Yelemiya 27:1-22
27 Ku kutandika kwa kuteeka kwakwe Yeoyakimu mwana Yosiya umwene wa ku Yuda, Yelemiya wapokelile mazwi ukufuma kuli Yeova.
2 Lyene Yelemiya walanzile ati: “Yeova wanenyile ati, ‘Pyata imyando nupya upange iyoko nu kuzwala umu nsingo.
3 Lyene upeele antu atiiza uku Yelusalemu kuli Zedekiya umwene uwa ku Yuda, nayo yatwale uku mwene wa ku Edomu, uku mwene wa ku Moabu, uku mwene wa Ina Amoni, uku mwene wa ku Tuli nu ku mwene wa ku Sidoni.
4 Uyanene yakanene asambazi yao yati:
“‘“Yeova wa maumba Leza wakwe Izlaeli walanda wati, kanenini asambazi inu muti,
5 ‘Nene napanzile insi, antu, ni vinyama vyonsi ivyayamo uku maka yane aingi nu kwi kasa lyane ilikome.
6 Nupya lyene napeela impanga zii zyonsi kuli Nebukadineza umwene wa ku Babiloni umuomvi wane; namupeela kumwi ni vinyama vya mu mpanga.
7 Inko zyonsi zilaamuombela nu kuombela umwanakwe nu mwizikulu wakwe, kufikila lino uluko lwakwe lulasila, lino inko izingi na ya mwene ya maka yalamulenga ukuya umuzya wao.’
8 “‘Yeova walanda wati: “Ndi cakuti uluko ululi lonsi nanti uwene wakana ukuombela Umwene Nebukadineza uwa ku Babiloni nupya wakana nu kuzwala iyoko lyakwe, ndafulula uluko lulo ukuomvya ulupanga, cipowe ni cikuko, kufikila nayonona ukuomvya Nebukadineza.”
9 “‘Fwandi mutauvwa kuli ya kasesema inu, uku yantu aakasoowela ivya ku nkoleelo, aakalondolola iviloto, ya kacita ya vinjelengwe na aakacita ivya maleele aakumunena iyati: “Mutalaombela umwene wa ku Babiloni.”
10 Pano yakusesema ivya ufi kuli mwemwe, pakuti muce musendwe uku mpanga ya kutali, nupya ndamusalanganya namwe mulalowa.
11 “‘Yeova walanda wati: “Lelo antu ya mu luko aalazumila ukuzwala iyoko lya mwene uwa ku Babiloni nu kumuombela ndaleka ukuti yatwalilile ukwikala umu mpanga nu kuilima.”’”
12 Vikwene avino nanenyile na Zedekiya umwene wa ku Yuda, natiile: “Zwalini iyoko lya mwene wa ku Babiloni nu kulamuombela pamwi na antu yakwe, nupya mulatwalilila ukuya nu umi.
13 U mulandu ci uno wemo pamwi na antu yako mungafwila uku lupanga, ku cipowe nu ku cikuko, wakwe vino Yeova watalanda ukuti i vilacitikila uluko ulutalaombela umwene wa ku Babiloni?
14 Mutauvwa kuli ya kasesema aakumunena iyati, ‘Mutalaaombela umwene wa ku Babiloni,’ pano yakusesema ivya ufi kuli mwemwe.
15 “Yeova walanda wati, ‘Ntayatuma, lelo yakusesemela ivya ufi umwi zina lyane, na cico cilalenga ukuti imusalanganye nupya mulalowa, kuli kuti mwemwe kwene pamwi na ya kasesema aakusesema kuli mwemwe.’”
16 Nupya nanenyile ya simapepo na antu yaa yonsi inti: “Yeova walanda wati, ‘Mutaauvwila ya kasesema aakusesema kuli mwemwe iyati: “Iviya vya mu ng’anda yakwe Yeova yasya yaviwezye ukufuma uku Babiloni!” pano yakusesema ivya ufi kuli mwemwe.
17 Mutaauvwa kuli aliyo. Ombelangini umwene uwa ku Babiloni nupya mulatwalilila ukuya nu umi. U mulandu ci uno umusumba uu ungononelwa?
18 Lelo ndi cakuti aa kasesema nupya yakalanda amazwi yakwe Yeova, lekini yapaapate kuli Yeova wa maumba pakuti iviya ivyasyala umu ng’anda yakwe Yeova, mwi sano lya mwene uwa ku Yuda nu mu Yelusalemu vitaca visendwe uku Babiloni.’
19 “Pano vii avino Yeova wa maumba watalanda ukulozya uku ncesi, ukwi tanki, ivya kusendelako ivintu, nu ku viya ivyasyala umu musumba uu
20 vino Umwene Nebukadineza uwa ku Babiloni ataasenzile lino wasendanga Yekoniya mwana Yeoyakimu umwene wa mu Yuda umu uzya kufuma umu Yelusalemu ukuya uku Babiloni pamwi na antu yonsi aacindikwe amu Yuda nu mu Yelusalemu;
21 Yeova wa maumba Leza wakwe Izlaeli walanda ukulozya uku viya ivyasyala umu ng’anda yakwe Yeova, mwi sano lya mwene wa ku Yuda nu mu Yelusalemu wati:
22 ‘“Vilasendwa uku Babiloni, nupya vilatwalilila ukuya kuuku kwene ukufikila lino ndaviusya,” avino Yeova walanda. “Lyene ndaviwezya nu kwizavisunga umu ncende yii.”’”
