Yakapingula 2:1-23
2 Lyene malaika wakwe Yeova wafumile uku Giligali nu kuya uku Bokimu nupya walanzile ati: “Namufumizye umu Ijipti nu kumutwala umu mpanga ino nalafile ukupeela ivikolwe vinu. Nupya nalanzile inti, ‘Ntalatala intame upangano uno napangine namwe.
2 Namwe mutalinzile ukupangana upangano na ikazi ya mu mpanga yii, nupya mulinzile ukonona maulambo yao.’ Lelo mutanguvwilile. U mulandu ci uno mwacitiile ica musango uu?
3 Nupya ali mulandu uno nalandiile nu kuti, ‘Ntalamuzingila inko zii, zilaya iciteyo kuli mwemwe, nupya mulatunkwa ukupepa ya leza yao.’”
4 Lino malaika wakwe Yeova wanenyile Aina Izlaeli yonsi mazwi yaa, yatandike ukulila sana.
5 Fwandi yatemiile incende iiya ukuti Bokimu,* nupya yapeezile malambo kuli Yeova papa kwene.
6 Lino Yoswa wanenyile Aina Izlaeli kuti yapita, cila muntu waswilile uku mpanga yakwe.
7 Antu yatwalilile ukuombela Yeova manda yonsi yano Yoswa wali nu umi alino na manda yonsi yano akalamba ya Ina Izlaeli aatwalilile ukuyako pa cisila ca mfwa yakwe Yoswa nupya aweni vyonsi vino Yeova wacitiile Aina Izlaeli yaali nu umi.
8 Lyene Yoswa mwana Nuni umuomvi wakwe Yeova wafwile ala ali ni myaka 110.
9 Fwandi yamuzisile umu Timunati-sela, umu mpanga yakwe iyayela umu ncende ya myamba yakwe Efulemu ku katutu ka Mwamba wa Gaasyi.
10 Inkulo iiya yonsi yafwile nu kuzikwa wa vikolwe vyao, nupya kwizile inkulo yuze iitamanyile Yeova nanti vino wacitiile Aina Izlaeli.
11 Fwandi Aina Izlaeli yacisile iviipe kuli Yeova nu kupepa ya Baali.
12 Yapondokile Yeova Leza wa vikolwe vyao uwayafumizye umu Ijipti. Nupya yalondiile ya leza yauze, ya leza ya yantu ayazingulwike, nupya yayafukamilanga nu kusosya Yeova.
13 Yapondokile Yeova nu kutandika ukupepa Baali ni vinkolanya vyakwe Asyitaloti.
14 Yeova wasokiile sana Aina Izlaeli, fwandi wayapeezile uku yalwani aapokolwile ivintu vyao. Wayakazizye uku yalwani yao ayazingulwike nupya yataakweti maka ya kuyalwisya.
15 Yeova wayaletelanga intazi konsi kuno yaya, wakwe viivi kwene vino Yeova walanzile, nupya wakwe viivi kwene vino Yeova walafile kuli aliyo, nupya yaculanga sana.
16 Fwandi Yeova wayasontelanga ya kapingula akuyapususya uku yalwani yao.
17 Lelo yatuvwanga na kuli ya kapingula kwene, nupya yaombelanga ya leza yauze nu kuyafukamila. Yaatanga zuwa ukucita vino ivikolwe vyao vyacitanga, ivyuvwilanga masunde yakwe Yeova. Yene yatacitanga vivyo.
18 Lyonsi lino Yeova wayasontela kapingula, Yeova wayanga na kapingula wiyo nupya wayapususyanga uku yalwani yao manda yonsi yano kapingula wiyo ali nu umi; pano Yeova wayuvwilanga uluse pali vino yalilanga pa mulandu na vino alwani yao yayacuzyanga.
19 Lelo ndi cakuti kapingula wafwa, yatandikanga nupya ukucita iviipe ukucila ivikolwe vyao, kupitila umu kulondela ya leza yauze, kuyaombela nu kuyafukamila. Yatataanga ukucita viipe nupya yatwalililanga ukukomya imyenzo.
20 Pa kusyalikizya Yeova wasokiile sana Aina Izlaeli, nupya walanzile ati: “Pa mulandu wakuti uluko luu ilutama upangano uno napangine ni vikolwe vyao nupya ilumpondokela,
21 nani ntalayazingila uluko nanti alonga pa nko zino Yoswa wasiile lino wafwile.
22 Ndacita vii pakuti indole ndi cakuti Aina Izlaeli yalatwalilila ukupita umu nzila yakwe Yeova wakwe vino ivikolwe vyao vyacisile.”
23 Fwandi Yeova walesile ukuti inko zii zitwalilile ukuya umu mpanga iiyo. Ataazizinzile zuwa nupya ataazipeezile umu minwe yakwe Yoswa.
Mafutunoti
^ Icikapiliula ukuti “Ya kaloosya.”
