Yakapingula 10:1-18
10 Pa cisila cakwe Abimeleki, Tola mwana Puwa, mwana Dodo umonsi wa mu mutundu wakwe Isakali wakatwike pakuti apususye Aina Izlaeli. Wikalanga umu Syamili mu ncende ya myamba yakwe Efulemu.
2 Wali akapingula umu Izlaeli pa myaka 23. Lyene wafwile nu kuziikwa umu Syamili.
3 Pali aliwe palondiile Jaili Umwina Gilyadi uwakatwike nu kuomba umulimo wa kupingula Aina Izlaeli pa myaka 22.
4 Wakweti ana aonsi 30, aakwelanga pali ya punda 30, nupya yakweti imisumba 30 ino ukufika na ndakai ikaamwa ukuti Havoti-jaili, yayela umu mpanga ya Gilyadi.
5 Pa cisila Jaili wafwile nu kuziikwa umu Kamoni.
6 Nupya kwene Aina Izlaeli yasosizye Yeova, yatandike ukupepa ya Baali, vinkolanya vyakwe Asyitaloti, ya leza ya ku Alamu, ya leza ya ku Sidoni, ya leza ya ku Moabu, ya leza ya Ina Amoni, na ya leza ya Ina Filisti. Yapondokile Yeova nupya yatiile ukumuombela.
7 Lyene Yeova wasokiile sana Aina Izlaeli, nupya wayakazizye uku Ina Filisti nu ku Ina Amoni.
8 Fwandi yatitikizyanga nu kucuzya sana Aina Izlaeli mu mwaka uuwa; pa myaka 18 yacuzizye Aina Izlaeli yonsi ku lusansa lwa Luzi Lwa Yodani, impanga iyaali ya Ina Amoli mu Gilyadi.
9 Nupya Aina Amoni yalambanga Uluzi Lwa Yodani nu kuya umu kulwisya amu mutundu wakwe Yuda, amu mutundu wakwe Benjamini, na amu ng’anda yakwe Efulemu; nupya Aina Izlaeli yacuzile sana.
10 Lyene Aina Izlaeli yaliliile kuli Yeova pakuti ayazwe, iyati: “Itukuyembukila, itukupondokela we Leza witu nu kutandika ukupepa ya Baali.”
11 Lelo Yeova uzizye Aina Izlaeli ati: “Uzye ntamupuswisye uku Ina Ijipti, ku Ina Amoli, ku Ina Amoni, ku Ina Filisti,
12 ku Ina Sidoni, ku Ina Amaleki nu ku Ina Midyani lino yamucuzyanga? Lino mwaliliile kuli nene namupuswisye umu minwe yao.
13 Lelo imumpondokela nu kutandika ukuombela ya leza yauze. Ukwene ali mulandu uno ntalamupususya nupya.
14 Yangini kuli ya leza yano imusoolola nu kulilila kuli aliyo pakuti yamwazwe. Lekini yamupususye mu nsita ya ucuzi.”
15 Lelo Aina Izlaeli yanenyile Yeova iyati: “Ituyembuka. Cita kuli sweswe cino ukulola ukuti cili ningo. Twapaapata tupususye ilelo.”
16 Nupya yasumvile ya leza ya ufi nu kutandika ukuombela Yeova, nawe atasuzileko sile kuli vino Aina Izlaeli yaculanga.
17 Mu kuya kwa nsita, Aina Amoni yakolongine nupya yapanzile inkambi mu Gilyadi. Nupya Aina Izlaeli nayo kwene yakolongine nu kupanga inkambi ku Mizipa.
18 Antu amu Gilyadi kumwi ni ntunguluzi zyao yalanzyanyizye iyati: “Uzye a weni amatutungulula ukuya umu kulwisya Aina Amoni? Lekini aye intunguluzi ikalamba pa yantu yonsi amu Gilyadi.”
