Yakapingula 8:1-35
8 Lyene aonsi ya mu mutundu wakwe Efulemu yamuzizye iyati: “I cani cino wacitila vii kuli sweswe? U mulandu ci uno utaatwamiile lino waile umu kulwisya Aina Midyani?” Nupya yapazyanyizye sana nawe.
2 Lelo wayanenyile ati: “I vyani vino incita ivingalingana na vino imucita? Uzye ivinono vino mwe ya mu lupwa lwakwe Efulemu imucita vitacizile ivikalamba vino swe ya mu lupwa lwakwe Abi-eza itucita?*
3 Leza watapeela intunguluzi zya Ina Midyani, kuli kuti Olebu na Zeebu mu minwe inu, nupya i vyani vino incita ivingalingana na vino imucita?” Lino walanzile vivyo, yateesile imyenzo.
4 Lyene Gidyoni waile alamba Uluzi Lwa Yodani. Wene na aonsi 300 aali nawe yatonsile, lelo yatwalilile ukukonka alwani yao.
5 Fwandi wanenyile aonsi aaku Sukoti ati: “Napaapata peelini aonsi yano indi nayo umukate pano iyatonta, nupya nkuzinganya Zeba na Zalemuna ya mwene ya ku Midyani.”
6 Lelo intunguluzi zya ku Sukoti zyatile: “U mulandu ci uno tungapeelela asilika yako umukate kwati watulema mpiti Zeba na Zalemuna?”
7 Lyene Gidyoni walanzile ati: “Ndi cakuti Yeova wapeela Zeba na Zalemuna umu minwe yane, ndamitotola ni myunga ya mu lwanga.”
8 Nupya wafumile uku ncende iiya nu kuya uku Penueli, nako kwene waile alenga umukate, lelo aonsi aku Penueli yamwaswike wakwe viivi kwene vino aonsi aku Sukoti yamwaswike.
9 Fwandi wanenyile aonsi aku Penueli ati: “Nga nawela umutende ndawisya ulupungu luu.”
10 Pa nsita iiya, Zeba na Zalemuna yaali umu Kalekoli pamwi na asilika yao, kuli kuti aonsi umupiipi na 15,000. Yakwene ali yano yaasileko sile mu yasilika ya ku katutu, pano asilika 120,000 aomvyanga ya panga yakomilwe.
11 Gidyoni watwalilile ukupita umu museo umwapitanga antu aikalanga umu matenti uku katutu ka ncende iya Noba na Yogobeya nupya waile azanza inkambi umu kupumikizya.
12 Lino ya mwene ya ku Midyani, kuli kuti Zeba na Zalemuna yutwike, Gidyoni wayazinginye nu kuyalema na cii calenzile yonsi aali umu nkambi ukuvwa intete.
13 Lyene Gidyoni mwana Yoasyi wawezile ukufuma uku nkondo ukuomvya akazila akaya uku Helesi.
14 Lino wali pa lwendo, walemile umonsi umwi uwacance uwa ku Sukoti nu kutandika ukumuuzilizya. Umonsi wiyo wamulembiile mazina 77 a yantu aali intunguluzi nupya akalamba ya mu Sukoti.
15 Lyene waile uku yonsi ya mu Sukoti nu kuyanena ati: “Zeba na Zalemuna aeya, yano mwantumfizyepo imuti, ‘U mulandu ci uno tungapeelela asilika yako umukate kwati watulema mpiti Zeba na Zalemuna?’”
16 Lyene wasenzile akalamba ya mu musumba nu kuyatota ni myunga, fwandi wasalapwile aonsi ya mu Sukoti.
17 Nupya wawisizye ulupungu lwa ku Penueli nu kukoma aonsi amu musumba.
18 Gidyoni uzizye Zeba na Zalemuna ati: “Aonsi ya musango ci yano mwakomile umu Taboli?” Nayo yamwaswike iyati: “Yalolekanga wakwe wewe, yalolekanga wa mwana wa mwene.”
19 Lyene walanzile ati: “Yaali aina yane, yaviilwe muli mayo. Nkulapa umwi zina lyakwe Yeova Leza wa umi ukuti nga mutayakoma, nani kwene nga ntali namukoma.”
20 Lyene wanenyile Yeteli iyeli lyakwe ati: “Katuka uyakome.” Lelo Yeteli atafumizye ulupanga pano uvwile intete pa mulandu wakuti wali umwance.
21 Fwandi Zeba na Zalemuna yalanzile iyati: “Katuka wewe kwene utukome, pano ivili umonsi i vilinzile ukuya na maka yakwe.” Lyene Gidyoni wakatwike nu kukoma Zeba na Zalemuna nupya watozile iviyembelo ivyalolekanga wa mwezi ivyali mu nsingo zya ngamali zyao.
22 Pa cisila aonsi amu Izlaeli yanenyile Gidyoni iyati: “Tuteekange kumwi na ana yako aonsi na izikulu yako, pano watutupususya uku Ina Midyani.”
23 Lelo Gidyoni wayanenyile ati: “Ntakulamuteeka, na ana yane kwene yatakulamuteeka. Lelo Yeova ali wino amamuteekanga.”
24 Nupya Gidyoni watwalilile ukuyanena ati: “Nkulenga sile icintu conga: cila muntu ampeele ielena lya pa mpuno pali vino mwapokolwile.” (Pano yaakweti maelena ya pa mpuno yakwe goldi pa mulandu wakuti yali amu lupwa lwakwe Isumaeli.)
25 Nayo yalanzile iyati: “Tumakupeela.” Lyene yanzile insalu nupya cila muntu wasumbilepo ielena ukufuma pa vintu vino wapokolwile.
26 Amaelena ya pa mpuno yakwe goldi yano Gidyoni walenzile yafinyile ukulingana na masyekele* yakwe goldi 1,700, ukufumyako iviyembelo vya mu nsingo ivyalolekanga wa mwezi, ivyakuzwala iviyenzulukile vino ya mwene ya ku Midyani yazwalanga, viyembelo vya kuzwika ingamali umu nsingo ni viyembelo vyuze.
27 Gidyoni wapanzile efodi ukuomvya vintu vivyo nu kumwika umu musumba wakwe uwa Ofula; nupya Aina Izlaeli yatandike ukupepa efodi wiyo, nupya wizile aya iciteyo kuli Gidyoni nu ku ya mu ng’anda yakwe.
28 Aina Midyani yacimviwe uku Ina Izlaeli, nupya yataatazile yayalwisyepo nupya; mu mpanga mwali umutende pa myaka 40 umu manda yakwe Gidyoni.
29 Fwandi Yelubaali mwana Yoasyi waswilile ukwakwe nupya waile aikala kuuku kwene.
30 Gidyoni wakweti ana aonsi 70 pa mulandu wakuti wakweti aci aingi.
31 Muci wakwe uwa pa mbali uwa ku Syekemu nawe kwene wamuvyalile umwana umonsi nupya wamutemiile izina ilyakuti Abimeleki.
32 Gidyoni mwana Yoasyi wafwile ala umukote nupya waziisilwe umwi lindi lyakwe Yoasyi isi umu ncende iya Ofula iya lupwa lwakwe Abi-eza.
33 Lino Gidyoni wafwile sile, Aina Izlaeli nupya kwene yatandike ukupepa ya Baali, nupya yasoolwile Baali-beliti ukuya ali leza wao.
34 Aina Izlaeli yatiwisye Yeova Leza wao uwayapuswisye uku yalwani yao yonsi ayazingulwike;
35 nupya yataali nu kutemwa kwa cumi uku ya mu ng’anda yakwe Yelubaali, kuli kuti Gidyoni pa visuma vyonsi vino wacitiile Aina Izlaeli.
Mafutunoti
^ Mu Ciebele: “Uzye imyangazi ino amu lupwa lwakwe Efulemu iyatolelezya itaazipapo ukucila imyangazi ino amu lupwa lwakwe Abi-eza iyazombola?”
^ Syekele wenga angalingana na magilamu 11.4. Lolini Ivyeo na Vyuze pa B14.
