Yelemiya 2:1-37
2 Yeova wanenyile ati:
2 “Yanga ukume imbila umu Yelusalemu uti, ‘Yeova walanda wati:
“Nkaiusya vino waipeelisye lino wali umwance,Kutemwa kuno wali nako lino nakutaisye,Na vino wandondiile umu lwanga,Umu mpanga iitaali ilimwe.
3 Izlaeli wali uwa muzilo kuli Yeova, kuli kuti ivizao vino watandikilepo ukuzombola.”’
‘Yonsi aezya ukumonona yayanga nu mulandu.
Yakwatanga intazi,’” avino Yeova walanda.
4 Uvwini amazwi yakwe Yeova mwe ya mu ng’anda yakwe Yakobo,Na mwe ndupwa zyonsi izya mu ng’anda yakwe Izlaeli.
5 Yeova walanda wati:
“Uzye ivikolwe vinu vyanzanyile nu mulandu ci,Pakuti yampondokeleNu kutandika ukupepa ivilubi ivya sile sile nu kuya aasile sile aineco?
6 Yatuzizyepo iyati, ‘Ali kwi YeovaUwatufumizye umu mpanga ya Ijipti,Uwatupisizye umu lwanga,Mu nyika nu mu viwina,Umu mpanga umutaali amanzi nu mu kanda,Umu mpanga umusipita ali wensiNupya umusiikala ali wensi?’
7 Lyene namuleesile umu mpanga ivunde,*Pakuti mulye ivizao ni vintu ivisuma ivyayamo.
Lelo mwizile nu kukowezya impanga yane;Nupya mwalenzile ica upyanyi cane ciye ica winyi.
8 Ya simapepo yatatazile yuzyepo yati, ‘Ali kwi Yeova?’
Aasambilizyanga masunde yatalondanga ukumanya,Ya kacema yampondokiile,Ya kasesema yasesemelanga umwi zina lyakwe Baali,Nupya yalondelanga ya leza atanga yayaazwe.
9 Fwandi Yeova walanda wati, ‘Ndamulwisya,‘Nupya ndwalwisya na aizikulu inu.’
10 ‘Lelo yangini uku vilila vya ku Kitimu mukalole.
Tumini yamwi kuli Kedali pakuti yakalolekesye;Yakalole ndi cakuti ca musango uu catala cacitikapo.
11 Uzye kwatala kwaya uluko ulwakauzyapo ya leza yao na ya leza yauze?
Lelo antu yane yene yakauzya ululumbi lwane ni vintu ivya sile sile.
12 Lolekesyini cii nu kuzunguka mwe mayulu;Zakazini pa mulandu ni ntete,’ avino Yeova walanda
13 ‘Pano antu yane iyacita ivintu viili iviipe:
Iyampondokela ne ntulo ya manzi ya umi,Nupya iyaifukwila* umwa kusungila manziUmutuluke umutanga mwikale manzi.’
14 ‘Uzye Izlaeli u muomvi nanti u muzya uwavyalilwa mu ng’anda ya musambazi wakwe?
Nga lyene u mulandu ci uno wasendelwa umu uzya?
15 Ya cisama yakumung’anzila;Yakung’anzisya.
Yalenga impanga yakwe ukononeka.
Misumba yakwe yapya icakuti kutaya nanti aumwi uwa kwikalamo.
16 Antu ya ku Nofu nu ku Tapenesi yakaliila pa mutwe wako nu kulenga ukuti uye ni ipala.
17 Uzye utailetela intazi yii we mwinecoPa kupondokela Yeova Leza wakoLino wakutungululanga umu nzila iya mpomvu?
18 Nomba lyene u mulandu ci uno ukulondela ukuya uku IjiptiPakuti ukamwe amanzi ya mu Syiholi?*
U mulandu ci uno ukulondela ukuya uku AsilyaPakuti ukamwe manzi ya mu Luzi?*
19 Ufwile ukusambilila uku viipe vino wacita,Nu kukalipilwa pa kukanaya na ucisinka.
Pakuti umanye ukuti mu kupondokela Yeova Leza wakoMukafuma ivintu iviipe sana;Wemo usintiina,’ avino Umwene wa Papelapela, Yeova wa maumba walanda.
20 ‘Naputozile iyoko lyakoNu kukuputolela maceni.
Lelo walanzile uti: “Ntakulakuombela,”
Nupya wasalalanga pa tumyamba tonsi ututaliAla ukucita uzelele.
21 Nakulemike wa mwangazi uyenzu usuma uwafumile uku mbezu izya mpomvu;Nomba u mulandu ci uno watuyela wa mwangazi uwa mu mpanga?’
22 ‘Nanti cakuti ungafulala ni vikisa na sopo umwingi,Imembu zyako zitalafuutika,’ avino Yeova Umwene wa Papelapela walanda.
23 Ungalanda uli uti, ‘Ntaikowezya.
Nsipepa ya Baali’?
Iusya vino wacisile umu mukonko.
Elenganya pali vino wacita.
Waya wa ngamila iya kaci iikapitisya,Iikasimula icisimule simule,
24 Wakwe punda wa mu mpanga uwa kaci uwayelezya ukwikala umu lwanga,Aakalonda uwa kalume.
Aaweni angamulesya lino akulondesya uwa kalume?
Ya punda ya kalume aakumulonda yasicula.
Pa nsita iiyo yakamuzana.
25 Utaapita ni ngazoNupya utaaleka ulusala ilukulema.
Lelo watiile. ‘Ntanga nezye!
Natemwa mpiti ya leza yauze,Nupya nimayalondelanga.’
26 Wakwe vino umupuupu akauvwa insonyi nga yamulema,Avino na amu ng’anda yakwe Izlaeli iyuvwa insonyi,Pamwi na ya mwene yao, ya cilolo yao,Ya simapepo yao na ya kasesema yao.
27 Yakanena icimuti iyati, ‘Wewe uli tata,’
Ni ciliwe iyati, ‘Wewe watuviile.’
Lelo nemo yamfutatila.
Lyene lino yalakwata intazi yalalanda yati,‘Katuka utupususye!’
28 Uzye ya leza yano waipangiile yali kwi?
Leka yakatuke pakuti yakupususye lino uli ni ntazi,Pano ya leza yako we Yuda iyavula sana wa misumba yako.
29 Yeova walanda wati, ‘U mulandu ci uno mukatwalilila ukundwisya?
U mulandu ci uno mwensi mwampondokela?’
30 Nezya ukufulula ana inu
Lelo yasiuvwila ukusunda.Mwakoma ya kasesema inu ukuomvya ulupanga lwinu kwene,Wakwe cisama aakupitana ala watasoka.
31 Mwe yantu yane elenganyini pa mazwi yakwe Yeova.
Uzye inja wa lwanga uku Ina IzlaeliNanti wa mpanga umuli akanda akipisye?
U mulandu ci uno antu yane iyalandila ukuti, ‘Tukapita ukwaula ica kutucinga,
Tutalatala tuwele kuli wewe nupya’?
32 Uzye nacisungu angilila iviyembelo vyakwe,Nawinga nawe ailile ica kucinga pa cisao?
Lelo antu yane yene yanjilila pa manda aingi.
33 We mwanaci we, ukaombesya pakuti uzane aonsi akuti yakutemwe!
Watandika nu kucita iviipe.
34 Vyakuzwala vyako vyakandana uwazi wa yantu ya kaele,Nanti cakuti ntaaweni kuno yakwingila umu ng’anda yako,Naweni uwazi uku vyakuzwala vyako vyonsi.
35 Lelo ukalanda uti, ‘Nene wa kaele.
Ukali wakwe Leza utanga wize pali nene.’
Fwandi nimaleta upinguzi pali wewePano ukati, ‘Ntayembuka.’
36 U mulandu ci uno ukalolela kwati vino ukacita vitaipa sana?
Uluvwa insonyi na pali Ijipti kwene,Wakwe vino uvwile kuli Asilya.
37 Pa mulandu kwene uu, ulaapita ala watuwika makasa pa mutwe,Pano Yeova watakana yano wataila;Yatalakwavwa.”
Mafutunoti
^ Nanti “mpanga umwali imiti ya vizao.”
^ Nanti “iyafukula,” limwi umu ciliwe.
^ Kuli kuti manzi afuma umu Luzi Lwa Naelo.
^ Kuli kuti Luzi Lwa Yufuleti.
