Yakapingula 16:1-31
16 Lyene Samusoni waile uku Gaza nupya kuuku kwene akuno waile alola cizelele, nu kuya uku ng’anda ukwakwe.
2 Aina Gaza yuvwile ukuti: “Samusoni wataingila umu musumba wao.” Fwandi yazingulwike incende ino walipo nu kumufisamila usiku onsi pa mpongolo ya musumba. Ikazile usiku onsi ukwaula ukupanga icongo, ala yakwelenganya ukuti: “Nga kwaca tumamukoma.”
3 Lelo Samusoni waizi mumu kwene kufika usiku pakasi. Lyene wakatwike nu kuyasimpula visaasa vya pa mpongolo kumwi na mafulemu nu mufikilo. Nupya wavisenzile pa ciye nu kuvitwala papela ya mwamba uwalozyanya na Hebuloni.
4 Pa cisila wizile atemwana nu mwanaci uwa mu mukonko wa Soleki uwi zina ilyakuti Delila.
5 Fwandi intunguluzi zya Ina Filisti zyaile uku mwanaci wiyo nu kumunena iziti: “Mupite pa mano pakuti umanye icalenga akwate sana maka na vino tungacita pakuti tumucimvye nu kumunyepa. Nga wacita vivyo, swensi kwene cila muntu tulakupeela impiya 1,100 zyakwe siuva.”
6 Lyene Delila wanenyile Samusoni ati: “Napaapata nene icalenga ukwate sana maka ni cingaomviwa pa ku kunyepa nu ku kucimvya.”
7 Samusoni nawe wamunenyile ati: “Ndi cakuti yanyepa ni mpapa 7 izitatala zyuma, amaka yangacepa, inje na wa monsi ali wensi.”
8 Fwandi intunguluzi zya Ina Filisti zyapeezile umwanaci impapa 7 izitatala zyuma, nawe wamunyepiile nazyo.
9 Lyene lino yamufisamiile umu muputule uwa mukasi, umwanaci wapunzile ati: “Samusoni Aina Filisti aeya!” Nawe lilyo kwene waputwile impapa wakwe vino kotoni wakwe fulakisi akaputuka nga wapya nu moto. Fwandi yafizilwe ukumanya icalenzile akwate sana maka.
10 Lyene Delila wanenyile Samusoni ati: “Lola! Watumbepa nu kunena ivya ufi. Fwandi napaapata, nene icingaomviwa pa ku kunyepa.”
11 Nawe wamunenyile ati: “Ndi cakuti yanyepa ni myando ipya iitaatala yaomviwapo, maka yangacepa nupya ningaya wa monsi ali wensi.”
12 Lyene Delila wasenzile imyando ipya nu kuyamunyepa, nupya wapunzile ati: “Samusoni Aina Filisti aeya!” (Pa nsita iiya ala iyamufisamila umu muputule uwa mukasi.) Lilyo kwene waputwile imyando ino yaali uku makasa yakwe.
13 Lyene Delila wanenyile Samusoni ati: “Nupya kwene wambepa nu kunena ivya ufi. Nene icingaomviwa pa kukunyepa.” Nawe wamunenyile ati: “Ndi cakuti wanduka ivikuti 7 ukuomvya kotoni wa ku nsalu amaka yamacepa.”
14 Lyene wamulusile ivikuti nu kuvinyepelela uku lupopo nupya wapunzile ati: “Samusoni Aina Filisti aeya!” Fwandi wazyusile nu kutinta ulupopo na kotoni wino wamulukiile ivikuti.
15 Lyene Delila wanenyile Samusoni ati: “Ungalanda uli ukuti wantemwa lino umwenzo wako utaaya nani? Imiku yii yonsi itatu ukalukumbepa sile ukwaula ukunena icalenga ukuti ukwate sana maka.”
16 Pa mulandu wakuti wamupamvyanga cila wanda nu kumupatikizya, Samusoni watonsile icakuti afilwa ukuzizimizya.
17 Lyene wasusile wamunena vyonsi ati: “Ntatala napelapo inyele, pano nene Munazili wakwe Leza kufuma lino naviilwe. Ndi cakuti napela, amaka yangasila nupya ningatonta nu kuya wa yonsi asyala.”
18 Lino Delila waweni ukuti wamunena vyonsi, lilyo kwene sile wamile intunguluzi zya Ina Filisti ati: “Lyene izini pano watanena vyonsi.” Fwandi intunguluzi zya Ina Filisti zyaile kuli aliwe ala izisenda ni mpiya.
19 Walesile kuti alaale pa makulu yakwe; lyene wamile umonsi umwi, nawe wamupezile ivikuti 7. Pa cisila watandike ukumutungulula, pano maka yasizile.
20 Lyene wapunzile ati: “Samusoni Aina Filisti aeya!” Nawe wakatwike nu kulanda ati: “Nimakatuka nu kuutuka wakwe vino nkacita lyonsi.” Lelo atamanyile ukuti Yeova watamusya.
21 Fwandi Aina Filisti yamulemile nu kumutonkola manso. Lyene yamutwazile uku Gaza nu kumunyepa na maceni yaili yakwe koopa, nupya yamupeezile umulimo wa kusya ingano mu cifungo.
22 Lelo inyele zino yamupezile zyatandike ukukula nupya kwene.
23 Intunguluzi zya Ina Filisti zyakolongine pakuti zizevye nu kupeela ilambo ilikalamba kuli Dagoni leza wao, pano zyalanzile iziti: “Leza witu watapeela Samusoni umu minwe itu!”
24 Lino antu yaweni Samusoni, yalumbanyizye leza wao nu kulanda iyati: “Leza witu watatupeela umulwani witu aakaonona impanga itu nu kukoma antu aingi muli sweswe.”
25 Pa mulandu wakuti yaali sana ni nsansa, yalanzile iyati: “Kaamini Samusoni pakuti aize atuvwisye ningo.” Fwandi yaile iyama Samusoni umu cifungo pakuti aize ayuvwisye ningo; yalesile ukuti aimilile pakasi ka ncesi.
26 Lyene Samusoni wanenyile umulumendo uwamulemile api kasa ati: “Leka indeme uku ncesi izyatungilila ing’anda yii, pakuti akuno nsintilizye.”
27 (Pa nsita iiya umu ng’anda mwaziile aonsi na anaci. Ni ntunguluzi zya Ina Filisti zyonsi amuno zyali, nupya api paala pali aonsi na anaci mupiipi na 3,000 aalolanga kuno Samusoni akuyuvwisya ningo.)
28 Lyene Samusoni waliliile kuli Yeova ati: “We Yeova Mwene wa Papelapela napaapata njiusye, nupya mpeeko maka umuku sile uu onga, we Leza, leka ndandule uku Ina Filisti nanti sile api linso lyane lyonga.”
29 Lyene Samusoni wimilile na maka pakasi ka ncesi ziili izyatungilile ing’anda, nupya walemile ikasa lya kwi lunji ku lucesi longa ni ikasa lya kuli cimani ku lucesi luze.
30 Nupya wapunzile ati: “Nkamfwile pamwi na Ina Filisti!” Lyene wasunsile incesi na maka yakwe yonsi ni ng’anda yaponiile pa ntunguluzi na pa yantu yonsi aalimo. Fwandi wakomile antu aingi pa mfwa yakwe kucila yano wakomile lino acili nu umi.
31 Pa cisila aina yakwe na ya lupwa yakwe isi yonsi izile umu kumusenda. Yamusenzile nu kuyamuziika pakasi kakwe Zola na Esyitaoli umwi lindi lyakwe Manoa isi. Samusoni waomvile umulimo wa kupingula Aina Izlaeli pa myaka 20.
