Yakapingula 1:1-36
1 Pa cisila ca mfwa yakwe Yoswa, Aina Izlaeli yuzizye Yeova iyati: “A weni pali sweswe amatandikila ukuya umu kulwisya Aina Kenani?”
2 Yeova wayaswike ati: “Yuda aamayako. Lolini! Nimapeela impanga umu minwe yakwe.”
3 Lyene Yuda wanenyile Simyoni umwinakwe ati: “Pita nani uku mpanga ino napeelwa uku kulwisya Ina Kenani. Lyene nani ndapita naawe uku mpanga yako.” Fwandi Simyoni wacisile vivyo kwene.
4 Lino Yuda wapisile, Yeova wapeezile Aina Kenani na Ina Pelizimu mu minwe yao, nayo yacimvizye aonsi 10,000 mu Bezeki.
5 Yazanyile Adoni-bezeki mu Bezeki, nupya kuuku kwene akuno yamuzanzile nu kucimvya Aina Kenani na Ina Pelizi.
6 Lino Adoni-bezeki utwike, yamukonsile nu kuyamulema nupya yamuputozile ivyala ni vikando.
7 Lyene Adoni-bezeki walanzile ati: “Kuli ya mwene 70 yano ivyala vyao ni vikando vyao vyaputwilwe, nupya yakulya ivyakulya ivikupona pali tebo wane. Fwandi Leza watacita kuli nene ukulingana na vino nacisile.” Lyene pa cisila yamutwazile uku Yelusalemu, nupya kuuku kwene akuno waile afwila.
8 Nupya aonsi aku Yuda yalwisizye umusumba uwa Yelusalemu nu kuupoka; yakomile antu aalimo ukuomvya ulupanga nupya yosile umusumba.
9 Pa cisila aonsi ya mu Yuda yaile umu kulwisya Aina Kenani aikalanga umu ncende ya myamba uku Negebu nu ku Syefela.
10 Fwandi aonsi aku Yuda yaile uku Ina Kenani aikalanga umu Hebuloni (mpiti musumba wa Hebuloni yawamanga ukuti Kilyati-aba), nupya yakomile Syesyai, Ahimani, na Talimai.
11 Lino yafumile kuuku yaile umu kulwisya antu aikalanga umu musumba wa Debili. (Mpiti musumba wa Debili yawamanga ukuti Kilyati-sefeli.)
12 Lyene Kalebu walanzile ati: “Umonsi alalwisya umusumba uwa Kilyati-sefeli nu kuupoka, ndamupeela umwanane umukazyana Akisa kuti aye umuci wakwe.”
13 Lyene Otinieli mwana Kenazi umuto wakwe Kalebu waile apoka umusumba uuwa. Fwandi Kalebu wamupeezile umwanakwe umukazyana Akisa ukuya umuci wakwe.
14 Lino Akisa wayanga uku ng’anda, wakomelizye iya ukulenga icalo kuli Kalebu. Lyene Akisa wisile pali punda. Nupya Kalebu wamuzizye ati: “I cani cino ukulonda?”
15 Nawe wamwaswike ati: “Napaapata mumpaale, vino mwampeezile impanga ya ku kaeya;* mumpeele ni mpanga ya ku Guloti-maimu.”* Fwandi Kalebu wamupeezile incende ya Guloti iya kupela nu kwisika.
16 Nupya ana ya Mwina Kenite isivyala wakwe Mose, yafumile umu musumba wa tuncindu kumwi na antu amu Yuda nupya yaile uku lwanga lwa Yuda ku kaeya ka musumba wa Aladi. Yaile kuuku kwene nu kutandika ukwikala pamwi na antu yano yazanyile.
17 Lelo Yuda wapisile na Simyoni umwinakwe nupya yaile iyazanza Aina Kenani aikalanga uku Zefati nupya yononyile umusumba uwa. Fwandi yautemiile izina lyakuti Holima.*
18 Lyene Yuda waposile umusumba wa Gaza ni ncende ya uko, musumba wa Asyikeloni ni ncende ya uko, nu musumba wa Ekiloni ni ncende ya uko.
19 Yeova wali na Yuda nupya yaposile incende ya myamba, lelo yatazinzile aikalanga umu lwanga, pano yakweti maceleta ya vyela ankondo.
20 Yapeezile Kalebu musumba wa Hebuloni wakwe viivi kwene vino Mose walavile, nupya yazinzile ana yakwe Anaki yatatu aikalangamo.
21 Lelo amu mutundu wakwe Benjamini yataazinzile Aina Yebusi aikalanga umu Yelusalemu, fwandi Aina Yebusi yatwalilila ukwikala na amu mutundu wakwe Benjamini mu Yelusalemu kufika na ndakai kwene.
22 Lyene amu ng’anda yakwe Jozefu yaile umu kulwisya umusumba wa Betele, nupya Yeova wali nayo.
23 Amu ng’anda yakwe Jozefu yaceecetanga umusumba wa Betele mu umfisolo (mpiti musumba wa Betele yawamanga ukuti Lazi),
24 nupya aceecetanga yaweni umonsi akufuma umu musumba, fwandi yamunenyile iyati: “Twapaapata tulange inzila ya kwingilila umu musumba, naswe tumaya ni cikuuku kuli wewe.”
25 Lyene umonsi wayalanzile inzila ya kwingilila mu musumba, nayo yakomile antu amu musumba ukuomvya ulupanga, lelo yatakomile umonsi wiya nu lupwa lwakwe lonsi.
26 Umonsi wiya waile uku mpanga ya Ina Hiti nupya waile akuula musumba autemela ni zina lyakuti Lazi, lilyo kwene ali zina lya musumba uu kufika na ndakai.
27 Manase ataaposile umusumba wa Beti-syeani ni mizi iyalimo, musumba wa Taanaki ni mizi iyalimo, musumba wa Doli ni mizi iyalimo, musumba wa Ibeleamu ni mizi iyalimo, nu musumba wa Megido ni mizi iyalimo. Aina Kenani yatwalilile ukwikala umu mpanga iiya.
28 Lino Aina Izlaeli izile iyaya na maka, yapatikizye Aina Kenani ukuya azya, lelo yatayazinzile yonsi mu mpanga.
29 Efulemu nawe kwene ataazinzile Aina Kenani aikalanga umu Gezeli. Aina Kenani yatwalilile ukwikala nayo mu Gezeli.
30 Zebuluni ataazinzile aikalanga umu Kituloni na aikalanga umu Nahaloli. Aina Kenani yatwalilile ukwikala nayo nupya yapatikiziwe ukuya azya.
31 Asyeli ataazinzile aikalanga umu Ako, aikalanga umu Sidoni, Alabu, Akizibu, Heliba, Afeki, kumwi na antu aikalanga umu Leobu.
32 Fwandi amu mutundu wakwe Asyeli yatwalilile ukwikala na Ina Kenani amu mpanga iiya pa mulandu wakuti yataayazinzile.
33 Nafutali ataazinzile aikalanga umu Beti-syemesyi na aikalanga umu Beti-anati, lelo yatwalilile ukwikala na Ina Kenani amu mpanga iiya. Aikalanga umu Beti-syemesyi na antu aikalanga umu Beti-anati yapatikiziwe ukuya azya yao.
34 Aina Amoli yalesile amu mutundu wakwe Dani ukwikala sile umu ncende ya myamba, yatayazumilizye ukwikala umu lwanga.
35 Fwandi Aina Amoli yatwalilile ukwikala mu ncende ya Mwamba wa Helesi, mu Aijaloni, nu mu Syaalabimu. Lelo lino amu ng’anda yakwe Jozefu izile iyakwatilako maka, yayapatikizye ukuya azya yao.
36 Mupaka wa Ina Amoli watandikiile uku museo uwaya uku Akilabimu, nupya wafumile uku Sela iulemela.
Mafutunoti
^ Nanti “Negebu.”
^ Icikapiliula ukuti “Incende Ukwaya Manzi.”
^ Icikapiliula ukuti “Cilinzile Ukononwa.”
