Yelemiya 11:1-23
11 Yaa ali mazwi yano Yeova wanenyile Yelemiya, aakuti:
2 “Mwe yantu uvwini mazwi ya mu upangano!
“Ulande* uku yantu ya mu Yuda na aikazi ya mu Yelusalemu
3 uyanene uti, ‘Yeova Leza wakwe Izlaeli walanda wati: “Aye umutiipwe umuntu uwakana ukuvwila mazwi ya mu upangano,
4 yano nanenyile ivikolwe vinu pa wanda uno navifumizye umu mpanga ya Ijipti umwi lungu lya kwengulwilamo, aakuti, ‘Mwauvwa ukwi izwi lyane nu kucita ivintu vyonsi vino namunena; lyene mulaya antu yane nani ndaya Leza winu,
5 pakuti ince mfikilizye umulapo uno nalafile uku vikolwe vinu, ukuti ndavipeela impanga umwaya umukaka nu uci, wakwe vino cili ndakai.’”’”
Nani naswike inti: “Ameni,* we Yeova.”
6 Lyene Yeova wanenyile ati: “Kamanyisye mazwi yaa yonsi mu misumba ya mu Yuda nu mu miseo ya mu Yelusalemu uti: ‘Uvwini mazwi ya upangano nu kulacita vino muvwa.
7 Pa wanda uno nafumizye ivikolwe vinu umu mpanga ya Ijipti navinenyile inti: “Mwauvwila mazwi yane,” nupya natwalilila ukulanda ukufika na ndakai.
8 Lelo yataakutike nanti ukwikako mano; cila muntu watwalilile sile ukucita iviipe ivyali umu mwenzo wakwe. Fwandi nalenzile ukuti vyonsi ivyali umu upangano viyacitikile, pano yataacisile vino nayanenyile.’”
9 Lyene Yeova wanenyile ati: “Icizanwa ukuti antu ya mu Yuda na amu Yelusalemu iyapangana ukuti yampondokele.
10 Nayo kwene iyatandika ukucita iviipe vino ivikolwe vyao vyacitanga ivituvwilile mazwi yane. Iyalondela ya leza yauze nupya ya kuyaombela. Amu ng’anda yakwe Izlaeli na amu ng’anda yakwe Yuda iyatama upangano uno napangine ni vikolwe vyao.
11 Acino Yeova walanda wati, ‘Nkuleta intazi pali aliyo iilayapoosya ukuutuka. Nga yalenga uwazwilizyo kuli nene ntalayuvwa.
12 Lyene antu ya mu misumba ya mu Yuda na amu Yelusalemu yalaya umu kulenga uwazwilizyo kuli ya leza yano yakapeela malambo, lelo ya leza yayo yatalayapususya lino yalakwata intazi.
13 We Yuda, ya leza yako yavula wa misumba yako nupya wapanga maulambo aakupeelelapo malambo kuli Baali leza umuwelewele; maulambo yayo yavula wa miseo ya mu Yelusalemu.’
14 Lelo wemo,* utapepela antu yaa. Utalila nanti ukupepa pa mulandu na aliyo, pano ntaluvwa lino yalalenga uwazwilizyo kuli nene pa mulandu ni ntazi iilayaponela.
15 Uzye antu yane iyakwata insambu izya kuya umu ng’anda yaneLino aingi pali aliyo yakucita iviipe?
Uzye umwili wa muzilo* ungalenga intazi itayaponela?
Uzye yalasansamuka lino intazi iliza?
16 Yeova wakwamilepo ukuti umuolivi uvunde,Usuma nupya uwakweti ivizao ivisuma.
Lelo kwali iciunda icikalamba, nupya wakoosile umu moto,Nupya alwani yaputozile imisambo yako.
17 “We Yuda, Yeova wa maumba uwakulemiike, watalanda ukuti intazi ilakuponela kumwi na Izlaeli pa mulandu ni viipe vino mwacisile lino mwansosizye ukupitila umu kupeela malambo kuli Baali.”
18 We Yeova wanenyile pakuti imanye;Pa nsita iiya walenzile indole vino yaacitanga.
19 Nali wa kana ka mfwele akafuuke kano yakuya umu kukoma.
Ntamanyile ukuti yakupanga ukuncitila iviipe ala yakuti:
“Lekini tonone icimuti kumwi ni viseekwa,Nupya lekini tumukome,Pakuti kutaca kuye uwa kwiusya izina lyakwe nupya.”
20 Lelo we Yeova wa maumba ukapingula umu ulungami;Ukaceeceta umu melenganyo nu mu mwenzo.
Leka indole vino umalandula pali aliyo,Pano indeta umulandu wane kuli wewe.
21 Fwandi Yeova walanda pa yantu ya mu Anatoti aakulonda ukukukoma nupya aakulanda yakuti: “Ute ukusesemela umwi zina lyakwe Yeova, pano nga cisi vivyo tumakukoma”;
22 Yeova wa maumba wati: “Ndayapingula, aonsi yalafwa uku lupanga. Ana yao aonsi na anaci yalafwa uku cipowe.
23 Kusi nanti aumwi aalasyala pano ndaleta intazi pa yantu ya mu Anatoti umu mwaka uno ndayapingula.”
Mafutunoti
^ Afwile akulanda kuli Yelemiya.
^ Nanti “kaciye vivyo kwene.”
^ Kuli kuti Yelemiya.
^ Kuli kuti malambo aakapeelwa api tempele.
