Yelemiya 15:1-21
15 Lyene Yeova wanenyile ati: “Nanti cakuti Mose na Samweli yaimi umupiipi nani, ntanga nuvwile antu yaa uluse. Yazinge pa nkoleelo yane. Leka yaapita.
2 Nupya nga yakuzya yati, ‘I vyani ivilatucitikila?’ Uce uyanene uti, ‘Yeova walanda wati:
“Yamwi muli mwemwe yalafwa uku ndwala!
Yamwi uku lupanga!
Yamwi uku cipowe!
Yauze nayo yalasendwa umu uzya!”’
3 “‘Nupya ndaleta pali aliyo ivintu 4,’ avino Yeova walanda, ‘kuli kuti ulupanga ulwa kuyakomela, ya simbwa aakusenda ivitumbi vyao ni vyunyi vya mwi yulu alino ni vilyanyi vya mu mpanga ivyakulya nu konona ivilasyala.
4 Nupya ndalenga mawene yonsi amu nsi ukuya ni ntete pa mulandu na vino Manase mwana Hezekiya umwene wa mu Yuda wacisile umu Yelusalemu.
5 A weni aalaya ni cikuuku kuli wewe, we Yelusalemu?A weni aalakuvwila uluse?Nupya a weni aalakuzya pali vino uli?’
6 Yeova walanda wati, ‘Wampondokela’
‘Watwalilila ukumfutatila.
Ndakonzolola ikasa lyane nu kukonona.
Intonta muno nkukuvwila uluse.
7 Ndayela ukuomvya ica kwelelako pa mpongolo zya mu mpanga.
Ndayalenga ukufwilwa ana yao.
Ndonona antu yane,Pano yakana ukusenuka.
8 Ya mukamfwilwa yao yalavula ukucila umucanga wa muli yemba.
Ndaleta umononyi pali aliyo musanya pakasi, uwa konona ya nyina na ana yao.
Ndayalenga ukuya na masakamika ni ntete umu kupumikizya.
9 Umwanaci uwavyala ana 7 wasila maka;Akacula pa kufuuta.
Nanti cakuti ucili umusanya waya umu mfinzi,Waya ni nsonyi nupya akazewana.’
‘Nupya anono aalapusuka muli aliyoNdalenga ukuti alwani yayakome uku lupanga,’ avino Yeova walanda.
10 Mayo, kalanda kuli nene pano wamviile,Antu yonsi amu mpanga yakaapazyanya nu kulwa nani.
Ntakongwesya umwi nupya kusi uwankongwesya;Lelo yonsi kwene yakantiipwila.
11 Yeova walanda wati: “Ndakucitila ivisuma;Ndakwazwa lino ulakwata intaziLino alwani yalaleta intazi pali wewe.
12 Uzye kwaya ali wensi aangaputola icela,Icafumilila uku katutu nu kupandoola koopa?
13 Ivyuma vyako ndaleka ukuti vipokwe,Ntalavikazya, lelo ndacita vivyo pa mulandu ni membu zino wacita umu mpanga yako yonsi.
14 Ndavipeela uku yalwani yakoNayo yalavisenda uku mpanga ino utaamanya.
Pano ukali wane iulenga ukuti kuye umoto,Nupya ukumyoca.”
15 Wamanya ivikuncitikila, we Yeova,Njiusye nu kunsakamala.
Landula pa yantu aakuncuzya.
Utaleka imfwe pa mulandu wakuti usisoka zuwa.
Umanye ukuti nkuzewana pa mulandu wako.
16 Nazanyile mazwi yako, nu kuyalya;Nupya izile iyandenga ukuya ni nsansa nu luzango,Pano nasenda izina lyako we Yeova Leza wa maumba.
17 Nsiikala pamwi na antu ya mipulwe pakuti nasansamukila pamwi nayo.
Pa mulandu wakuti ukantungulula, nkaikala nenga,Wampeela mazwi ya ukali.
18 U mulandu ci uno ukali wane usisilila ni cilonda cane cisipolela?
Cikakana ukupola.
Uzye ukulonda uye kuli nene wa kafukoka ka manzi akasi ka cumiAkatanga katailwe?
19 Fwandi Yeova walanda wati:
“Ndi cakuti wawela kuli nene, nani ndakuwezya,Nupya ulimilila pa nkoleelo yane.
Ndi cakuti wapaatula icintu icicindame uku cintu ca sile sile,Ulaya uwa kundandilako.
Antu aliyo yaliza kuli wewe,Lelo wemo utalaya kuli aliyo.”
20 “Nimakulenga ukuya iciumba cakwe koopa icikome uku yantu yaa.
YalakulwisyaLelo yatalakucimvya,Pano indi naawe pakuti nkupususye nu kukupokolola,” avino Yeova walanda.
21 “Nupya ndakupokolola umu minwe ya yantu aipeNu kukupususya uku yantu aaya nu unkalwe.”
