Yakapingula 7:1-25
7 Lyene Yelubali, kuli kuti Gidyoni na antu yonsi yano wali nayo, yakatwike katondotondo nu kuyapanga inkambi uku cisima ca ku Halodi, inkambi ya Ina Midyani nayo yayeliile uku katutu ka nkambi yakwe Gidyoni pa mwamba wa Mole umu lwanga.
2 Lyene Yeova wanenyile Gidyoni ati: “Antu yano uli nayo iyavulisya aakuti mpeele Midyani umu minwe yao. Pano Aina Izlaeli yangaayuvwa kuli nene nu kulanda iyati, ‘Ituipususya pa mulandu na maka itu.’
3 Lyene manyisya antu uti: ‘Wensi aali ni ntete, aswilile ukwakwe.’” Fwandi Gidyoni wacisile vivyo kwene pakuti aleke aali ni ntete ukuswilila ukumwao. Lino wacisile vivyo, antu 22,000 yaswilile uku mang’anda yao, nupya aali 10,000 ali yano yasiile.
4 Nalyo kwene Yeova wanenyile Gidyoni ati: “Kucili antu aingi sana. Leka yaye uku luzi pakuti nkayezezye kuuku kwene. Nga nakunena nati, ‘Wii amapita naawe,’ ala alinzile ukupita naawe, lelo nga nakunena nati ‘Wii asikupita naawe,’ ala atalinzile ukupita naawe.”
5 Fwandi watwazile antu uku luzi.
Lyene Yeova wamunenyile ati: “Yonsi aakumwa manzi ukuomvya iminwe* uike yonga, na aakufukama nu kwinamila umu manzi pa kumwa, nayo uike yonga.”
6 Impendwa ya yonsi aaomvyanga iminwe pa kumwa yaali 300. Asyala yonsi yafukamanga nu kwinamila umu manzi pa kumwa.
7 Lyene Yeova wanenyile Gidyoni ati: “Nimamupususya ukuomvya aonsi 300 ali yakumwa manzi ukuomvya iminwe, nupya nimapeela Midyani umu minwe inu. Lelo leka antu yonsi asyala yaswilile ukumwao.”
8 Fwandi lino yatozile ivyakulya na mapenga uku yasilika yauze, Gidyoni wanenyile aonsi yonsi asyala ukuti yaswilile ukumwao, nupya wasile sile na aonsi 300. Inkambi ya Ina Midyani yayelile umu lwanga.
9 Usiku kwene uwa Yeova wamunenyile ati: “Katuka ukazanze inkambi ya Ina Midyani pano injipeela umu minwe yako.
10 Lelo ndi cakuti ukuvwa intete uye uku nkambi na Pula umuomvi wako.
11 Uye ukuvwe vino yakulanda, nupya pa cisila umakwata maka ya kuyazanza.” Lyene Gidyoni na Pula umuomvi wakwe yaile umupiipi na pano asilika yapangiile inkambi.
12 Aina Midyani, Aina Amaleki na aku ufumondaka yonsi yaali umu lwanga lonsi kwati amakanta, nupya ingamali zyao zyali izingi sana izitanga zipendwe wa mucanga wa mu mbali yakwe yemba.
13 Lyene Gidyoni wafisile, nupya kwali umonsi uwasimikilanga umuze iciloto ati: “Vii ali vino inalota. Ikuli umukate wakwe baale uulungane, wali ukuzinguluka umu nkambi ya Ina Midyani. Iwiza wapuma sana umwi tenti nu kuliwisya. Iwalenga ukuti itenti lisuluke nu kuwa.”
14 Lyene umuze nawe walanzile ati: “Lufwile sile u lupanga lwakwe Gidyoni mwana Yoasyi umonsi wa mu Izlaeli. Leza watapeela Midyani ni nkambi yonsi umu minwe yakwe.”
15 Lino Gidyoni uvwile sile vino umonsi akusimika iciloto nu upiliulo wa ciloto cico, wafukime nu kupepa. Pa cisila waswilile uku nkambi ya Ina Izlaeli nu kulanda ati: “Katukini, pano Yeova watapeela inkambi ya Ina Midyani mu minwe inu.”
16 Lyene wankinye aonsi 300 umu maumba yatatu nupya yonsi wayapeezile mapenga ni nsembo izikalamba umwali inkozyo.
17 Nupya wayanenyile ati: “Mwandola nu kucita vino nkucita. Nga nafika umupiipi ni nkambi, mucite vino nimacita.
18 Nemo na yano tuli nayo nga twalizya mapenga, namwe kwene mulinzile ukulizya mapenga ukuzinguluka inkambi nupya mupunde muti, ‘Lupanga lwakwe Yeova na lwakwe Gidyoni!’”
19 Gidyoni na aonsi 100 aali nawe izile umupiipi ni nkambi lwa pakasi ka usiku* lino alinzi yatandike sile ukulinda. Yalizizye mapenga nu kutama insembo izikalamba izyali umu minwe yao.
20 Fwandi maumba yatatu yalizizye mapenga nu kutama insembo. Yalemile inkozyo uku makasa yao akuli cimani nu kulizya mapenga ukuomvya makasa yao akwi lunji nupya yapunzile iyati: “Lupanga lwakwe Yeova na lwakwe Gidyoni!”
21 Pa nsita yii yonsi, cila muntu waimi pa ncende yakwe ukuzinguluka inkambi, nupya asilika yonsi Aina Midyani yapuusile ala yafumile yakupunda.
22 Aonsi 300 yatwalilile ukulizya mapenga, nupya Yeova walenzile asilika Aina Midyani yatandike ukukomana na ya panga umu nkambi yonsi, nupya asilika yutwike ukufika nu ku Beti-syita, iyatwalilila ukuyafika nu ku Zelela iyaya iyafika nu kunzi ya musumba wa Abeli-mehola mupiipi na Tabati.
23 Nupya Gidyoni wamile aonsi Aina Izlaeli, kufuma umu mutundu wakwe Nafutali, mutundu wakwe Asyeli, nu mutundu onsi wakwe Manase, nayo yazinginye Aina Midyani.
24 Gidyoni watumile inkombe mu ncende yonsi ya myamba yakwe Efulemu, watile: “Yangini uku Beti-bala nu ku Luzi Lwa Yodani mukazanze Aina Midyani nu kuyacilikila ukulamba.” Fwandi aonsi yonsi amu mutundu wakwe Efulemu yakolongine, nupya yaile iyacinga uku Beti-bala nu ku Luzi Lwa Yodani.
25 Nupya yalemile intunguluzi ziili zya Ina Midyani, kuli kuti Olebu na Zeebu, yakomiile Olebu pa ciliwe icikalamba cino pa cisila yatandike ukwama ukuti Olebu, nupya yakomiile Zeebu pa ca kufenelamo waini cakwe Zeebu. Yatwalilile ukuzinganya Ina Midyani nupya yatwazile umutwe wakwe Olebu na wakwe Zeebu kuli Gidyoni mu ncende ya Luzi Lwa Yodani.
Mafutunoti
^ Mu Ciebele: “Yonsi aakumwa manzi kuomvya ululimi wakwe vino simbwa akamwa.”
^ Mu Ciebele: “Kutandika uku ma 22:00 kufika uku ma 02.”
