Yakapingula 9:1-57
9 Mu kuya kwa nsita, Abimeleki mwana Yelubaali waile kuli ya nyinalume uku Syekemu, nupya waile ayanena kumwi na yonsi amu lupwa lwakwe isikulu ati:
2 “Uzyini intunguluzi zyonsi zya mu Syekemu muti, ‘Uzye i cani cingamuzipila pa kuteekwa na ana yonsi yakwe Yelubaali 70 nanti ukuteekwa sile nu muntu wenga? Nupya mwiusye ukuti nemo nene lupwa winu kololo.’”
3 Lyene ya nyinalume yaile iyamuvwangila uku ntunguluzi zyonsi zya mu Syekemu, nazyo zyasoolwilepo ukulateekwa na Abimeleki pano zyalanzile iziti: “U mwina witu.”
4 Yamupeezile masyekele yakwe siuva 70 ukufuma umu ng’anda yakwe Baali-beliti, nupya Abimeleki wayaomvizye ku kulipila aonsi aataombanga icili consi nupya awelewele pakuti yamusukilile.
5 Lyene waile uku ng’anda yakwe isi uku Ofula nu kuyakoma aina yakwe, ya mwana Yelubaali 70 pi iwe lyonga. Yotamu sile uwali umunono sana pa yana yakwe Yelubaali u wapuswike, pano wafisime.
6 Lyene intunguluzi zyonsi zya mu Syekemu na antu yonsi amu Beti-milo yakolongine mupiipi ni cimuti cikalamba lwa mu mbali ya lucesi ulwali umu Syekemu nu kwika Abimeleki pa wene.
7 Lino yamanyisizye Yotamu ivyacitike, lilyo kwene wapisile nu kuyaimilila papela ya Mwamba uwa Gelizimu nupya wapunzile ni izwi likulu ati: “Uvwini kuli nene mwe ntunguluzi zya mu Syekemu, lyene Leza nawe amauvwa kuli mwemwe.
8 “Pa nsita imwi kwali imiti iyaile umu kusonta umwene uwakuti aiteeka. Fwandi imiti iiyo yanenyile umuti wa muolivi iti, ‘Tuteekange.’
9 Lelo umuti wa muolivi wayaswike iuti, ‘Uzye insye mafuta yane aakaomviwa uku kucindika Leza na antu nu kuya umu kupungila imiti yuze?’
10 Lyene imiti yanenyile umusamvu iti, ‘Iza uwatuteeka.’
11 Lelo umusamvu wanenyile imiti yuze iuti, ‘Uzye insye ivizao vyane ivilyompe nupya ivisuma nu kuya umu kupungila imiti yuze?’
12 Lyene imiti yanenyile icimuti ca myangazi iti, ‘Iza uwatuteeka.’
13 Naco canenyile imiti yuze iciti, ‘Uzye insye waini wane umupya aakalenga Leza na antu ukusansamuka nu kuya umu kupungila imiti yuze?’
14 Mu kusyalikizya, imiti yuze yonsi yanenyile umuti wa myunga iti, ‘Iza uwatuteeka.’
15 Nao wanenyile imiti yuze iuti, ‘Ndi cakuti umu cumi mumansonta ukuya umwene winu, izini mwaikala umwisika lyane. Lelo nga cisi vivyo umoto kaufume umu cimuti ca myunga nu koca imikedali ya mu Lebanoni.’
16 “Uzye lyene imucita sile ningo ukwika Abimeleki pa wene, nupya uzye imucitila Yelubaali na amu ng’anda yakwe ivisuma nu kumucitila vino mulinzile ukumucitila?
17 Lino tata wamulwilanga, wisile umi wakwe umu uzanzo pa kumupususya uku Ina Midyani.
18 Nomba ilelo imukatukila amu ng’anda yakwe tata nu kukoma ana yakwe aonsi 70 pi iwe lyonga, lyene imuleka Abimeleki umwana wino tata wakweti umu muzya wakwe ukuya umwene pa ntunguluzi zya mu Syekemu pa mulandu sile wakuti umwina winu.
19 Ndi cakuti vino imucita ilelo kuli Yelubaali na amu ng’anda yakwe vili sile ningo, sansamukini pali Abimeleki nupya lekini nawe kwene asansamuke pali mwemwe.
20 Lelo nga cisi vivyo, umoto kaufume kuli Abimeleki nu koca intunguluzi zya mu Syekemu nu mu Beti-milo, nupya umoto kaufume uku ntunguluzi zya mu Syekemu nu mu Beti-milo nu koca Abimeleki.”
21 Lyene Yotamu utwike nu kuya uku Beeli, nupya wikazile kuuku kwene pa mulandu wakwe Abimeleki umwinakwe.
22 Abimeleki wateesile Aina Izlaeli pa myaka itatu.
23 Lyene Leza waleesile umupasi uwipe pali Abimeleki na pa ntunguluzi zya ku Syekemu nazyo zyafutwike Abimeleki.
24 Cali vivyo pakuti kuye icilanduzi pa unkalwe uwacitikiile ya mwana Yelubaali aonsi 70 pakuti aonsi aali nu mulandu yalipile pa wazi uno yazwisizye, kuli kuti Abimeleki pa kukoma aina yakwe alino ni ntunguluzi zya mu Syekemu pa kumwazwa ukuyakoma.
25 Fwandi intunguluzi zya ku Syekemu zyasonsile aonsi akuyamufisamila pa myamba nupya wensi uwapita pano yayelile, yamupokanga vino akweti. Mu kuya kwa nsita Abimeleki wizile auvwa ivyacitikanga.
26 Lyene Gaali mwana Ebedi pamwi na ina yakwe yaile uku Syekemu, nupya intunguluzi zya ku Syekemu zyamutaile.
27 Yaile umu calo nu kuyakulula imyangazi iyaifena nu kupanga umutebeto, pa cisila yaile umu ng’anda yakwe leza wao nu kutandika ukulya nu kumwa nu kutiipwila Abimeleki.
28 Lyene Gaali mwana Ebedi walanzile ati: “Uzye Abimeleki ali weni, nupya Syekemu ali weni uwakuti twaombela? Uzye asi mwana Yelubaali, nupya uzye Zebuli asi aali muomvi wakwe? Mwaombela ya mwana Hamoli isi wakwe Syekemu! U mulandu ci uno tungaombela Abimeleki?
29 Ndi cakuti nene natungululanga antu yaa, ningafumya Abimeleki pa wene.” Lyene wanenyile Abimeleki ati: “Vuzya asilika yako nupya uwize umu kulwa naswe.”
30 Lino Zebuli intunguluzi ya mu musumba uvwile vino Gaali mwana Ebedi walanzile, wasosile sana.
31 Fwandi watumile inkombe kuli Abimeleki umu nkama ati: “Gaali mwana Ebedi kumwi na ina yakwe yali umu Syekemu, nupya yakutunka antu ya mu musumba pakuti yakupondokele.
32 Fwandi wemo na aonsi yako uwize usiku kwene uu uyafisamile umu mpanga.
33 Lyene katondo lino ilanzi lyatunka sile ulinzile ukukatuka nu kuzanza umusumba; nupya ndi cakuti wene na aonsi yakwe iza umu kukulwisya, ulinzile ukucita ivili vyonsi vino ungakwanisya pakuti umucimvye.”
34 Fwandi Abimeleki na antu yonsi yano yaali nawe yakatwike usiku, nupya yafisamile umusumba wa Syekemu mu maumba 4.
35 Lino Gaali mwana Ebedi wapisile nu kuyaimilila pa mpongolo ya musumba, Abimeleki na antu yano yaali nawe yakatwike pano yafisime.
36 Lino Gaali waweni antu yayo wanenyile Zebuli ati: “Lola! Antu yakutelemuka ukufuma pa myamba.” Lelo Zebuli wamunenyile ati: “Ivinzingwa vya myamba avino ukulola kwati antu.”
37 Pa cisila Gaali walanzile ati: “Lolini! Antu yakufuma pakasi ka mpanga, nupya iumba lyonga likufumilila uku nzila iyaya uku cimuti cikalamba cakwe Meonenimu.”
38 Zebuli nawe wamwaswike ati: “Uzye icilumba cako cili kwi vino walanzile ukuti, ‘Uzye Abimeleki aali weni uwakuti twaombela?’ Uzye antu yayo asi ayano wakanyile? Ale pitanga ukayalwisye.”
39 Lyene Gaali wasenzile intunguluzi zya ku Syekemu nu kuyalwisya Abimeleki.
40 Abimeleki wazinginye Gaali, nawe utwike, nupya aingi yakomilwe kufika na pa mpongolo ya musumba.
41 Abimeleki watwalilile ukwikala umu Aluma, nupya Zebuli wazinzile Gaali kumwi na ina yakwe Gaali umu Syekemu.
42 Wanda uwalondelilepo antu aali umu musumba yaile umu mpanga, nupya Abimeleki uvwile ivyacitike.
43 Wamile antu yakwe nu kuyankanya umu maumba yatatu nupya yaile iyafisama umu mpanga. Lino waweni antu yakufuma umu musumba, wayazanzile nu kuyakoma.
44 Abimeleki na onsi yano wali nayo yasimwile nu kuyaimilila pa mpongolo ya musumba, lyene maumba yaili yazanzile antu yonsi aali umu mpanga nu kuyakoma.
45 Uwanda onsi uuwa Abimeleki walwisizye umusumba nu kuupoka. Wakomile antu aalimo, nupya wawisizye umusumba nu kuwitila umusilya.
46 Lino intunguluzi zyonsi zya mu lupungu lwa Syekemu zyuvwile ivyacitike, lilyo kwene sile zyaile umu muputule wa kufisamamo uwa mu ng’anda yakwe Eli-beliti.
47 Lino Abimeleki uvwile sile ukuti intunguluzi zyonsi zya mu lupungu lwa Syekemu izikolongana,
48 wene na aonsi yonsi yano wali nayo yaile uku Mwamba wa Zalimoni. Lyene Abimeleki watozile impasa nu kukoma umusambo wa muti awika na pa ciye, nupya wanenyile antu yano wali nayo ati: “Pitisyini mucite vino nacita!”
49 Lyene antu yonsi nayo kwene yakomile imisambo nu kulondela Abimeleki. Yaile iika imisambo pa muputule wa kufisamamo nu kuoca, fwandi antu yonsi amu lupungu lwa Syekemu nayo kwene yafwile, kuli kuti aonsi na anaci mupiipi na 1,000.
50 Lyene Abimeleki waile uku Tebezi; waile apanga inkambi kuuku kwene nu kupoka umusumba wa Tebezi.
51 Pakasi ka musumba pali ulupungu lukome, nupya aonsi yonsi, anaci, ni ntunguluzi zyonsi zya mu musumba zyaile kuuku kwene. Yaiyalile umu lupungu nu kukwela api paala.
52 Abimeleki waile uku lupungu nu kuluzanza. Wapalamile pa mulyango wa lupungu pakuti aloce.
53 Lyene umwanaci umwi watamile Abimeleki nu mwanansyo pa mutwe mpaka iulepuka.
54 Zuwa zuwa Abimeleki wamile umuomvi wakwe uwamusendelanga ivyanzo nu kumunena ati: “Somola ulupanga nu kunkoma pakuti yataca yalande ukuti, ‘umwanaci uwamukomile.’” Fwandi umuomvi wakwe wamutosile nu lupanga, nawe wafwile.
55 Lino aonsi ya mu Izlaeli yaweni ukuti Abimeleki wafwa, yonsi yaswilile uku mang’anda yao.
56 Fwandi Leza, walandwile pa viipe vino Abimeleki wacisile kuli isi pa kukoma aina yakwe 70.
57 Nupya Leza walesile ukuti viipe vyonsi vino aonsi ya mu Syekemu yacisile viswilile pali aliyo. Fwandi citiipu cakwe Yotamu mwana Yelubaali cizile pali aliyo.
