Yakapingula 14:1-20
14 Samusoni waile uku Timuna nupya kuuku kwene akuno waile alola umwanaci Umwina Filisti.
2 Lyene waswilile kuli ya isi na ya nyina nu kuyanena ati: “Mu Timuna indola umwanaci Umwina Filisti wino intemwa, nkulonda mukamusende aye amamane.”
3 Lelo ya isi na ya nyina yamunenyile iyati: “Uzye utanga ulonde umwanaci muli ya lupwa yako nu mu yantu itu yonsi? Uzye ulinzile ukutwala umwanaci ukufuma umu Ina Filisti aatazembululwa?” Lelo Samusoni wanenyile ya isi ati: “Kansendelini wiyo kwene, pano aliwe andinzile.”
4 Ya isi na ya nyina yatamanyile ukuti Yeova u walenzile ukuti ciye viivi, pano aliwe walondanga inzila ya kulwisizyamo Aina Filisti aateekanga Aina Izlaeli pa nsita iiya.
5 Fwandi Samusoni waile uku Timuna pamwi na ya isi na ya nyina. Lino wafisile umu vyalo vya myangazi vya mu Timuna, waweni cisama akuya kuli aliwe ala akung’anza.
6 Lyene umupasi wakwe Yeova wizile pali aliwe, nupya walepwile cisama paili wakwe vino umuntu akalepula kambuzi ukuomvya iminwe itupu. Lelo atanenyile ya isi na ya nyina vino wacisile.
7 Lyene wapisile nu kuyalanda nu mwanaci, nupya na pa nsita kwene yii wamutemilwe.
8 Lyene lino waswilile umu kusenda umwanaci, wapaalwike umu kulola cisama wino wakomile, nupya waweni umu citumbi cakwe cisama muli inzimu nu uci.
9 Fwandi watozile uci atandika ukulya ala akupita. Lino wafisile kuli ya isi na ya nyina wayapeezileko uci. Lelo ataayanenyile ukuti wafumile umu citumbi cakwe cisama.
10 Ya isi yakwe Samusoni yaile uku mwanaci, nupya Samusoni wapanzile umutebeto kuuku kwene pano ali vino aonsi yacance yacitanga.
11 Lino yamuweni yamuletiile aonsi 30 insindisi.
12 Lyene Samusoni wayanenyile ati: “Lekini imucolekele kacole. Ndi cakuti mwanjilwila umu manda 7 aamutebeto, ndamupeela ivyakuzwala vya mukasi vya nsalu isuma 30 ni vya kunzi 30.
13 Lelo ndi cakuti mwafilwa ukunjilwila mwemwe mulampeela ivyakuzwala vya mukasi vya nsalu isuma 30 ni vya kunzi 30.” Nayo yatile: “Coleka tuvwe.”
14 Fwandi wayanenyile ati:
“Mu cintu icikalya mwafumile icakulya.Nupya umu cintu ca maka mwafumile icilyompe.”
Lelo yafizilwe ukumwilwila pa manda yatatu.
15 Pa wanda uwalenga 4, yanenyile umuci wakwe Samusoni iyati: “Pita uwako pa mano pakuti atwilwile kacole. Ndi cakuti utacisile vivyo, tumakoca nu koca ing’anda yakwe tata wako. Uzye mwatwamile kuno kuti mutupoke ivintu vitu?”
16 Fwandi umuci wakwe Samusoni watandike ukulilila iya ati: “Wampata; utantemwa. Wacolekela antu yane kacole, lelo utanena muno kalozile.” Nawe wamunenyile ati: “Ya tata na ya mayo ayano ntanena! Uzye lyene wewe ningilwila?”
17 Lelo watwalilile ukumulilila pa manda yonsi 7 aamutebeto. Lyene pa wanda uwalenga 7, wasusile amunena pa mulandu wakuti watwalilile ukumupatikizya. Nawe waile anena antu yakwe muno kacole kalozile.
18 Fwandi pa wanda walenga 7 lino ilanzi litatala lyawa, aonsi ya mu musumba yanenyile Samusoni iyati:
“Uzye i cani calyompa ukucila uci,Nupya i cani icakwata amaka ukucila cisama?”
Nawe wayanenyile ati:
“Imukana ukulimila na kang’ombe kane,Nga mutilwile kacole.”
19 Lyene umupasi wakwe Yeova wizile pali aliwe, nupya waile uku Asyikeloni nu kuyakoma aonsi 30 nu kusenda ivyakuzwala vyao aya apeela aonsi ailwile kacole. Nupya waswilile uku ng’anda yakwe isi ala watasoka sana.
20 Lyene yatwalizye umuci wakwe Samusoni ku monsi uwali insindisi yakwe Samusoni.
