Yelemiya 19:1-15
19 Yeova walanzile ati: “Yanga kakale insembo kuli nakamata. Upite na antu yamwi aacindikwe alino na ya simapepo yamwi aacindikwe.
2 Nupya muye uku Mukonko Wakwe Mwana Hinomu pa Mpongolo Yakwe Nakamata. Kuuku kwene akuno ukalandile mazwi yano namakunena.
3 Ukalande uti, ‘Uvwini mazwi yakwe Yeova mwe ya mwene ya mu Yuda na mwe yantu ya mu Yelusalemu. Yeova wa maumba Leza wakwe Izlaeli walanda wati:
“‘“Nkuleta uwononesi pa ncende yii, na wensi aluvwa ivilacitika alazunguka.
4 Nkucita vivyo pa mulandu wakuti yampondokela nu kulenga ukuti cantalila ukumanya incende yii. Yakapeelelamo malambo kuli ya leza yauze yano yene ni vikolwe vyao na ya mwene ya mu Yuda yataamanyile, nupya yazuuzya uwazi wa yantu ya kaele umu ncende yii.
5 Yapanga incende izya kupepelapo Baali pakuti yapeelelapo ana yao nga malambo ya koca kuli Baali, icintu cino ntayanenyile nanti ukulandapo nupya cino ntaatazile inelenganya napo.”’”
6 Fwandi ne Yeova nalanda nati: “Manda yakwiza lino incende yii italaamwa ukuti Tofeti nanti Umukonko Wakwe Mwana Hinomu lelo ilaamwa ukuti Mukonko wa Kukomelamo.
7 Ndavulunganya mapange ya yantu ya mu Yuda na amu Yelusalemu umu ncende kwene yii, nupya ndalenga ukuti yakomwe nu lupanga uku yalwani yao. Ni vitumbi vyao vilaya ivyakulya vya vyunyi vya mwi yulu ni vya vilyanyi vya mu mpanga.
8 Ndalenga umusumba uu ukuya icintu ca kuseka nupya ica kuzunguka. Wensi uwapitila umupiipi nao alaaulolekesya nu kuzunguka pali vyonsi ivilaucitikila.
9 Nupya ndalenga ukuti yalya imili ya yana yao aonsi na akazyana, cila muntu alaalya umwili wa muze pa mulandu ni ntazi zino yalakwata lino yalazingulukwa na alwani yao aalalonda ukuyakoma.”
10 “Lyene ukatame insembo ale na aonsi yano umapita nayo yakulola,
11 nupya ukayanene uti, ‘Yeova wa maumba walanda wati: “Wakwe viivi kwene vino umuntu angatama iciviya cakwe nakamata icakuti citanga cizifiwepo nupya, avino ndacita uku yantu yaa nu ku musumba uu, nupya yalaziika ivitumbi umu Tofeti mpaka incende ya kuziikamo ice isile.”’
12 “Yeova walanda wati, ‘Vivyo kwene avino ndacita uku ncende yii nu ku yantu aakaikalamo, pakuti umusumba uu uce uye wakwe Tofeti.
13 Na mang’anda ya mu Yelusalemu na mang’anda yakwe ya mwene ya mu Yuda yalaya aakowele wa ncende kwene yii iya Tofeti, kuli kuti mang’anda yonsi yano yakapeelelapo malambo uku vintu vya mwi yulu vyonsi pa mapaala nu kupeelelapo upe wa vyakumwa kuli ya leza yauze.’”
14 Lino Yelemiya wawezile uku Tofeti kuno Yeova wamunenyile ukuya umu kusesema, wimilile pa musolo wa pa ng’anda yakwe Yeova nu kunena antu yonsi ati:
15 “Yeova wa maumba Leza wakwe Izlaeli walanda wati, ‘Nkuleta intazi zino nalanzilepo pa musumba uu na pa mizi yonsi iyayamo, pano antu yakomizye imyenzo nu kukana ukuvwila mazwi yane.’”
