Yelemiya 14:1-22
14 Vii avino Yeova wanenyile Yelemiya ukulozya uku cilala:
2 Yuda akuloosya ni mpongolo zyakwe zyononeka.
Zyawa nupya zili nu ulanda,Ukulila kukuvwika ukufuma umu Yelusalemu.
3 Asambazi yakatuma aomvi yao umu kutapa manzi.
Nayo yakazana umu vifula musi amanzi.
Yakaswilila ni viya ivyaulamo manzi.
Yakauvwa insonyi nu uyi,Nupya yakavimba uku mitwe yao.
4 Vino impanga yalangoka pa mulandu wakuti imvula isitoonya,Alimi yaya nu ulanda,Nupya yakavimba uku mitwe.
5 Na mpombo kwene akasya akana kakwe umu mpangaPa mulandu wakuti musi isote.
6 Ya punda ya mu mpanga yakaimilila pa tumyamba apasi cili consi.
Yakaasela wakwe ya nkusa;Manso yao yakatonta muno yakulonda umulemvwe, lelo yasiuzana.
7 We Yeova citapo cimwi pa mulandu wi zina lyako,Nanti cakuti imembu zitu zikatusinila ukuti sweswe ya mulandu.
Pano vino twaluvyanya ivingi,Nupya twayembukila wewe.
8 Wemuno Izlaeli wataila, nupya wemuno ukamupususya lino ali ni ntazi,U mulandu ci uno uyelile wa mwenyi umu mpanga,Nupya wa muntu aali pa lwendo aakaimilila sile pakuti alaale?
9 U mulandu ci uno uyelile wa muntu uwatapeziwa mano,Wa muntu wa maka aatanga apususye antu yakwe?
Waya muli sweswe, we Yeova,Nupya tukaamilwa ukwi zina lyako.
Utatulekelezya.
10 Yeova walanda pa yantu yaa wati: “Yatemwa ukululumba; yasilonda ukwikalana. Ali mulandu uno ne Yeova nsizangila muli aliyo. Ndiusya vino yaluvyanya nu kuyapingula pa membu zyao.”
11 Lyene Yeova wanenyile ati: “Utapepa ukuti vintu vizipile antu yaa.
12 Nga yafunga, nsiuvwa kuli vino yakupaapata, nupya nga yapeela malambo ya koca nu upe wa vyakulya, nsivipokelela, pano ndayalovya ukuomvya ulupanga, cipowe, ni cikuko.”
13 Lyene nalanzile inti: “Iyee mwe we Yeova Mwene wa Papelapela! Ya kasesema yakunena antu yaa yakuti, ‘Mutalalola ulupanga, ni cipowe citaliza pali mwemwe, lelo Leza alamupeela umutende wa cumi umu ncende yii.’”
14 Yeova nawe wanenyile ati: “Ya kasesema yakusesemela ivya ufi umwi zina lyane, ntayatuma nanti ukulanda nayo. Yakamunena ivilolwa ivya ufi nu kusoowela ivya sile sile nupya ivya ucenjezi ivyaya umu myenzo yao aali vino ya kasesema kuli mwemwe.
15 Fwandi ne Yeova nkulanda pali ya kasesema aakasesemela umwi zina lyane nanti cakuti ntayatuma, nupya aakati icipowe nu lupanga vitaliza umu mpanga yii, nkuti: ‘Yalaloviwa uku lupanga nu ku cipowe.
16 Na antu yano yakasesemako yalaya ivitumbi nupya vilasalangana umu miseo ya mu Yelusalemu pa mulandu ni cipowe nu lupanga, kutalaya nu wa kuviziika, kuli kuti vitumbi vyao, vya yaci yao, ana yao aonsi nanti akazyana, pano ndaleta uwononesi pali aliyo ukulingana na vino cifwile ukuya.’
17 “Uyanene uti,‘Nkanalukusya minsozi usiku nu musanya ukwaula ukuta,Pano antu yane iyaponelwa nu uzanzo uwipisye,Nupya ivilonda vyao iviipa sana.
18 Nga naya umu mpanga nu kulolekesya,Nkulola antu aakomwa uku lupanga!
Nupya nga ningila umu musumba,Nkulola indwala iziza pa mulandu ni cipowe!
Pano ya kasesema na ya simapepo yakululumba umu mpanga ino yatamanyile.’”
19 Uzye watukanilila Yuda nanti ukupata sana Zioni?
U mulandu ci uno watutufulwila icakuti kusi nu wakupoziwa?
Twenekelanga ukuti kulaya umutende, lelo kusi ivisuma ivyacitika,Twalolelanga ukupoziwa, lelo kwaya sile intete!
20 Ituzumila ukuti twacita iviipe we Yeova,Nu kuti ivikolwe vitu vyaluvyanya,Pano twakuyembukila.
21 Pa mulandu wi zina lyako utatukaana;Utasuula icilimba cako ica wene ica lulumbi.
Iusya upangano uno wapangine naswe nupya utautama.
22 Uzye ivilubi ivya sile sile ivya mu nko vingaleta imvula,Nanti uzye mayulu aineco sile yangalenga imvula ukutoonya?
Uzye asi wewe we Yeova Leza witu wemuno ungacita cico?
Twataila muli wewe,Pano wewe sile wacita ivintu vii vyonsi.
