Yelemiya 17:1-27
17 “Imembu zyakwe Yuda zyalembwa na kakulembelako ka cela.
Zyalembwa umu myenzo yao nu ku mpembe zya maulambo yaoUkuomvya kakulembelako kakwe daimondi,
2 Ana yao nayo yakaiusya maulambo yao ni ncesi zyao izya kupepa*Ivyaya umupiipi ni miti iyembe pa tumyamba,
3 Na pa myamba iyaya ukutali ni misumba.
Ndalenga ukuti vintu vyako ni vyuma vyako visendwe,Kuli kuti ivintu ivyaya pa ncende zyako izya kupepelapo pa mulandu ni membu zino wacita umu mpanga yako.
4 Ulalekelako ica upyanyi cino nakupeezile.
Nupya ndaleka uwaombela alwani yako umu mpanga ino utamanya,Watuleka ukuti ukali wane uye wa moto.
Wakulaaka insita zyonsi.”
5 Yeova walanda wati:
“Watiipwa umuntu uwataila antunze,Uwataila umu maka ya yantu,Nupya uwaitalusya kuli Yeova.
6 Alaya wa muti uwaya onga umu lwanga.
Atalalola ivisuma.Lelo alikala umu mpanga iyumisye umu lwanga,Umu mpanga iya musilya muno ali wensi atanga aikale.
7 Wapaalwa uwataila Yeova,Nupya aakapaalila muli Yeova.
8 Alaya wa muti uno yalema umupiipi na manzi,Uukatwala imisisi umu luzi.
Atalamanya lino icikaye ciliza,Lelo amafwa yakwe yalaaya aleembe lyonsi.
Mu mwaka wa cilala atalasakamikwaNanti ukuta ukuseeka ivizao.
9 Umwenzo wa muntu waya sana nu ucenjezi ukucila icili consi nupya wiipa sana.*
A weni angaumanya?
10 Nene ne Yeova, nkalondelezya ivyaya umu mwenzo,Nu kuceeceta ivyaya umu melenganyo ya yantu,Pakuti mpeele cila muntu ukulingana na vino akacita,Kulingana ni milimo yakwe.
11 Umuntu aakalonka ivyuma umu ucenjeziWaya wa nkwale iikakolonganika mayai yano itaata,
Alavisya lino insita yakwe iya kufwa itatala yafika,Na pa kusyalikizya alaya umuwelewele.”
12 Cilimba ca wene ica lulumbi, icacindamikwa ukufuma pa kutandika,Aali ncende itu iya muzilo.
13 We Yeova, we upaalilo wakwe Izlaeli,Yonsi aakakupondokela yalazewana.
Aakakusangukila* yalononwa,Pano yapondokela Yeova intulo ya manzi ya umi.
14 Mpozye, we Yeova, nupya namapola.
Mpususye, nupya namapusuka,Pano nkalumbanya wewe.
15 Kuli yamwi aakunena yakuti:
“Uzye amazwi yakwe Yeova yali kwi?
Kayafikiliziwe!”
16 Lelo nemo nga kacema ntatiile ukukulondela,Nupya ntalondesyanga ukuti ucuzi wize.
Wamanya vyonsi vino nkalanda;Ukavyuvwa!
17 Utaleka inje ni ntete pa mulandu naawe.
Wewe ukampususya lino indi nu ucuzi.
18 Leka akancuzya yaye ni nsonyi,Lelo nemo utandenga ukuya ni nsonyi.
Leka yaye ni ntete,Lelo nemo utandenga ukuya ni ntete,
Leta ucuzi pali aliyo,Nupya uyonone nu kuyavungola.
19 Yeova wanenyile ati: “Yanga ukimilile pa mpongolo ya yantu pano ya mwene ya mu Yuda yakaingilila nu kufumila, na pa mpongolo zyonsi izya mu Yelusalemu.
20 Ukayanene uti, ‘Uvwini mazwi yakwe Yeova, mwe ya mwene ya mu Yuda, mwe yantu yonsi amu Yuda, na mwensi mwe ya mu Yelusalemu mwemuno mukaingilila pa mpongolo zii.
21 Yeova walanda wati: “Mwacenjela pakuti mutaasenda icili consi pa wanda wi Sabata nanti ukucingizya pa mpongolo zya mu Yelusalemu.
22 Mutalinzile ukufumya icili consi umu mang’anda inu pa wanda wi Sabata nupya mutalinzile ukuomba umulimo uuli onsi. Mwalola uwanda wi Sabata ukuti uwa muzilo wakwe vino nanenyile ivikolwe vinu.
23 Lelo yataakutiike nanti ukwikako mano nupya yakanyile ukuvwila nanti ukuzumila ukusundwa.”’”
24 Yeova walanda wati, “Lelo ndi cakuti mukunguvwila sana, nu kukanaingizya icili consi pa mpongolo zya musumba uu pa wanda wi Sabata, nu kulola uwanda wi Sabata ukuti uwa muzilo ukupitila umu kukanaomba icili consi,
25 ya mwene na ya cilolo aakaikala pa cilimba ca wene cakwe Devedi nayo kwene yalingilila pa mpongolo zya musumba uu ala iyakwela umwi celeta, na pa mfwalasi, kuli kuti yene pamwi na ya cilolo yao, aonsi ya mu Yuda, na antu ya mu Yelusalemu; nupya umusumba uu ulatwalilila ukwikalwamo amanda yonsi.
26 Nupya antu yalafuma umu misumba iya mu Yuda, ncende izyaya umupiipi na Yelusalemu, mu ncende yakwe Benjamini, ncende iya mu mikonko, incende iya myamba, nu ku Negebu,* yalaaleta malambo ya koca, ivya upe, upe wa vyakulya, vinunkile, na malambo ya kutaizya umu ng’anda yakwe Yeova.
27 “‘“Lelo ndi cakuti musikunguvwila ukupitila umu kukanalola uwanda wi Sabata ukuti uwa muzilo nupya mukusenda ivisendo nu kuvingizizya pa mpongolo zya mu Yelusalemu pa wanda wi Sabata, ndoca umusumba wa Yelusalemu ni mpungu izikome izya mu Yelusalemu zilapya nupya kusi aalazimya umoto uuwo.”’”
Mafutunoti
^ Lolini Ulondolozi wa Mazwi.
^ Nanti limwi, “Usipoziwa.”
^ Mu Ciebele: “Aakansangukila,” izwi lii lifwile ukulozya kuli Yeova.
^ Nanti “uku kaeya.”
