Yelemiya 22:1-30
22 Yeova walanda wati: “Yanga ukwi sano lya mwene wa ku Yuda, ukamunene mazwi yaa.
2 Ukamunene uti, ‘Uvwa mazwi yakwe Yeova, we mwene wa mu Yuda wemuno ukaikala pa cilimba ca wene cakwe Devedi, wemo pamwi na aomvi yako na antu yako aakaingila pa mpongolo zii.”
3 Yeova walanda wati: “Mwaya nu mulinganya nu ulungami. Mwapususya wino yakwiila. Mutaacuzya umwenyi nanti umwana wa nsiwa nanti mukamfwilwa. Nupya mutaazwisya uwazi uwa muntu wa kaele umu ncende yii.
4 Ndi cakuti mukulondela sana mazwi yaa, ya mwene aakaikala pa cilimba ca wene cakwe Devedi yalaaingilila pa mpongolo zi sano lii ala yakwezile umu maceleta na pa mfwalasi, yene pamwi na aomvi yao na antu yao.”’”
5 Yeova walanda nu kuti: “Lelo ndi cakuti mutaluvwila mazwi yaa, nkulapa ukuti ing’anda yii ilononwa.
6 “Yeova watalanda ukulozya ukwi sano lya mwene wa ku Yuda ati,‘Uli wakwe Gilyadi kuli nene,Wa papela ya mwamba wa Lebanoni.
Lelo ndakulenga ukuya ulwanga;Kusi umusumba wako nanti aonga uulikalwamo.
7 Nupya ndatuma aakukuzanza,Cila muntu aliza ni canzo cakwe.
Yalakoma imikedali ino watemwa sanaNu kuisumbila umu moto.
8 “‘Nupya antu ukufuma umu nko izingi yalaapita umupiipi nu musumba uu nu kulanda iyati: “U mulandu ci uno Yeova wacitila vii ku musumba uu ukalamba?”
9 Nupya yalalanda yati: “A pa mulandu wakuti yatama upangano wakwe Yeova Leza wao nu kufukamila ya leza yauze nu kuyaombela.”’
10 Mutaloosya pali wino watafwa,Nupya mutamuvwila ulanda.
Lelo loosyini sana pali wino aakusendwa umu uzya,Pano atalawela nupya umu kulola impanga ino wavyalilwemo.
11 “Pano vii avino Yeova walanda pali Syalumu* mwana Yosiya umwene wa ku Yuda aakateeka uwene uno isi alinzile ukuteeka nupya uwafuma umu ncende yii walanda wati: ‘Atalawelamo nupya.
12 Pano alafwila kuno yamutwala umu uzya, nupya atalalolapo impanga yii.’
13 Kalanda uku muntu aakukuula ing’anda ukwaula ulungamiNi miputule ya papela ukwaula umulinganya,Aakaleka umuze ukumuombela uwila,Ukwaula ukuti amulipile;
14 Aakalanda ati, ‘Ndaikuulila ing’anda ikuluIikweti imiputule ikalamba iya papela.
Ndikako na mawindoNu ku ciumba ndikako imikedali nu kupentako penti iyenzu.
15 Uzye ulatwalilila ukuteeka pa mulandu sile uwakuti wakuula isano nu kwikako imbao zya mikedali izingi?
Tata wako nawe kwene walyanga nu kumwa,Lelo wali nu mulinganya nu ulungami,Nupya ivintu vyamuzipiile.
16 Wene wavwangilangako wino yakutitikizya nu mupiina,Pakuti ivintu vimuzipile
Uzye vivyo kwene asi ali vino cikapiliula ukuumanya?’ avino Yeova walanda.
17 ‘Lelo wemo ukaelenganya sile pa nzila zino ungaponzezyamo yauze,Kuzwisya uwazi uwa kaele,Nu kucenjezya yauze nu kuyaliila.’
18 “Fwandi Yeova walanda ukulozya kuli Yeoyakimu mwana Yosiya umwene wa ku Yuda wati,‘Yatalamuloosya ala yakuti:
“Iyee wemuno wali kwati umwina witu! Iyee wemuno wali kwati akaci witu!”
Nupya yatalamuloosya ala yakuti:
“Iyee musambazi witu! Iyee mwene witu!”
19 Alaziikwa wakwe punda,Yalamukweta,Nu kuyamusumbila ukunzi ya mpongolo zya mu Yelusalemu.’
20 Yanga uku Lebanoni nu kuyaloosya,Punda sana umu Basyani,Punda ukufuma uku Abalimu,Pano yonsi aakutemwa sana iyononwa.
21 Nalanzile naawe lino wayuvwanga umucingililwe.
Lelo watiile ‘Ntaluvwa.’
Vikwene avino waya ukufuma uku wance,Usiuvwa mazwi yane.
22 Muza ulasenda ya kacema yako yonsi,Na aakutemwa sana yalasendwa umu uzya.
Yaluvwa insonyi nu kuzewana pa mulandu ni ntazi zyako zyonsi.
23 Mwemuno mwikala umu Lebanoni,Umu mpanga umwaya imikedali,Mulaloosya sana lino ukuwaika kulamwizila,Ukwaya wa kuwaika kwa mwanaci aali pa kupaapa!”
24 “Yeova Leza wa umi walanda wati, ‘We Koniya mwana Yeoyakimu umwene wa ku Yuda nkulapa ukuti nanti cakuti wali mbalaminwe ya kwi kasa lyane ilya kwi lunji, ningakuzuula!
25 Ndakupeela uku yantu aakalonda uku kukoma, yano ukatiina, kuli kuti uku mwene Nebukadineza wa ku Babiloni nu ku Ina Kalideya.
26 Nupya ndakusumbila uku mpanga yuze pamwi na mayo wako kuno utavyalilwe, nupya kuuku kwene akuno ulafwila.
27 Utalatala uswilile uku mpanga ino ukalondesya.
28 Uzye Koniya i mpoto isuulwe, nupya iitamike,Civiya cino umuntu ali wensi asilonda?
U mulandu ci uno wene na ya lupwa yakwe yalekeleziwaNu kusumbilwa uku mpanga ino yatamanyile?’
29 Mwe yantu ya mu nsi, mwe yantu ya mu nsi, mwe ya mu nsi, uvwini mazwi yakwe Yeova.
30 Yeova walanda wati:
‘Lembini muti umuntu wii ataakwata ana,Waya wa muntu aatalatala atungulukepo umu umi,Pano kusi uwa mu lupwa lwakweAalikala pa cilimba ca wene cakwe Devedi nu kuteeka umu Yuda nupya.’”
Mafutunoti
^ Akaamwa nu kuti Yehoahazi.
