Yakapingula 4:1-24
4 Pa cisila ca mfwa yakwe Eudi, nupya kwene Aina Izlaeli yacisile iviipe kuli Yeova.
2 Fwandi Yeova wayakazizye kuli Yabini umwene wa Ina Kenani, uwateekanga umu Hazoli. Mukalamba wa yasilika yakwe wali a Sisela uwikalanga umu Halosyeti-ha-goyimu.
3 Aina Izlaeli yaliliile kuli Yeova pa mulandu wakuti Yabini wakweti maceleta ya vyela ankondo 900, nupya wayacuzizye sana pa myaka 20.
4 Pa nsita iiya, Debola kasesema umwanaci umuci wakwe Lapidoti wali akapingula umu Izlaeli.
5 Wikalanga umwisika lya kancindu kakwe akaali pakasi ka musumba wa Lama nu wa Betele mu ncende ya myamba yakwe Efulemu; nupya Aina Izlaeli yayanga kuli aliwe kuti ayapingule.
6 Wamile Baraki umwana wakwe Abinoamu kufuma uku Kedesyi-nafutali nu kumunena ati: “Yeova Leza wa Ina Izlaeli wamunena ukuti muye uku Mwamba wa Taboli pamwi na onsi 10,000 amu mutundu wakwe Nafutali nu mu mutundu wakwe Zebuluni.
7 Alaleta Sisela umukalamba wa yasilika yakwe Yabini kumwi na maceleta yakwe ankondo na asilika yakwe uku luzi lwa Kisyoni, nupya alayapeela umu minwe yako.”
8 Baraki nawe wamunenyile ati: “Ndi cakuti ulapita nani, ndayako, lelo ndi cakuti ulasyala, nani kwene ntalayako.”
9 Debola nawe walanzile ati: “Ndapita naawe. Lelo asi wewe ulalumbuka pa nkondo ino ulaya umu kulwa, pano Yeova alapeela Sisela mu minwe ya mwanaci.” Lyene Debola wapisile uku Kedesyi pamwi na Baraki.
10 Baraki wamile Zebuluni na Nafutali uku Kedesyi, nupya muli aliwo mwafumile aonsi 10,000 amulondiile. Debola nawe kwene wapisile pamwi nawe.
11 Pa nsita iiya, Hebeli Umwina Kenite ala waipatula uku Ina Kenite yauze, amu lupwa lwakwe Hobabu sivyala wakwe Mose, nupya wapanzile itenti mwisika lya cimuti cikulu mu ncende ya Zaananimu ku Kedesyi.
12 Lyene yanenyile Sisela ukuti Baraki mwana Abinoamu wataya uku Mwamba wa Taboli.
13 Lilyo kwene sile Sisela wasenzile maceleta yonsi avyela 900 ankondo na asilika yonsi yano wali nayo ku Halosyeti-ha-goyimu nu kuya uku luzi lwa Kisyoni.
14 Lyene Debola wanenyile Baraki ati: “Katuka, ilelo Yeova amapeela Sisela umu minwe yako nupya Yeova amakukoleelela.” Fwandi Baraki watentemwike Umwamba wa Taboli pamwi na onsi 10,000 amulondelanga.
15 Lyene Yeova waleesile icimvulunganya pali Sisela na pa maceleta yakwe yonsi ankondo na pa yasilika yakwe yonsi lino Baraki wayazanzile. Mu kusyalikizya Sisela wisile umwi celeta lyakwe nu kusimula ulwa pansi.
16 Baraki wazinginye maceleta ya nkondo na asilika kufika nu ku Halosyeti-ha-goyimu. Fwandi asilika yakwe Sisela yakomilwe nu lupanga, kusi nanti aumwi uwapuswike.
17 Lelo Sisela utukiile ukwi tenti lyakwe Yaeli umuci wakwe Hebeli Umwina Kenite, pa mulandu wakuti Yabini umwene wa ku Hazoli na amu ng’anda yakwe Hebeli yuvwananga.
18 Lyene Yaeli wafumile umwi tenti nu kukomenkanya Sisela, nupya wamunenyile ati: “Ingila muno musambazi. Utuvwa intete.” Fwandi Sisela wingile umwi tenti, nawe wamuvimvile na bulanketi.
19 Lyene Sisela wamunenyile ati: “Napaapata, mpeeko manzi ya kumwa, pano indi nu lusala.” Fwandi watozile inyambi ya mukaka nu kumupeela, nawe wamwile, na pa cisila wamuvimvile nupya kwene.
20 Sisela wamunenyile ati: “Imilila pa mulyango wi tenti, nupya nga ali wensi wiza nu kukuuzya ati, ‘Uzye muli umonsi umwi muno?’ umunene uti, ‘Awe!’”
21 Lelo Yaeli umuci wakwe Hebeli watozile ulupopo lwa kwi tenti ni nondo. Lyene wamutundeliile pano waizi ala watakondelwa nupya ala atatonta, lyene wamupofile umu mutwe nu lupopo mpaka ilupuzinkanya umu musili, nupya ali vino wafwile.
22 Baraki waile ukwi tenti lyakwe Yaeli ala azusile akulonda Sisela, Yaeli wafumile nu kumukomenkanya nupya wamunenyile ati: “Iza, nani namakulanga umonsi wino ukulonda.” Baraki wingiile na Yaeli umwi tenti nupya waweni Sisela ala atafwa, nupya ala ali nu lupopo umu mutwe.
23 Fwandi uwanda uuwa Leza wapeezile Yabini umwene wa Ina Kenani mu minwe ya Ina Izlaeli.
24 Aina Izlaeli yacimvizye Yabini umwene wa Ina Kenani, mpaka iyamukoma.
