Yakapingula 18:1-31
18 Mu manda yayo mu Izlaeli mutaali umwene. Nupya amu mutundu wakwe Dani yalondanga impanga pa kwikala, pano walanga yatatala yapeelwa impanga ilinge mu mitundu ya Ina Izlaeli.
2 Amu mutundu wakwe Dani yatumile aonsi 5 ukufuma umu ndupwa zyao, aonsi aafikepo aku Zola nu ku Esyitaoli aakuya umu kulonda impanga mu umfisolo nu kuiceeceta. Yayanenyile iyati: “Yangini mukalonde impanga.” Lino yafisile uku ncende ya myamba yakwe Efulemu ku ng’anda yakwe Mika yaizi kuuku kwene.
3 Lino yaali umupiipi ni ng’anda yakwe Mika, yamanyile izwi lya mulumendo Umwina Levi, lyene yaile kuli aliwe nu kumuzya iyati: “A weni uwakuleta kuno? I cani cino ukucita kuno? I cani ica kuteeka kuno?”
4 Nawe wayanenyile vino Mika wamucitiile, nupya watiile: “Mika wansonta ukuya simapepo wakwe.”
5 Lyene yamunenyile iyati: “Twapaapata uzya kuli Leza ndi cakuti ivintu vimatupitila ningo pa lwendo.”
6 Simapepo nawe wayanenyile ati: “Mupite ningo. Yeova ali namwe pa lwendo lwinu.”
7 Lyene aonsi 5 yapisile iyaya yafika uku Laisyi. Yaweni vino antu aliko yaikalile ukwaula ukutaila ali wensi wakwe vino Aina Sidoni yatenzi. Ikalanga umutende ukwaula ukusakamala icili consi, nupya umu mpanga yao mutaali umulwani uwa kuyapumvyanya. Yali ukutali sana na Ina Sidoni nupya yataombelanga pamwi na antu yauze.
8 Lino aonsi yaswilile uku ina yao ku Zola nu ku Esyitaoli, aina yao yayuzizye iyati: “Mwapisile uli?”
9 Nayo yaswike iyati: “Twapiteni tukayazanze, pano twaweni ukuti impanga isuma sana. U mulandu ci uno mukuwayawaila? Mutasumba ni nsita ukuya umu kupoka impanga.
10 Lino mulafika mulazana antu asisakamala icili consi, nupya impanga ikulu. Leza wataipeela umu minwe inu, impanga umwaya vyonsi ivikalondekwa pano nsi.”
11 Lyene aonsi 600 amu lupwa lwakwe Dani aali ni vyanzo vya kuomvya umu ulwi yafumile uku Zola nu ku Esyitaoli.
12 Yapisile nu kuyapanga inkambi uku Kilyati-yelimu mu Yuda. Ali mulandu uno incende iiya iyayela uku uwondaka wa Kilyati-yelimu ikaamilwa ukuti Mahane-dani* kufika na ndakai.
13 Yafumile kuuku nu kuya uku ncende ya myamba yakwe Efulemu, nupya yaile uku ng’anda yakwe Mika.
14 Lyene aonsi 5 aile umu kuceeceta impanga ya Laisyi yanenyile aina iyati: “Uzye imumanya ukuti mu mang’anda yaa muli efodi, telafimu ni vilubi? Elenganyini pali vino mumacita.”
15 Fwandi asilika imilile papa kwene nupya aonsi 5 yaile uku ng’anda yakwe Mika ukwikalanga umulumendo Umwina Levi nu kumulamuka.
16 Pa nsita yii ala aonsi yakwe Dani 600 aasenzile ivyanzo iimilila pa mpongolo.
17 Aonsi 5 aile umu kuceeceta impanga iingile umu ng’anda umu kusenda ivilubi, efodi, na telafimu. (Simapepo waimi pa mpongolo pamwi na aonsi 600 aasenzile ivyanzo.)
18 Yaile umu ng’anda yakwe Mika nu kusenda ivilubi, efodi, na telafimu. Lyene simapepo wayuzizye ati: “I vyani vino mukucita?”
19 Lelo yamwaswike iyati: “Congo. Lema pa kanwa, nupya iza uye tata nupya simapepo witu. Uzye i cani cazipapo pa kuya simapepo wa muntu wenga nanti ukuya simapepo wa mutundu wa Ina Izlaeli umuli indupwa izingi?”
20 Fwandi simapepo uvwile ningo nupya watozile efodi, telafimu ni vilubi nu kuyakonka.
21 Lyene yapiliwike nu kuswilila, nupya yakolezizye ana, viteekwa, ni vintu vyuze ivya mutengo.
22 Lino amu mutundu wakwe Dani yapisile intamfu ilinge ukufuma uku ng’anda yakwe Mika, aonsi aikalanga umu mang’anda aali umupiipi ni ng’anda yakwe Mika yakolongine nu kuyakonka.
23 Lino yapundilile amu mutundu wakwe Dani, amu mutundu wakwe Dani yapiliwike nu kuzya Mika iyati: “I vyani vyacitika? U mulandu ci uno mwakolonganila?”
24 Nawe wayanenyile ati: “Imunsendela ya leza yano napanga nupya imusenda na simapepo kwene. Lyene nemo nsyale na cani? U mulandu ci lyene uno mukunguzizya ukuti, ‘I cani cacitika?’”
25 Amu mutundu wakwe Dani yamunenyile iyati: “Utaatukalipila; pano aonsi atiyasoka yamakuzanza nupya umafwa pamwi na amu ng’anda yako.”
26 Fwandi amu mutundu wakwe Dani yatwalilile nu lwendo; nupya lino Mika waweni ukuti yaakweti maka ukumucila, waswilile ukwakwe.
27 Pa cisila ca kusenda vino Mika wapanzile kumwi na simapepo wakwe, yaile uku Laisyi ku yantu aikalanga umutende ukwaula ukusakamala icili consi. Yaile iyayakoma ukuomvya ulupanga nu koca umusumba wao.
28 Kutaali uwa kuyapususya pano ikalanga ukutali nu musumba wa Sidoni nupya yataombelanga pamwi na antu yauze, ikalanga umu mukonko uwayelile umu Beti-leobu. Lyene yakuuzile umusumba cipya cipya nu kutandika ukwikalamo.
29 Yatemiile nu musumba uwa izina lyakuti Dani, izina lino lyali lyakwe isi uwaviilwe kuli Izlaeli. Lelo pa kutandika umusumba uu yawamanga ukuti Laisyi.
30 Pa cisila amu mutundu wakwe Dani imiike icilubi cao, nupya Yonatani mwana Gesyomu, mwana Mose na ana yakwe izile iyaya ya simapepo ya mutundu wakwe Dani kufika na pa wanda uno antu amu mpanga iyo yasenzilwe umu uzya.
31 Imiike ni cilubi cino Mika wapanzile, nupya catwalilile ukuya mumu kwene pa manda yonsi yano ing’anda yakwe Leza wa cumi yali umu Syilo.
Mafutunoti
^ Icikapiliula ukuti “Nkambi yakwe Dani.”
