Yelemiya 10:1-25
10 Mwe Ina Izlaeli uvwini vino Yeova akumunena.
2 Yeova akuti:
“Mutaacita wakwe vino amu nko yakacita,Nupya mutaatiina ivimanyililo vya mwi yuluPano vivyo kwene avino antu ya mu nko yakatiina.
3 Intambi zya yantu i zya sile sile.
Uwamanya ivya kupangapanga akakoma icimuti,Nu kupangamo icilubi ukuomvya iciombelo cakwe.
4 Yakaciyemvya ukuomvya siuva na goldiNupya yakacipopelela ni nsunga pakuti cilemane.
5 Vilubi vivyo vyaya wa ca kutiinyizyako inyama mu calo ca viimbi, visivwanga;Yakavisenda sile pano vitanga vipite.
Mutaavitiina pano vitanga vimucite iciipe,Nupya vitanga vicite icisuma icili consi.”
6 Kutaaya uwaya wakwe wewe, we Yeova.
Wewe mukulu, ni zina lyako i likalamba nupya i lya maka.
7 Kusi aatanga akutiine we Mwene wa nko, pano walinga ukucindikwa;Pa mulandu wakuti pa yantu yonsi aamano na pali ya mwene ya nko yonsi,Pataaya uwaya wakwe wewe.
8 Vyonsi kwene vitaakwata mano nupya iviwelewele.
Vino vikasambilizya i vya sile sile.
9 Siuva ikafuma uku Tasyisyi na goldi ikafuma uku Ufazi,Vino uwamanya ivya kupangapanga, na aakapanga ivintu ukuomvya ivyela yakayemvezyako ivilubi.
Yakavizwika ivyakuzwala ivyapangilwa na kotoni yakwe bulu ni iyenzulukile.
Vyonsi kwene vyapangwa na antu aamanyikisya ivya kupangapanga.
10 Lelo Yeova a Leza wa cumi.
A Leza wa umi nupya u Mwene wa manda pe.
Pa mulandu nu ukali wakwe, insi ilatenkana,Nupya kusi uluko ululapusuka uku ukali wakwe.
11 * Uyanene uti:
“Ya leza aatapanzile mayulu ni nsiYalalowa umu nsi nu mwisika lya mayulu.”
12 Leza u wapanzile insi uku maka yakwe,U wapanzile impanga ivunde uku mano yakwe,Nupya u wapanzile mayulu ukuomvya ukucenjela kwakwe.
13 Ndi cakuti wavwanga,Manzi ya mu mayulu yakasunkaana,Nupya akalenga manzi ukukatuka ukufuma umu nsi yonsi.
Akalenga ikuya ukumyantula kwa nkuwa lino imvula ikutoonya,Nupya akaleta umuza ukufuma muno wausungila.
14 Muntu wensi akacita ivisi vya mano nupya vino atamanyile.
Wensi aakapanga ivintu ukuomvya ivyela alazewana pa mulandu ni vilubi vino akapanga;Pano ivilubi vyakwe asi vya cumi,Nupya vitaaya nu umi.
15 I vya sile sile nupya i vya uwelewele.
Lino uwanda wa upinguzi ulafika, vilalowa.
16 Leza wakwe Yakobo ataaya wa vintu vii,Pano wene u waumvile ivintu vyonsi,Nupya Izlaeli ali ntuwa yakwe iya upyanyi.
Yeova wa maumba ali zina lyakwe.
17 Kolonganika ivintu vyako pakuti uwapita,We mwanaci wemuno ukacuziwa.
18 Yeova walanda wati:
“Likwene sile nimazinga antu ya mu mpanga,Nu kuyalenga ukuya nu ulanda.”
19 Kalanda kuli nene pa mulandu nu kucisika!
Cilonda cane cisi ni mipolele.
Nupya natiile: “Ukwene ali ulwale wane, nupya ndinzile ukuzizimizya.
20 Itenti lyane ilyononwa, ni myando yonsi yatiputolwa.
Ana yane iyansya, yasipo.
Kusi ali wensi uwatasyala uwakuti akonzolole itenti lyane nanti ukulikatusya.
21 Pano ya kacema iyacita ivya uwelewele,Nupya yatuzizye Yeova.
Ali mulandu uno yatacitiile ivintu na mano,Ni viteekwa vyao vyonsi ivisalangana.”
22 Uvwini ilyasi lii!
Kuli congo icikalamba ica cimvulunganya ukufuma uku mpanga ya ku katutu,Icilalenga ukuti misumba ya mu Yuda isyale umwaula antu, isyale umwa kwikala ya nkusa.
23 We Yeova, manyile ningo ukuti umuntu atanga aitungulule umwineco.
Ataakwata maka ya kuitungulula.
24 Ndungike we Yeova nga walola icilinga,Lelo utacita vivyo umu ukali pakuti utangonona.
25 Leta ukali wako pa nko izyakusuulaNa pa ndupwa izisiama api zina lyako.
Pano yazanza Yakobo,Ee yamuzanza umupiipi sile na kuti yamulovye,Nupya yasya impanga yakwe umwaula icili consi.
Mafutunoti
^ Vesi 11 yalembiilwe umu Cialamaiki.
