hanani, na Pelaya yano yaali Aina Levi, yalondolwelanga antu masunde ala antu iimilila.
8 Nupya yatwalilile ukubelenga ni izwi lyuvwike ivyali umwi buku, kuli kuti masunde yakwe Leza wa cumi; yalondololanga ningo nu kulondolola upiliulo uwa mazwi aalimo; fwandi yavwilizye antu ukuvwikisya vino yabelenganga.
9 Nupya Nehemiya uwali umulasi,* na Ezila simapepo nupya kakopolola,* alino na Ina Levi aasambilizyanga antu, yanenyile antu yonsi iyati: “Uwanda uu u wa muzilo kuli Yeova Leza winu. Mutaloosya nanti ukulila.” Pano antu yonsi yalilanga pa mazwi yano yuvwile umwi buku lya Masunde.
10 Nehemiya wayanenyile ati: “Pitangini mukalye ivintu ivisuma nu kumwa ivilyompe, nupya mupeeleko ivyakulya yano yatapekanyizye ivili vyonsi; pano uwanda uu u wa muzilo uku Mwene witu, nupya mutaya nu ulanda, pano uluzango luno Yeova akamupeela aali maka inu.”
11 Nupya Aina Levi yateekezyanga antu yonsi ala yakuti: “Myalalini! Pano uwanda uu u wa muzilo nupya mutaya nu ulanda.”
12 Fwandi antu yonsi yapisile iyaya iyalya nu kumwa nu kutumilako yauze ivyakulya, nupya yasansamwike sana pano yuvwikisye mazwi yano yayalondolwelile.
13 Pa wanda wakwe ciili, intunguluzi zya ndupwa zyonsi, ya simapepo, na Ina Levi yakolongine iyazinguluka Ezila kakopolola* pakuti yamanyilepo na vyuze pa mazwi aali umwi buku lya Masunde.
14 Lyene yazanyile umwi buku lya Masunde apalemvilwe ukuti Yeova wanenyile Mose ukuti Aina Izlaeli yalinzile ukwikala umu nsakwe mu nsita ya kuzevya mu mwezi uwalenga 7,
15 nu kuti yalinzile ukumanyisya antu mu misumba yao yonsi nu mu Yelusalemu monsi, ukuti: “Yangini umu ncende ya myamba mukalete imisambo ya miti ya miolivi, misambo ya milemo iikaamwa ukuti paini, misambo ya muti uno yakati malito* imisambo ya tuncindu, alino ni misambo ya mafwa iya miti yuze pakuti mupange insakwe ukulingana na vino calembwa.”
16 Fwandi antu yaile iyasenda imisambo nu kupanga insakwe pa mapaala ya pa mang’anda yao, mu misolo yao, mu misolo ya ng’anda yakwe Leza wa cumi, mu musolo wa pa Mpongolo ya Manzi, alino nu mu musolo wa pa Mpongolo Yakwe Efulemu.
17 Fwandi antu yonsi aafumile umu uzya yakuuzile insakwe nupya yatandike ukwikalamo, pano Aina Izlaeli yatatazile yacite ica musango uu kufuma umu manda yakwe Yoswa mwana Nuni, ukufika pa wanda uuwa, nupya yasansamwike sana.
18 Cila wanda yabelenganga ukufuma umwi buku lya Masunde yakwe Leza wa cumi ukufuma pa wanda wa kutandikilako kufika pa wanda wa kusyalikizya. Nupya yazevizye pa manda 7, yaakweti nu ukongano uiyele pa wanda uwalenga 8, wakwe vino calondekwanga.
Mafutunoti
^ Nanti “kalemba.”
^ Nanti “kalemba.”
^ Nanti “ciye vivyo kwene.”
^ Nanti “Tilisyata,” izina lya mucinzi lino Aina Pesya yaomvyanga uku kwamilako umulasi wa citungu.
^ Nanti “kalemba.”
^ Nanti “kalemba.”
^ Kamuti akakwata mafwa ayengese na maluwa atiswe nupya anunkile.
