Yelemiya 25:1-38
25 Yaa ali mazwi yano Yelemiya wapokelile ukulozya uku yantu yonsi amu Yuda umu mwaka uwalenga 4 uwa kuteeka kwakwe Yeoyakimu mwana Yosiya umwene wa ku Yuda; uwali umwaka wa kutandikilapo uwa kuteeka kwa Mwene Nebukadineza* uwa ku Babiloni.
2 Kasesema Yelemiya walanzile pa yantu yonsi amu Yuda na amu Yelusalemu ati:
3 “Kufuma umu mwaka uwalenga 13 uwa kuteeka kwakwe Yosiya mwana Amoni umwene wa ku Yuda kufika ndakai, kuli kuti pa myaka yii 23 Yeova akalanda nani, nani nkamunena vino akalanda lelo mukakana ukuvwa.
4 Yeova watumanga kuli mwemwe aomvi yakwe yonsi ya kasesema pa miku iingi, lelo mwakananga ukuvwa nanti ukukutika.
5 Yalandanga iyati, ‘Senukini nu kuta ukucita iviipe vino mukacita; lyene mulikala amanda iingi umu mpanga ino Yeova wamupeezile mpiti kumwi ni vikolwe vinu.
6 Mutaalondela ya leza yauze nupya mutaayaombela nu kuyafukamila, mutaansosya ukupitila umu kupanga ivilubi; pano nga cisi vivyo ndamufulula.’
7 “Yeova walanda wati, ‘Lelo mwakanyile ukuvwa kuli nene. Mwansosyanga ukupitila umu kupanga ivilubi nupya calenzile ukuti mufululwe.’
8 “Fwandi Yeova wa maumba walanda wati, ‘“Pa mulandu wakuti mwakanyile ukuvwa kuli nene,
9 namaama indupwa zyonsi izya ku katutu,” avino Yeova walanda, “nu Mwene Nebukadineza* uwa ku Babiloni umuomvi wane, nupya ndayaleta umu kulwisya impanga yii na antu aikalamo ni nko zyonsi izyayazinguluka. Ndayonona, nupya antu yauze yalauvwa intete nu kuzunguka pa vilayacitikila, nupya yalononwa amanda pe.
10 Ndalenga ukuti yataasansamuka nu kuzanga, nu kusansamuka kwakwe siwinga na nawinga kutaluvwika, ni congo ci iwe lya kusila citaluvwika, nupya uluswepo lwakwe lampi lutalaloleka.
11 Mpanga yii yonsi ilononwa na yonsi aalalola ivilacitika yaluvwa intete, nupya inko zii zilaombela umwene wa ku Babiloni pa myaka 70.”’
12 “Yeova walanda wati, ‘Lelo pa cisila ca myaka 70 ndafulula umwene wa ku Babiloni nu luko lwakwe pali vino yacita, nupya ndalenga impanga ya Ina Kalideya ukusyala umwaula cimwi amanda yonsi.
13 Ndafikilizya vyonsi vino nalanda pa mpanga yii, vyonsi ivyalembwa umwi buku lii vino Yelemiya wasesime pa nko zyonsi.
14 Pano inko izingi na ya mwene ya maka yalayalenga ukuya azya, nupya ndayafulula ukulingana ni vicitwa vyao ni vintu vino yapanga.’”
15 Yeova Leza wakwe Izlaeli wanenyile ati: “Tola kapu wii wakwe waini wa ukali aali umu minwe yane nupya uce uleke inko zyonsi zino nkukutumako zice zimwemo.
16 Nupya zilamwa nu kupempezyoka nu kucita ivintu wakwe ya cipena pa mulandu nu lupanga luno ndaleta pali aliyo.”
17 Fwandi natozile kapu uwali umu minwe yakwe Yeova nu kuleka inko zyonsi zino Yeova wantumileko ukumwamo,
18 natandikiile na Yelusalemu ni misumba ya mu Yuda, ya mwene ayamo na ya cilolo. Yamwilemo pano Leza walondanga ukuti yononwe. Antu yalaazunguka nupya yalaalanda pali aliyo lyonsi lino yakulanda pa muntu wino watiipwa pano yaluvwa intete pali vino vyayacitikiile, wakwe vino caya na ndakai;
19 lyene naile kuli Falao umwene wa ku Ijipti nu ku yaomvi yakwe, ya cilolo yakwe nu ku yantu yakwe yonsi,
20 nu ku yenyi yonsi aikalamo, kuli ya mwene yonsi amu mpanga ya Uzi; kuli ya mwene yonsi amu mpanga ya Ina Filisti, ku Asyikeloni, ku Gaza, ku Ekiloni na kuli yonsi asyala umu mpanga ya Asyidodi;
21 ku Edomu, ku Moabu nu ku Ina Amoni;
22 kuli ya mwene yonsi aku Tuli, ya mwene yonsi aku Sidoni na kuli ya mwene yonsi aapa cilila ca pali yemba;
23 ku Dedani, ku Tema, ku Buzi na kuli yonsi apela inyele umu mbali ya mitwe yao;
24 kuli ya mwene yonsi aku Alabya na kuli ya mwene yonsi aayantu afuma uku mpanga zyuze akaikala umu lwanga;
25 kuli ya mwene yonsi aku Zimuli, kuli ya mwene yonsi aku Elamu na kuli ya mwene yonsi aku Medya;
26 na kuli ya mwene yonsi aku katutu, kuli kuti umupiipi nu kutali, naile kuli yaa yonsi nu ku mawene yauze yonsi amu nsi; nupya umwene wa ku Syesyaki* aalasyalikizya ukumwamo.
27 “Nupya uce uyanene uti, ‘Yeova wa maumba Leza wakwe Izlaeli walanda wati: “Mwini nu kukoleka, muluke nu kupona pakuti mutakatuka pa mulandu nu lupanga luno nkuleta pali mwemwe.”’
28 Nupya nga yaca yakana ukutola kapu kuti yamwemo, uce uyanene uti, ‘Yeova wa maumba walanda wati: “Mulinzile ukumwamo!
29 Pano lolini! ndi cakuti nimatandikilapo ukuleta intazi apa musumba apaya izina lyane, uzye mwemo mungasyala sile ukwaula ukufululwa?”’
“Mutalasyala sile ukwaula ukufululwa, pano ndaleta ulupanga pa yantu yonsi amu nsi,’ avino Yeova wa maumba walanda.
30 “Nupya ulinzile ukuyasesemela mazwi yaa yonsi nu kuyanena uti,‘Yeova alang’anza wakwe cisama kufuma umupela,Nupya alalenga izwi lyakwe ukuvwika ukufuma umu ncende yakwe iya muzilo ino akaikalamo.
Alang’anzila sana incende yakwe.
Alapunda wa congo ca yantu aakufena waini,Aliimba ulwimbo lwa kucimvya pa yantu yonsi amu nsi.’
31 ‘Icongo ciluvwika umu nsi yonsi,Pano Yeova watapusana ni nko.
Alapingula antu yonsi.
Nupya alakoma ya kacita ya viipe uku lupanga,’ avino Yeova walanda.
32 Yeova wa maumba walanda wati:
‘Ucuzi ulasalangana umu nko zyonsi,Ni cimuza iciipisye cilafuma uku ncende zya kutali sana.
33 Nupya yano Yeova alakoma uwanda uuwa yalaya umu nsi yonsi. Kutalaya uwa kuyaloosya nanti uwa kuyakolonganika nanti ukuyaziika. Yalaya umuvundo wa mu musili.’
34 Loosyini mwe ya kacema, pundisyini!
Kunkulukini umu lukungu mwe mfwele izicindame.Pano insita inu iya kononwa nu kusalanganyiziwa yatifika,Nupya mulapona nu kuvungoka wa civiya ca mutengo!
35 Ya kacema yatakweti ukwa kuutukila,Kumwi ni mfwele izicindame!
36 Uvwini ukulila kwakwe ya kacemaNu kuloosya kwa mfwele izicindame,Pano Yeova akonona incende zyao izya mulemvwe.
37 Nupya umu ncende umwaya umutende musi ica umi icili consiPa mulandu nu ukali wakwe Yeova.
38 Watafuma umu ncende yakwe iya kufisamamo wakwe cisama umukalipisye,Pano antu yakutiina impanga yaoPa mulandu nu lupanga ulukalipisyeNa pa mulandu ni cipyu cakwe.”
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
^ Mu Ciebele: “Nebukadileza,” yii inzila yuze iya kulembelamo izina lii.
^ Lii lifwile i zina lyuze lyakwe Babeli (Babiloni).
