Yelemiya 24:1-10
-
Myangazi isuma ni iipe (1-10)
24 Lyene Yeova wandanzile imise iili umwali masamvu iyaali pa nkoleelo yi tempele lyakwe Yeova, pa cisila cakuti Umwene Nebukadineza uwa ku Babiloni wasenda Yekoniya mwana Yeoyakimu umwene wa ku Yuda umu uzya, pamwi na ya cilolo ya mu Yuda, antu aamanyile ivya kupangapanga, na antu aapanganga ivintu ukuomvya ivyela; wayasenzile ukufuma uku Yelusalemu ayatwala uku Babiloni.
2 Mu muse onga mwali masamvu asuma sana wa masamvu aakutandikilapo ukuca, lelo umu muse uze, mwali masamvu aipe sana icakuti yatanga yaliiwe.
3 Lyene Yeova wanguzizye ati: “I vyani vino ukulola Yelemiya?” Nani naswike inti: “Nkulola masamvu asuma sana, alino na masamvu aipe sana aakuti yatanga yaliiwe.”
4 Lyene Yeova wanenyile ati:
5 “Ne Yeova Leza wakwe Izlaeli nalanda nati, ‘Antu ya mu Yuda aasendwa umu uzya yano nazinzile umu mpanga yii nu kuyatwala uku mpanga ya Ina Kalideya, yaya wa masamvu kwene yaa asuma, ndayalola ukuti asuma.
6 Ndaayasakamala pakuti ivintu vyayazipila, nupya ndayawezya umu mpanga kwene yii. Ndalenga ukuti vintu vyayapitila ningo nupya ntalayonona; ndayalemeka nupya ntalaipula.
7 Nupya ndayapeela umwenzo wa kulondesya ukumanya ukuti nene Yeova. Yalaya antu yane, nani ndaya Leza wao, pano yalawela kuli nene ni myenzo yao yonsi.”
8 Yeova walanda wati: “Ndaalola Umwene Zedekiya uwa ku Yuda wa masamvu aipe icakuti yatanga yaliiwe kumwi na ya cilolo yakwe, antu ya mu Yelusalemu asyala umu mpanga yii, na aakaikala umu mpanga ya Ijipti.
9 Ndalenga antu amu nko zyonsi izya pano nsi ukuya ni ntete lino yalalola intazi ino ndaleta pali aliyo, yalaayatumfya, yalaayalandapo lyonsi lino yakulanda pa ntazi, yalaayaseka, nu kuyatuka umu ncende zyonsi muno ndayasalanganyizizya.
10 Nupya ndaleta ulupanga pali aliyo, cipowe ni cikuko kufikila yace yalowe umu mpanga ino napeezile kuli aliyo nu ku vikolwe vyao.”
