Yelemiya 18:1-23
18 Yeova wanenyile Yelemiya ati:
2 “Katuka nu kuya uku ng’anda yakwe nakamata, nupya akuno nimaya nkakunenele mazwi yane.”
3 Fwandi naile uku ng’anda yakwe nakamata, nupya nazanyile akupanga iciviya pa ca kupangilapo.
4 Lelo iciviya cino wapanganga cononekile umu minwe yakwe. Lyene wacipangulwile nu kupangamo cuze ukulingana na vino walondanga.
5 Lyene Yeova wanenyile ati:
6 “‘Mwe ya mu ng’anda yakwe Izlaeli, uzye nemo ntanga ncite kuli mwemwe wakwe vino nakamata wii wacisile?’ avino Yeova walanda. ‘Lolini! Wakwe viivi kwene vino ivu likaya umu minwe yakwe nakamata, avino namwe mwaya umu minwe yane mwe ya mu ng’anda yakwe Izlaeli.
7 Lyonsi lino nalanda pa kwipula, ukuwisya nu konona uluko nanti uwene,
8 lyene uluko lulo lwata ukucita iviiipe vino nalanzilepo, ala ntalaleta intazi ino nalondanga ukululetela.
9 Lelo lyonsi lino nalanda pa kukuula nu kulema uluko nanti uwene,
10 uluko lulo nalo lwatandika ukucita iviipe nu kukana ukuvwila amazwi yane, ale ntalalucitila ivisuma vino nalondanga ukulucitila.’
11 “Nena antu ya mu Yuda na amu Yelusalemu uti, ‘Yeova walanda wati: “Nkupekanya ukumuletela intazi nupya nkwelenganya pali vino ndamufulula. Tiini ukucita iviipe nupya musenuke muli vino mukacita.”’”
12 Lelo yatiile: “Tutanga twezye! Twakulacita vino tukwelenganya, nupya cila muntu wakulacita iviipe ivyaya umu mwenzo wakwe.”
13 Fwandi Yeova watalanda ati:
“Uzyini umu nko mweineco.
Uzye kuli uwatala uvwapo icintu cii?
Aina Izlaeli iyacita icintu cipisye.
14 Uzye usu wa mvula uwa ku Lebanoni ukasunguluka pa mawe asuluke?
Nanti uzye amanzi azuuke aakukonkoloka ukufuma ukutali yakakama?
15 Lelo antu yane yanjilila.
Pano yakapeela malambo* uku vintu vya sile sileNupya yakalenga antu kupumika umu nzila zyao, inzila zya mpiti,Nu kutandika ukupita umu tuzila tuze utusi utusuma nupya utwa viwina,
16 Pakuti yalenge impanga yao ukuya ica kusekaNupya ica kuzunguka manda pe.
Na wensi uwapita umupiipi ni mpanga iiyo alazunguka nu kukunta umutwe.
17 Wa muza wa ku ufumondaka, ndayapasa ale na alwani yao yakulolako.
Ndayafutatila umu wanda uno yalaya ni ntazi.”
18 Nupya yatiile: “Izini tulanzyanye vino tumacita kuli Yelemiya, pano ya simapepo itu yalaatusambilizya masunde na antu ya mano yalatwalilila ukutupanda mano nupya ya kasesema yalaatunena mazwi yakwe Leza. Lekini tulande iviipe kuli aliwe nupya tutuvwa vino akulanda.”
19 Kutika kuli nene we Yeova,Nupya uvwa kuli vino alwani yane yakulanda.
20 Uzye yalinzile ukucita iciipe kuli wino akucita icisuma?
Pano iimba iciwina pakuti yankome.
Iusya vino nimiliile pa nkoleelo yako nu kulanda ivisuma pali aliyo,Pakuti ukali wako utiza pali aliyo.
21 Leka icipowe cize pa yana yao,Nupya uleke yakomwe nu lupanga.
Leka aci yao yafwilwe ana yao nu kusyala ya mukamfwilwa.
Leka aonsi yao yafwe uku cikuko iciipisye,Na alumendo yakomwe nu lupanga umu ulwi.
22 Leka ukulila kuvwike umu mang’anda yaoLino waleta ivipondo pali aliyo umu kupumikizya.
Pano iimba iciwina pakuti yandemeNupya yanteya iviteyo pakuti indemye.
23 Lelo we Yeova,Wamanya mapange yao yonsi yano yakwata aakulonda ukunkoma.
Utasuulako sile pali vino yakaluvyanya,Nupya utafuuta imembu zyao.
Leka iviipe vice viyacitikileLino ulayafulula ala watusoka.
Mafutunoti
^ Nanti “malambo ya koca.”
