Yelemiya 12:1-17
12 We Yeova wewe mulungami, nga nailizyanya kuli wewe,Nanti sile alino nkulanda pali vino ukapingula ukaya nu mulinganya.
Nomba u mulandu ci uno ivintu vikazipila ya kacita ya viipe,Nupya u mulandu ci uno acenjezi yasisakamikilwa?
2 Wayalemike nupya yatamba imisisi.
Iyakula nupya yakuseeka ni vizao.
Yakakulumbula sile apa kanwa, lelo melenganyo yao yaya ukutali sana naawe.
3 Lelo wemo wamanya ningo we Yeova, ukandola;Ukaceeceta umwenzo wane nupya wamanya ukuti naipeela kuli wewe.
Yapaatule wa mfwele ikuya umu kukomwa,Nupya uyike yonga ukufikila uwanda uno yalakomwa.
4 Uzye impanga ni vimelwaVilatwalilila ukuya ivyume ukufika lilaci?
Pa mulandu ni viipe vino antu aakaikalamo yakacita,Inyama ni vyunyi vyalowa.
Pano yakalanda yakuti: “Asilola ivilatucitikila.”
5 Ndi cakuti watonta lino ukusimula na antu,Uzye ungasimwila pamwi ni mfwalasi?
Ukuyuvwa umucingililwe umu mpanga ya mutende,Nomba cilaya uli lino ulaya umu misitu ya mu Yodani?
6 Nanti sile aina yako, amu ng’anda yakwe tata wako,Yaakucitila ivya ucenjezi.
Yaakutiipwila,
UtayatailaNanti icakuti yalanda ivisuma kuli wewe.
7 Nalekelezya ing’anda yane; naasya ica upyanyi cane.
Napeela umutemwikwa wane uku yalwani yakwe.
8 Antu yane, kuli kuti ica upyanyi cane, iyaya wakwe cisama aali umu mpanga.
Iyang’anzila.
Fwandi injapata.
9 Ica upyanyi cane caya kuli nene wa cunyi icikalipisye ica maala maala;Ivyunyi vyuze ivikalipisye vikacizinguluka nu kucizanza.
Izini, kolonganini mwe vilyanyi vyonsi ivya mu mpanga,Izini umu kulya.
10 Ya kacema aingi iyonona icalo cane ica myangazi;Iyalyatola impanga yane.
Iyalenga impanga yane ino natemwa ukusyala ulwanga.
11 Yatisyala icitotela.
Yatiyuma;Yatisyala umwaula nanti acimwi.
Impanga yonsi yatisyala sile,Lelo kusi nu wakuti aikeko amano.
12 Mu miseo yonsi iyononeke iya mu lwanga imwiza aononyi,Pano ulupanga lwakwe Yeova lukukoma antu yonsi amu mpanga.
Kusi ali wensi aali nu mutende.
13 Yalimile ingaano, lelo iyazombola imyunga.
Yaombesyanga, lelo yaicuzyanga sile.
Yaluvwa insonyi pali vino yalazombolaPa mulandu nu ukali uwipisye wakwe Yeova.”
14 Yeova walanda wati: “Ainamupalamano yane yonsi aipe aakulema uku ca upyanyi cino nalenzile antu yane Aina Izlaeli ukukwata, ndayafumya umu mpanga yao, nupya ndafumya na amu ng’anda yakwe Yuda muli aliyo.
15 Lelo pa cisila cakuti nayafumyamo, nupya kwene ndayuvwila uluse nu kuswilizya cila muntu uku ca upyanyi cakwe nu ku musonso wakwe.”
16 Ndi cakuti yasambilila vino antu yane yakacita nu kulapila umwi zina lyakwe Yeova wakwe vino yasambilizye antu yane ukulapila umwi zina lyakwe Baali lyene yalapeelwa impanga umu yantu yane.
17 Lelo nga yakana ukuvwa ndayafumya umu mpanga nu kuyonona,” avino ne Yeova nalanda.
