Yakapingula 20:1-48
-
Nkondo yakatuka pa mulandu na amu mutundu wakwe Benjamini (1-48)
20 Lyene Aina Izlaeli yonsi yafumile uku Dani, ku Belisyeba nu ku mpanga iya Gilyadi, nupya yakolongine pa nkoleelo yakwe Yeova uku Mizipa.
2 Intunguluzi zya yantu ni mitundu yonsi ya Ina Izlaeli yakolongine pamwi na antu yakwe Leza, asilika yonsi aapitanga ulwa pansi aasenzile ya panga yaali 400,000.
3 Amu mutundu wakwe Benjamini yuvwile ukuti aonsi Aina Izlaeli iyaya uku Mizipa.
Lyene aonsi Aina Izlaeli yuzizye iyati: “Tunenini, cali uli pakuti ciipe ca musango uu cicitike?”
4 Umwina Levi, iya wa mwanaci wino yakomile waswike ati: “Nali na mamane uwa pa mbali lino nafisile uku Gibeya umusumba wakwe Benjamini kuti akuno ndaale.”
5 Nupya antu ya mu Gibeya yankatukile nu kuzinguluka ing’anda ino nalimo usiku. Yalondanga ukunkoma, lelo yalaazile na mamane uku maka nawe wafwile.
6 Lyene natozile icitumbi cakwe mamane nu kuciputola nupya natumile ivimpilinsya umu ncende zyonsi zya mu Izlaeli, pa mulandu wakuti yacisile icintu ca muzewanya nupya ica winyi umu Izlaeli.
7 Fwandi mwe yantu yonsi amu Izlaeli lanzyanyini nu kupingulapo.
8 Lyene antu yonsi yakatukile pamwi nu kulanda iyati: “Kusi umuntu ali wensi aamaswilila ukwi tenti lyakwe nanti uku ng’anda yakwe.
9 Vino tumacita uku musumba uwa Gibeya aevi: Tumapendula nu kuyaulwisya.
10 Tumatola aonsi 10 pa yonsi 100 kufuma umu mitundu yonsi ya Ina Izlaeli, nu kutola aonsi 100 kufuma pa yonsi 1,000, tutole na aonsi 1,000 kufuma pa yonsi 10,000 aamaya umu kukolonganika ivyakulya vya yasilika, pakuti yakalwisye umusumba wakwe Benjamini wa Gibeya, pa mulandu ni cintu ca winyi cino Aina Gibeya iyacita umu Izlaeli.”
11 Fwandi aonsi yonsi amu Izlaeli yakolongine capamwi nu kuya umu kulwisya umusumba.
12 Lyene amu mitundu ya Ina Izlaeli yatumile aonsi ku yonsi yonsi amu mutundu wakwe Benjamini kuti yakayuzye yati: “U mulandu ci uno imucitila iciipe ca musango uu?
13 Letini aonsi iviwelewele amu Gibeya, pakuti tuyakome nu kufumya iciipe umu Izlaeli.” Lelo amu mutundu wakwe Benjamini yakanyile ukuvwa kuli vino aina yao yalanzile.
14 Lyene amu mutundu wakwe Benjamini yafumile umu misumba nu kuyakolongana uku Gibeya pakuti yalwisye Aina Izlaeli.
15 Pa wanda uuwa amu mutundu wakwe Benjamini yakolonganike aonsi 26,000 ukufuma umu misumba aali na ya panga kulunda pa yonsi 700 asoolwilwe umu Gibeya.
16 Pa yasilika yayo paali aonsi 700 asoolwilwe aomvyanga ikasa lyakwe cimani. Yonsi kwene yaali sana na malunga icakuti nga yakuomvya ica kuvwintilako mawe yatapusanga nanti ulunyele.
17 Mitundu yuze iya Ina Izlaeli yakolonganike aonsi 400,000 aali na ya panga, nupya yonsi yamanyile sana ivya kulwa.
18 Yakatwike nu kuya uku Betele pakuti yakuuzye kuli Leza. Lyene yaile iyuzya iyati: “A weni pali sweswe aamatukolelela umu kulwisya amu mutundu wakwe Benjamini?” Yeova nawe waswike ati: “Yuda aamamukolelela.”
19 Pa cisila Aina Izlaeli yakatwike katondo nu kuyapanga inkambi pakuti yalwisye umusumba uwa Gibeya.
20 Lyene aonsi Aina Izlaeli yaile umu kulwisya amu mutundu wakwe Benjamini; yaile umu kuyalwisya umu Gibeya.
21 Fwandi amu mutundu wakwe Benjamini yafumile umu Gibeya nupya uwanda kwene uuwa yakomile aonsi Aina Izlaeli 22,000.
22 Lelo Aina Izlaeli yasifile nupya yaswilile umu kulwa ku ncende ili imwi kwene ino yalwilileko pa wanda wa kutandikilako.
23 Lyene Aina Izlaeli yapisile nu kuyalilila kuli Yeova kufika na manguzi, nupya yuzizye Yeova iyati: “Uzye tuye umu kulwisya aina itu amu mutundu wakwe Benjamini nupya kwene?” Yeova nawe wayaswike ati: “Ee kayalwisyini.”
24 Fwandi Aina Izlaeli yaile umupiipi na amu mutundu wakwe Benjamini pa wanda wakwe ciili.
25 Amu mutundu wakwe Benjamini nayo yafumile uku Gibeya nu kuya umu kuyakomenkanya pa wanda wakwe ciili, nupya yakomile Aina Izlaeli na yauze 18,000 aasenzile ya panga.
26 Lyene aonsi yonsi amu Izlaeli yaile uku Betele. Yalilanga nupya ikazile kuuku kwene pa nkoleelo yakwe Yeova, yataaliile icili consi uwanda uuwa kufika na manguzi nupya yapeezile malambo ya koca na malambo ya mutende pa nkoleelo yakwe Yeova.
27 Pa cisila yuzizye kuli Yeova, pano mu manda yaya imbokosi ya upangano yakwe Leza wa cumi yaali kuuku kwene.
28 Mu manda yaya Finiasi mwana Elieza, mwana Aloni, waombelanga umupiipi ni mbokosi ya upangano. Aonsi Aina Izlaeli yuzizye iyati: “Uzye tuye umu kulwisya aina itu amu mutundu wakwe Benjamini nupya kwene nanti tutayako?” Yeova nawe waswike ati: “Yangini, pano mutondo ndayapeela umu minwe inu.”
29 Lyene yaile iyafisamila aina yao ukuzinguluka umusumba uwa Gibeya.
30 Aina Izlaeli yaile umu kulwisya amu mutundu wakwe Benjamini pa wanda wakwe citatu, yaipekinye ukulwisya umusumba uwa Gibeya wakwe vino yacisile pa miku yuze.
31 Lino amu mutundu wakwe Benjamini yaile umu kuyakomenkanya, yutwike pakuti yayatalusye uku musumba. Lyene wakwe vino yacitanga lyonsi, yayazanzile nu kutandika ukukoma aonsi yamwi mu miseo ikalamba, museo umwi ukalamba waile uku Betele uze nao waile uku Gibeya, nupya yakomile aonsi Aina Izlaeli 30.
32 Lyene amu mutundu wakwe Benjamini yalanzile iyati: “Tumayacimvya wakwe vino tukuyacimvya lyonsi.” Lelo Aina Izlaeli nayo yalanzile iyati: “Tumautuka nu kuyatalusya uku musumba nu kuyatwala umu miseo.”
33 Lyene aonsi Aina Izlaeli yonsi yakatwike kufuma kuno yaali, iyaipekanya ukuyalwisya uku Baali-tamala, Aina Izlaeli aafisime nayo yafumile kuno yaali umupiipi nu musumba uwa Gibeya.
34 Fwandi aonsi 10,000 asoololwilwe mu Ina Izlaeli yonsi izile umupiipi na Gibeya, nupya ulwi wakomile. Lelo amu mutundu wakwe Benjamini yatamanyile ukuti viipe vyali umupiipi nu kuyacitikila.
35 Yeova wazwilizye Aina Izlaeli ukucimvya amu mutundu wakwe Benjamini, nupya pa wanda uuwa Aina Izlaeli yakomile amu mutundu wakwe Benjamini 25,100 aali na ya panga.
36 Amu mutundu wakwe Benjamini yelenginye ukuti vino Aina Izlaeli yutuka yamayacimvya, lelo Aina Izlaeli yutwike pano yataile ukuti auze aafisime yaali nu kuzanza umusumba wa Gibeya.
37 Aafisime yakatwike zuwa zuwa nu kwingila umu musumba. Lyene yasalangine nu kukoma antu yonsi aali mu musumba nu lupanga.
38 Aina Izlaeli yapekinye ukuti aonsi aafisamile umusumba yalinzile ukuoca pakuti yamanyisye auze ukuti iyaupoka.
39 Lino Aina Izlaeli yapiliwike kuti yatandike ukulwa, aonsi amu mutundu wakwe Benjamini aatandikilepo ukuyazanza nu kukoma aonsi umupiipi na 30 Aina Izlaeli, nupya yalanzile iyati: “I cumi kwene tumayacimvya wakwe vino twacisile uku cisila.”
40 Lelo icunsi catandike ukufuma umu musumba. Lino aonsi ya mutundu wakwe Benjamini yapiliwike, yaweni umusumba onsi ukupya ala icimbilimbili cikufika nu mupela.
41 Lyene aonsi ya mu Izlaeli yapiliwike nu kutandika ukuyazanza nupya amu mutundu wakwe Benjamini yavulungine pano yaweni ukuti vintu vyaipila.
42 Fwandi yutwike ukufuma uku yonsi ya mu Izlaeli nu kulungama uku lwanga, lelo yayakonsile; nupya aonsi aafumile umu misumba nayo kwene yatandike ukuyakoma.
43 Yazingulwike aonsi ya mutundu wakwe Benjamini nu kutwalilila ukuyakonka. Yayacimvizye pa nkoleelo ya musumba wa Gibeya lwa ku ufumondaka.
44 Nu mu kusyalikizya asilika ya maka amu mutundu wakwe Benjamini 18,000 yakomilwe.
45 Aonsi ya mutundu wakwe Benjamini yakonike nu kuutukila umu lwanga ku ciliwe cino yamanga ukuti Limoni, nupya Aina Izlaeli yakomile aonsi 5,000 mu miseo, yatwalilile ukuyakonka kufika nu ku Gidomu; fwandi yakomiilepo aonsi na yauze 2,000.
46 Asilika yonsi amu mutundu wakwe Benjamini amaka aali na ya panga aakomilwe uwanda uuwa yaali 25,000.
47 Lelo aali 600 yuutukile umu lwanga ku ciliwe cino yamanga ukuti Limoni, nupya ikazile kuuku kwene pa myezi 4.
48 Lyene aonsi ya mu Izlaeli yaswilile umu kulwisya amu mutundu wakwe Benjamini, yakomile antu ni viteekwa vyonsi ivyasiileko kuomvya ulupanga. Nupya yosile ni misumba yonsi ino yaileko.
