Yakapingula 15:1-20
-
Samusoni walandula uku Ina Filisti (1-20)
15 Lino papisile insita, mu manda ya kuzombola ingano Samusoni waile umu kulola umuci, wasenzile na kambuzi. Walanzile ati: “Nkulonda ningile indole mamane mu muputule wa kulaalamo.” Lelo isivyala atamuzumilizye ukwingila.
2 Isivyala walanzile ati: “Nelenginye ukuti, ‘Ufwile wamupata.’ Fwandi namutwalizye uku nsindisi yako. Uzye umutowakwe asi umusuma ukumucila? Awino sendelamo.”
3 Lelo Samusoni walanzile ati: “Muku uu wene Aina Filisti yatafwile ukumpeela umulandu pa viipe vino nimacita kuli aliyo.”
4 Lyene Samusoni waile alema ya nkusa 300. Nupya watozile ya nkusa yaili yaili ayanyepelela imisinda, alino aika inkozyo pakasi ka misinda.
5 Wakozizye inkozyo nu kuleka ya nkusa ukuya umu vyalo vya ngano ivya Ina Filisti. Osile vyonsi kutandikila uku mitumba ya ngano kufika uku ngano izisi zizombole, kumwi ni vyalo vya myangazi ni vya miolivi.
6 Aina Filisti yuzizye iyati: “A weni uwatacita vii?” Lyene yayanenyile iyati: “A Samusoni isivyala wa mwina Timuna, pa mulandu wakuti watozile umuci wakwe Samusoni nu kumupeela uku nsindisi yakwe.” Lino Aina Filisti yuvwile vivyo, yaile iyoca muka Samusoni na isi.
7 Lyene Samusoni wayanenyile ati: “Ndi cakuti vii avino mumacitanga, ntalata mpaka ince ndandule.”
8 Lyene wayakomile icipisye, pa cisila waile umu kwikala umwi cele ilyaya umu ciliwe cino yakaama ukuti Etamu.
9 Lyene Aina Filisti yaile iyapanga inkambi umu Yuda, nupya yayanga ya kuzinguluka umu musumba wa Lehi.
10 Lyene aonsi ya mu Yuda yuzizye iyati: “U mulandu ci uno mwizila umu kutulwisya?” Nayo yaswike iyati: “Itwiza umu kulema Samusoni pakuti tucite kuli aliwe wakwe vino wacisile kuli sweswe.”
11 Fwandi aonsi 3,000 amu Yuda yaile ukwi cele ilyayelile umu ciliwe cino yamanga ukuti Etamu nupya yaile iyuzya Samusoni iyati: “Uzye utamanyile ukuti Aina Filisti yakututeeka? U mulandu ci uno watucitila cii kuli sweswe?” Nawe wayaswike ati: “Vino yacisile kuli nene, avino nani kwene incita kuli aliyo.”
12 Lelo yamunenyile iyati: “Itwiza umu kukulema kuti tukupeele uku Ina Filisti.” Lyene Samusoni wayanenyile ati: “Lapini kuli nene ukuti mwemo mutakuncita iciipe icili consi.”
13 Nayo yamunenyile iyati: “Awe, tumakunyepa sile nu kukupeela kuli aliyo, lelo tutakukukoma.”
Lyene yamunyefile ni myando iili ipya nu kumufumya umu ciliwe.
14 Lino wafisile uku Lehi, Aina Filisti yapunzile sana ni nsansa lino yamuweni. Lyene umupasi wakwe Yeova wizile pali aliwe nupya imyando ino yamunyefile uku makasa yatonsile wa nsalu ino iyoca umu moto, nupya yaputosile.
15 Lyene waweni uluzekete lwakwe punda wa kalume ulutatala luma; walutozile nu kukomelako aonsi 1,000.
16 Nupya Samusoni walanzile ati:
“Uku luzekete lwakwe punda akuno nakomela alwani yane nu kuyatulika umu mitumba!
Uku luzekete lwakwe punda akuno nakomela aonsi 1,000.”
17 Lino wamazile ukulanda, wasumvile uluzekete nupya watemiile incende iyo ukuti Lamati-lehi.*
18 Lyene uvwile sana ulusala, nupya waliliile kuli Yeova nu kumunena ati: “Wewe watulenga umuomvi wako ukucimvya sana. Uzye lyene ukulonda imfwe nu lusala nu kusendwa uku yonsi aatazembululwa?”
19 Lyene Leza watulwile pa ncende ifonke iyayelile umu Lehi, nupya manzi yatandike ukufuma. Lino Samusoni wamwile, maka yawezile nupya wapupulwike. Ali mulandu uno watemelile incende iiya ati Eni-hakole,* iyayela umu Lehi kufika na ndakai.
20 Nupya waomvile umulimo wa kupingula Aina Izlaeli mu manda ya Ina Filisti pa myaka 20.
Mafutunoti
^ Icikapiliula ukuti “Umwamba wa luzekete.”
^ Icikapiliula ukuti “Kafukoka kakwe wino akwama.”
