Yelemiya 28:1-17
-
Yelemiya na kasesema wa ufi Hananiya (1-17)
28 Mu mwaka kwene uuwa, uku kutandika kwa kuteeka kwakwe Zedekiya umwene wa ku Yuda, mu mwaka uwalenga 4, umu mwezi uwalenga 5, kasesema Hananiya mwana Azuli uwa ku Gibyoni wanenyile ala tuli umu ng’anda yakwe Yeova na ya simapepo na antu yonsi ati:
2 “Yeova wa maumba, Leza wakwe Izlaeli, walanda wati, ‘Ndavuna iyoko lya mwene wa ku Babiloni.
3 Mu myaka sile iili ndawezya iviya vyonsi ivya mu ng’anda yakwe Yeova umu ncende yii vino Umwene Nebukadineza uwa ku Babiloni wasenzile.’”
4 Nupya Yeova walanda wati: “Ndawezya Yekoniya mwana Yeoyakimu umwene wa ku Yuda umu ncende yii kumwi na Ayuda yonsi aasenzilwe umu uzya uku Babiloni, pano ndavuna iyoko lya mwene wa ku Babiloni.”
5 Lyene Yelemiya walanzile kuli Hananiya kasesema ala pali na ya simapepo na antu yonsi aimilile umu ng’anda yakwe Yeova.
6 Yelemiya kasesema walanzile ati: “Ameni! Si Yeova acite cii! Si Yeova afikilizye vino watusesema ukupitila umu kuwezya iviya vya mu ng’anda yakwe Yeova umu ncende yii na antu yonsi aasenzilwe umu uzya uku Babiloni!
7 Lelo uvwa mazwi yonsi yano nkukunena ale na antu yonsi yakuvwa.
8 Mpiti ya kasesema aakoleelile wewe nani, yasesemanga ukulozya uku mpanga izingi nu ku mawene, pa nkondo, intazi ni vikuko.
9 Ndi cakuti kasesema wasesema pa mutende nupya vino wasesema vyacitika, lyene camanyikwanga ukuti Yeova u watamutuma.”
10 Lyene Hananiya kasesema watozile iyoko ilyali umu nsingo yakwe Yelemiya nu kulivuna.
11 Lyene Hananiya walanzile ala na antu yonsi yakuvwako ati: “Yeova walanda wati, ‘Umu myaka sile iili vikwene avino ndavuna ni yoko lya Mwene Nebukadineza uwa ku Babiloni lino inko zyonsi zyazwala.’” Lyene Yelemiya wafumilepo nu kupita.
12 Pa cisila cakuti Hananiya kasesema wavuna iyoko lino Yelemiya wazwite, Yeova wanenyile Yelemiya ati:
13 “Yanga ukanene Hananiya uti, ‘Yeova walanda wati: “Watuvuna iyoko ilyapangilwa ni cimuti, lelo ulapangilapo ilya cela.”
14 Pano Yeova wa maumba, Leza wakwe Izlaeli, walanda wati: “Ndazwika antu amu nko zii zyonsi iyoko lya cela, pakuti yace yaombela Nebukadineza Umwene wa ku Babiloni, nupya yalinzile ukumuombela. Nanti sile ivinyama vya mu mpanga navyo kwene ndamupeela.”’”
15 Lyene kasesema Yelemiya wanenyile Hananiya kasesema ati: “Uvwa kuno Hananiya! Yeova asi aliwe wakutuma, lelo walenga antu yaa ukutaila ivya ufi.
16 Fwandi Yeova walanda wati, ‘Lola! Nkukufumya umu nsi. Umwaka kwene uu umafwa, pano ukukomelezya antu ukupondokela Yeova.’”
17 Fwandi Hananiya wafwile umu mwaka kwene uuwa, umu mwezi uwalenga 7.
