Yelemiya 16:1-21
16 Nupya kwene Yeova wanenyile ati:
2 “Utaca utwale, nupya utaca ukwate ana aonsi na anaci umu mpanga yii.
3 Pano vii avino Yeova watalanda pa yana aonsi na anaci aalavyalilwa umu mpanga yii na pali ya nyina na ya isi aalayavyala, watalanda ati:
4 ‘Yalafwa uku ndwala, lelo kutalaya uwa kuyaloosya nanti ukuyaziika, yalaya umuvundo umu musili. Yalakomwa uku lupanga nu ku cipowe, nupya ivitumbi vyao vilaya ivyakulya vya vyunyi vya mwi yulu ni vilyanyi vya mu mpanga.’
5 Pano Yeova watalanda ati,‘Utaca uwingile umu ng’anda muno aakuloosya iyapangila umutebeto,Nupya utaca uloosye nanti ukuyateekezya.’
‘Pano imfumya umutende apa yantu yaa,Kumwi nu kutemwa kwane ukwa cumi nu luse,’ avino Yeova walanda.
6 Akalamba na anono yalafwa umu mpanga yii.
Yatalaziikwa,Nupya kusi aalayaloosya,Kutalaya nu wa kuicembola nanti ukupela ipala pa mulandu na aliyo.*
7 Nupya kusi aalapekanyizizya aakuloosya ivyakulya,Pa kuyateekezya pali vino iyafwilwa;Kusi na alayapeela kapu wakwe waini uwa kumwaPa kuyateekezya pali vino iyafwilwa ya isi nanti ya nyina.
8 Nupya utaca uwingile umu ng’anda ya mutebetoPakuti uwikale nu kuliila pamwi nayo nu kumwa.’
9 Pano Yeova wa maumba, Leza wakwe Izlaeli walanda wati, ‘Ndafumya icongo ca yantu aali nu luzango nupya aakusansamuka, ni izwi lyakwe siwinga na nawinga litaluvwikapo umu ncende yii umu manda yako, nupya ulalolako lino vikucitika.’
10 Lino ulanena antu yaa pali vii vyonsi, yalakuzya yati, ‘U mulandu ci uno Yeova akulandila pa kuleta intazi yii ikalamba pali sweswe? I vyani vino twaluvyanya nupya u luyembu ci luno twayembukila Yeova Leza witu?’
11 Uce uyanene uti: “Yeova walanda wati, ‘A pa mulandu wakuti vikolwe vinu vyampondokiile nupya vyatwalilile ukulondela ya leza yauze nu kuyaombela nu kuyafukamila. Lelo nemo yansiile nupya yatalondelanga masunde yane.
12 Nupya mwemo mwacita iviipe ukucila ivikolwe vinu, cila muntu watwalilila ukucita iviipe ivyaya umu mwenzo wakwe ukucila ukunguvwila.
13 Fwandi ndamufumya umu mpanga yii nu kumuvwintila uku mpanga ino mwemo ni vikolwe vinu mutamanya, nupya kuuku kwene akuno mulaaombela ya leza yauze umusanya nu usiku, pano ntalamuvwila uluse.’”
14 “Yeova walanda wati, ‘Lelo amanda yakwiza lino yatalaalanda iyati: “Nkulapa umwi zina lyakwe Yeova Leza wa umi uwafumizye Aina Izlaeli umu mpanga ya Ijipti!”
15 Lelo yalaalanda yakuti: “Nkulapa umwi zina lyakwe Yeova Leza wa umi uwafumizye Aina Izlaeli uku mpanga ya ku katutu nu ku mpanga zyonsi zino wayasalanganyizizyeko!” nupya ndayawezya uku mpanga yao ino napeezile ivikolwe vyao.’
16 ‘Ndaleta ya kavuwa aingi,’ avino Yeova walanda,‘Nayo yalayavuwa.
Pa cisila ndaleta ya kalunga ya nyama aingi,Nayo yalayalunga umu myamba yonsi nu mu tumyambaNu mu macele.
17 Pano nkalola vyonsi vino yakacita
Yatafisama kuli nene,Na vyonsi vino yakaluvyanya nkavilola.
18 Inkoleelo ndayafulula ukulingana na vino yakaluvyanya nu kulingana ni membu zyao,Pano yakowezya impanga yane ni vilubi vyao ivya winyi ivisifuutaNupya iyazuuzya ivintu vyao ivya winyi umu mpanga yane.’”
19 We Yeova, we maka yane nupya muno nkafisama,Muno nkautukila lino indi ni ntazi,Kuli wewe akuno antu amu nko zyonsi yaliza,Yalalanda yati: “Vikolwe vitu navyo kwene vyatandike ukupepa ivilubiVisuulwe nupya ivya sile sile ivitanga viyazwe.”
20 Uzye umuntu angaipangila ya leza?Ya leza yano angapanga yatanga yaye aacumi.
21 “Pa nsita iiya ndayasambilizya,Ndayalenga ukumanya maka yane nu ukulu wane,Nupya yalamanya ukuti nene Yeova.”
Mafutunoti
^ Intambi zya pa kuloosya zino Aina Izlaeli ya cipondoka yalondelanga.
