Yakapingula 12:1-15
12 Lyene aonsi yakwe Efulemu yakolongine nu kuya uku Zafoni,* nupya yaile iyanena Yefuta iyati: “U mulandu ci uno utatwamiile lino waile umu kulwisya Aina Amoni? Tumakocela ing’anda yako nawe kwene tukocele muno kwene.”
2 Lelo Yefuta wayanenyile ati: “Nemo na antu yane twalwisyanyizye sana na Ina Amoni. Namwamile ukuti mwize mungazwe, lelo mutiizile imumpususya umu minwe yao.
3 Lino naweni ukuti musikwiza umu kumpususya, napingwilepo ukwika umi umu uzanzo nu kuyalwisya Aina Amoni, nupya Yeova wayapeezile umu minwe yane. Uzye fwandi u mulandu ci uno imwizila umu kundwisya ilelo?”
4 Lyene Yefuta wakolonganike aonsi yonsi amu Gilyadi nupya yalwisizye Efulemu, aonsi ya mu Gilyadi yacimvizye antu yakwe Efulemu aalandanga iyati: “Nanti cakuti mwe Ina Gilyadi mukaikala umu mpanga yakwe Efulemu na yakwe Manase, muutwike sile ukufuma muli Efulemu.”
5 Gilyadi waposile incende ya kulambilapo Uluzi Lwa Yodani iyali pa nkoleelo ya mpanga yakwe Efulemu nu kwikako aonsi aakucilikila aonsi yakwe Efulemu pakuti yatapuuka, nupya lino aonsi yakwe Efulemu yezyanga ukuutuka, yalandanga iyati, “Lekini ndambe uluzi”; lyene aonsi ya ku Gilyadi yuzyanga cila muntu iyati, “Uzye wewe wa mu mutundu wakwe Efulemu?” Nga wasuka ukuti, “Awe!”
6 yamunenanga iyati, “Landa uti Syiboleti.” Lelo walandanga ati, “Siboleti,” pano wafilwanga ukulumbula ningo izwi. Lyene yamulemanga nu kumukomela pa kulambila Uluzi Lwa Yodani. Fwandi amu mutundu wakwe Efulemu 42,000 yakomilwe pa nsita iiya.
7 Yefuta Umwina Gilyadi waomvile umulimo wa kupingula Aina Izlaeli pa myaka 6, pa cisila wafwile nu kuziikwa umu musumba wakwe umu Gilyadi.
8 Lyene pa cisila, Ibazani uwa ku Betelemu u watandike ukupingula Aina Izlaeli.
9 Wakweti ana aonsi 30 na akazyana 30. Walesile ukuti ana yakwe akazyana yatwalwe uku yonsi amu mitundu yuze, nupya waleesile anaci 30 kufuma umu mitundu yuze pakuti yatwalwe uku yana yakwe aonsi. Waomvile umulimo wa kupingula Aina Izlaeli pa myaka 7.
10 Lyene Ibazani wafwile nu kuziikwa umu Betelemu.
11 Pa cisila, Eloni uwa mutundu wakwe Zebuluni u watandike ukupingula Aina Izlaeli; nupya waomvile umulimo uu pa myaka 10.
12 Lyene Eloni wafwile nu kuziikwa umu Aijaloni mu mpanga yakwe Zebuluni.
13 Pa cisila, Abadoni mwana Hileli Umwina Pilatoni watandike ukupingula Aina Izlaeli.
14 Wakweti ana aonsi 40 na aizikulu 30 aonsi aakwelanga pali ya punda 70. Waomvile umulimo wa kupingula Aina Izlaeli pa myaka 8.
15 Lyene pa cisila, Abadoni mwana Hileli Umwina Pilatoni wafwile nu kuziikwa umu Pilatoni mu mpanga yakwe Efulemu mu mwamba wa Ina Amaleki.
Mafutunoti
^ Nanti limwi, “lwa ku katutu.”
