Utandiko 48:1-22
48 Pa cisila yamwi yanenyile Jozefu ukuti: “Ya tata yako iyasila maka.” Lyene wasenzile ana yakwe yaili aonsi, kuli kuti Manase na Efulemu kuli isi.
2 Lyene yanenyile Yakobo iyati: “Jozefu umwanako aewi wataiza kuli wewe.” Fwandi Izlaeli waikomelizye nu kwikala pa bedi.
3 Yakobo wanenyile Jozefu ati:
“Leza wa Maka Yonsi walolekiile kuli nene uku Lazi umu mpanga ya Kenani nupya wampaazile.
4 Wanenyile nu kuti, ‘Ndalenga ukuti ukwate ana aingi nupya ndalenga ana yako yasandane, ndaleka nu kuti muli wewe muce mufume inko izingi, ndapeela ni mpanga yii uku yana yako pakuti ikaye iyao manda pe.’
5 Ana yaili aonsi yano wakwatiile umu Ijipti ala ntali nize, aane. Efulemu na Manase yalaya ana yane wakwe vino na Lubeni kumwi na Simyoni aana yane.
6 Lelo ana yano ulakwata pa cisila cakwe yaa, yalaya ana yako. Yalapeelwa mazina ya ina yao kwene yaa kumwi ni ca upyanyi cao.
7 Lelo nemo lino nafumanga uku Padani, Lakeli wafwile ala ali nani umu mpanga ya Kenani, ala kucili intamfu itali kuti imfike uku Efulata. Fwandi namuziisile umu nzila iya kuya uku Efulata, kuli kuti, Betelemu.”
8 Lyene Izlaeli waweni ya mwana Jozefu nupya uzizye ati: “Aaweni yaa?”
9 Jozefu waswike ati: “Aana yane yano Leza wampeela kukwene.” Lino Yakobo uvwile vivyo, walanzile ati: “Yalete kuno pakuti njapaale.”
10 Nomba Izlaeli atalolekesyanga pa mulandu wakuti wali umukote. Fwandi Jozefu wayapalamike kuli Izlaeli, nawe wayatonswile nu kuyakumbatila.
11 Izlaeli wanenyile Jozefu ati: “Ntenekelanga ukuti ningakulola nupya, lelo Leza watalenga ukuti indole na ana yako kwene.”
12 Lyene Jozefu wafumizye ana yakwe lwa pa makokola yakwe Izlaeli, nupya wafukiime.
13 Jozefu watozile ana yakwe yaili nu kuyapalamika kuli Izlaeli, Efulemu amwika kuli cimani, Manase nawe amwika ukwi lunji.
14 Lelo Izlaeli wakonzolwile ikasa lyakwe ilya kwi lunji nu kulema Efulemu pa mutwe, nanti icakuti wali ali mwance, nupya ikasa lyakwe ilya kuli cimani, walemile pa mutwe wakwe Manase. Wacisile vivyo nanti icakuti wamanyile ukuti Manase wali ali iyeli.
15 Lyene Izlaeli wapaazile Jozefu ati:
“Si Leza wa cumi wino ivikolwe vyane, kuli kuti Abulahamu na Isaki yaombelanga apaale alumendo yaa,Nupya Leza wa cumi uwatwalilila ukunsakamala ukufika na ndakai kwene, ayapaale,
16 Malaika aakampususya uku ntazi zyonsi, apaale alumendo yaa.
Lekini yaamanyikilwa ukwi zina lyane nu ku mazina ya vikolwe vyane, kuli kuti Abulahamu na Isaki,Lekini yavule sana muno nsi.”
17 Lino Jozefu waweni ukuti isi watalemelela ikasa lyakwe ili lunji pa mutwe wakwe Efulemu, uvwile uyi, fwandi wezizye ukulifumya pa mutwe wakwe Efulemu nu kulitwala pa mutwe wakwe Manase.
18 Jozefu wanenyile isi ati: “Awe, mutacita vivyo tata, pano wii ali yeli. Ikini ikasa linu ili lunji pa mutwe wakwe.”
19 Lelo isi watwalilile ukukana ati: “Imanya, imanya mwanane. Nawe kwene alaya iumba ilikalamba nupya alaya u mucindame. Lelo umutowakwe wene alacindama ukumucila, nupya umu yana yakwe mulafuma inko izingi.”
20 Fwandi Izlaeli watwalilile ukuyapaala pa wanda uwa, ati:
“Lekini Aina Izlaeli yamulumbula lino yakulanda pa mapaalo ala yakuti,‘Si Leza aleke muye wakwe Efulemu na Manase.’”
Fwandi watwalilile ukupaala Efulemu lino atali apaale Manase.
21 Lyene Izlaeli wanenyile Jozefu ati: “Lola, indi umupiipi nu kufwa, lelo Leza alatwalilila ukuya namwe nupya alamuswilizya uku mpanga ya vikolwe vinu.
22 Lelo nemo nakupeelelapo impanga na yuze ukucila aina yako, ino naposile uku Ina Amoli ukuomvya ulupanga nu ulapwa.”
