Yakapingula 17:1-13
-
Vilubi vyakwe Mika na simapepo wakwe (1-13)
17 Kwali umonsi uwi zina ilyakuti Mika uwikalanga umu ncende iya myamba yakwe Efulemu.
2 Wanenyile nyina ati: “Impiya 1,100 zyakwe siuva zino mwaponzya nupya zino nuvwile mukulandilapo intiipu, indi nazyo nene natozile.” Lyene nyina wamunenyile ati: “Yeova akupaale mwanane.”
3 Fwandi waswilizizye nyina impiya zyakwe siuva 1,100, lelo nyina walanzile ati: “Nimapeela siuva yii kuli Yeova kuti iye iya muzilo pakuti ukapangilemo ivilubi. Aeyi nakuwezezya.”
4 Lino waswilizye impiya zyakwe siuva kuli nyina, nyina watozilepo izili 200 aya apeela uwasulanga siuva. Nawe wapanzilemo ivilubi; nupya yaile iyavika umu ng’anda yakwe Mika.
5 Mika wakweti ing’anda yakwe ya leza nupya wapanzile efodi na telafimu, wasoolwile nu mwanakwe wenga kuti aye simapepo wakwe.
6 Mu manda yaaya umu Izlaeli mutali umwene. Fwandi cila muntu wacitanga cino akulola ukuti ali cilungame.
7 Lyene umu musumba uwa Betelemu mu Yuda mwali umonsi umwi uwacance uwa mu lupwa lwakwe Yuda. Wali Umwina Levi uwikalanga mumu kwene pa nsita iiya.
8 Umonsi wiyo wafumile umu musumba wa Betelemu mu Yuda aya umu kulonda incende pa kwikala. Lino wali pa lwendo, waile umu ncende ya myamba yakwe Efulemu ku ng’anda yakwe Mika.
9 Lyene Mika wamuzizye ati: “Ufumile kwi?” Nawe waswike ati: “Nene Mwina Levi kufuma uku Betelemu uku Yuda, mfumile nkulonda incende pa kwikala.”
10 Fwandi Mika wamunenyile ati: “Ikalanga nani, uye tata nupya simapepo wane. Nimakulipilanga impiya zyakwe siuva 10 pa mwaka nu kukupeela ivyakuzwala ni vyakulya.” Nawe watandike ukwikala nawe.
11 Umwina Levi wazumiile ukulaikala na Mika, nupya Umwina Levi wizile aya wa mwana wakwe.
12 Nupya Mika wasonsile Umwina Levi ukuya simapepo wakwe, nupya wikalanga nawe.
13 Mika walanzile ati: “Lyene namanya ukuti Yeova alancitila ivisuma pano Umwina Levi wataya a simapepo wane.”
