Yakapingula 19:1-30
-
Amu mutundu wakwe Benjamini yacita uzelele umu Gibeya (1-30)
19 Mu manda yaya yano umu Izlaeli mutaali umwene, Umwina Levi uwikalanga uku ncende ya kutali, mu ncende ya myamba yakwe Efulemu wasenzile umwanaci kufuma uku Betelemu ya mu Yuda kuti aye umuci wakwe uwa pa mbali.
2 Lelo umwanaci wiyo ataali ni cisinka kuli aliwe, nupya wamusiile nu kuswilila uku ng’anda yakwe isi uku Betelemu. Wikazile kuuku kwene pa myezi 4.
3 Lyene iya wamukonsile kuti akamuwezye; wasenzile umuomvi wakwe umonsi na ya punda yaili. Fwandi umwanaci wamwingizye umu ng’anda yakwe isi, nupya isi wa mwanaci uvwile ningo lino wamuweni.
4 Lyene isivyala wamupaapasile ukuti aikale nawe manda yatatu; yalyanga nu kumwa, nupya walaalanga mumu kwene.
5 Pa wanda uwalenga 4, lino yakatwike katondotondo ukuti yapita, isi wa mwanaci wanenyile isivyala ati: “Lyako vimwi pakuti ukwate maka, nga mwapita.”
6 Fwandi Umwina Levi na isivyala ikazile nu kutandika ukulya nu kumwa, lyene pa cisila isi wa mwanaci wanenyile Umwina Levi ati: “Napaapata, ulaale kuno ni lelo nu kuipakizya.”
7 Lino umonsi wakatwike ukuti apita, isivyala watwalilile ukumupaapata, fwandi waizi nupya kwene.
8 Lino wakatwike katondotondo pa wanda uwalenga 5 kuti yapita, isi wa mwanaci wamunenyile ati: “Napaapata lyako vimwi pakuti ukwate maka.” Lyene ikazile ukufika manguzi ala yakulya.
9 Lino umonsi wakatwike ukuti apita pamwi na mamakwe nu muomvi wakwe, isi wa mwanaci wamunenyile ati: “Lola, kwatandika ukufita. Napaapata ikala. Laala kuno kwene nu kuipakizya. Mutondo katondo ungakatuka nu kuswilila ukwako.”
10 Lelo umonsi atalondanga ukulaala nupya kuuku, fwandi wapisile nu kuyafika uku Yebusi, kuli kuti uku Yelusalemu. Wapisile na ya punda yaili, umuci, nu muomvi wakwe.
11 Lino yaali umupiipi nu ku Yebusi alanga ilanzi likuya umu kuwa. Umuomvi uzizye umusambazi wakwe ati: “Uzye tungaya tukimilile umu musumba wa Yebusi nu kulaala mumu kwene?”
12 Lelo umusambazi wakwe wamwaswike ati: “Tutalinzile ukwimilila umu musumba uwa yantu asi Aina Izlaeli. Tumapita suka tukafike uku Gibeya.”
13 Lyene wanenyile umuomvi wakwe ati: “Leka tupitisye tukafike uku Gibeya nanti uku Lama; twayalaala uku musumba onga pa misumba iiyo.”
14 Fwandi yatwalilile ukupita nupya lino ilanzi lyatandike ukuwa, ala yali mupiipi nu musumba wa Gibeya uwali uwakwe Benjamini.
15 Fwandi imilile papa kwene nu kwingila umu musumba kuti amuno yalaale. Lino ingile umu musumba, ikazile pa ncende apazanwanga antu aingi, nupya kutaali uwayasenzile ukwakwe kuti akuno yakalaale.
16 Lyene manguzi kwene yaya, umukombe umwi wingile umu musumba ala akuwela ukufuma uku vyalo. Wali uwa mu ncende ya myamba yakwe Efulemu nupya pa nsita iiya wikalanga umu Gibeya; lelo antu amu musumba uwa yaali amu mutundu wakwe Benjamini.
17 Lyene waweni umwenyi wiyo umu ncende ya mu musumba umwazanwanga antu aingi, nupya wamuzizye ati: “Aekwi kuno ukuya, nupya ufumile kwi?”
18 Nawe waswike ati: “Twafuma uku Betelemu ya mu Yuda lyene tukuya uku ncende ya kutali iyaya umu ncende ya myamba yakwe Efulemu kuno nkaikala. Naile uku Betelemu ya mu Yuda lyene nkuya uku ng’anda yakwe Yeova, lelo kusi uwatansenda uku ng’anda ukwakwe.
19 Tukweti ivyakulya ivilinge vyakwe ya punda itu, nu mukate na waini vya kuomvya nene, umwanaci wii, nu muomvi witu. Kusi cino ituulizya.”
20 Lelo umukombe walanzile ati: “Mutende uye namwe! Nimamupeela vyonsi vino mukulondekwa. Lelo mutalaala umu ncende umukazanwa antu aingi.”
21 Fwandi wayasenzile ukwakwe nu kuyapeela ya punda ivyakulya. Lyene yafulile ingazo nupya yaliile nu kumwa.
22 Lino yaipakizyanga, aonsi yamwi amu musumba aali iviwelewele yaile pa ng’anda iyatandika ukuma uku cisaasa, nupya yanenanga umukombe uwali umwineco wa ng’anda iyati: “Fumya umonsi uwataiza umu ng’anda umwako pakuti tulaale nawe.”
23 Lyene umwineco wa ng’anda wafumile nu kuyanena ati: “Awe inane, mutacita iciipe. Napaapata, umonsi wii u mwenyi wane. Mutacita icintu cii ca winyi.
24 Inkwata umwanane nacisungu nu muci wa monsi wii uwa pa mbali. Lekini njafumye pakuti mucite cino mukulonda kuli aliyo. Lelo mutacita icintu cii ca winyi ku monsi wii.”
25 Lelo aonsi yayo yakanyile ukuvwa kuli vino walanzile, fwandi Umwina Levi walemile umuci wakwe uwa pa mbali nu kumufumya panzi. Nayo yalaazile nawe uku maka usiku onsi nu kumucuzya ukufika katondo. Lyene uku macaca yamulesile ukuti apita.
26 Katondotondo umwanaci wawezile, aiza aponela pa mulyango wa ng’anda ya mukombe umwali iya, nupya waizi papa kwene kufikila kwaca.
27 Lino iya wakatwike katondo nu kuyula ivisaasa kuti akonkanye nu lwendo lwakwe waweni umwanaci, umuci wakwe uwa pa mbali ala watalaala pa mulyango wa ng’anda wataika na makasa yakwe mu mulyango.
28 Wamunenyile ati: “Katuka twapita.” Nawe ataswike icili consi. Lyene wamukwezizye pali punda atwalilila nu ulendo.
29 Lino wafisile uku ng’anda ukwakwe, watozile umupeni nu kuputola icitumbi ca muci wakwe uwa pa mbali mu vimpilinsya 12, nupya watumile icimpilinsya conga conga kuli cila mutundu wa Ina Izlaeli.
30 Yonsi aweni ivimpilinsya yalanzile iyati: “Icintu cii citatala cacitikapo nanti ukuloleka ukufuma pa wanda uno Aina Izlaeli yafumile umu Ijipti kufika na ndakai. Mwelenganyepo sana, musambilileko, nupya mutunene ivya kucita.”
