Yelemiya 29:1-32
29 Yaa ali mazwi aali muli kalata wino Yelemiya kasesema watumile ukufuma uku Yelusalemu ku yakalamba amu yantu aasenzilwe umu uzya, kuli ya simapepo, ya kasesema na antu yonsi yano Nebukadineza wasenzile umu uzya ukufuma uku Yelusalemu nu kuyatwala uku Babiloni.
2 Pa nsita iiyo ala Umwene Yekoniya, nyina wa mwene, aomvi ya kwi sano, ya cilolo ya mu Yuda na amu Yelusalemu, antu aamanyikisye ivya kupangapanga na aapanganga ivintu ukuomvya ivyela yafuma umu Yelusalemu.
3 Wapeezile kalata wiyo kuli Elasa mwana Syafani na Gemaliya mwana Hilikiya yano Umwene Zedekiya uwa ku Yuda watumile kuli Nebukadineza umwene wa ku Babiloni, mwali mazwi yakuti:
4 “Yeova wa maumba, Leza wakwe Izlaeli walanda uku yantu yonsi aasendwa umu uzya, yano walenga ukuti yasendwe ukufuma uku Yelusalemu ukuya uku Babiloni wati,
5 ‘Kuulini mang’anda nu kwikalamo. Limini ivyalo nu kulya ivizao.
6 Twalini anaci nu kukwata ana aonsi na akazyana; londelini ana inu aonsi anaci nupya twalizyini ana inu akazyana pakuti nayo kwene yakwate ana aonsi na akazyana. Vulini umu mpanga iiyo nupya mutaacepelako.
7 Mwaezya ukwikala umutende umu musumba uno namutwalamo umu uzya nupya mwaupepelako kuli Yeova, pano nga mwaya umutende namwe mulaya nu mutende.
8 Yeova wa maumba, Leza wakwe Izlaeli walanda wati: “Mutaleka ya kasesema na aakasowela ivya ku nkoleelo muli mwemwe yamuponzya, nupya mutauvwa uku viloto vino yakalota.
9 Pano ‘yakasesemela ivya ufi umwi zina lyane. Ntayatuma,’ avino Yeova walanda.”’”
10 “Yeova walanda wati: ‘Lino imyaka 70 ino mulasendwa umu uzya umu Babiloni ilakumana, ndamwiusya nupya ndafikilizya ulayo wane nu kumuswilizya uku ncende inu.’
11 “Yeova walanda wati: ‘Imanya amapange yano mukwatiile, mapange ya kumuletela umutende nu kumulenga ukutaila ukuti mulaya nu umi usuma uku nkoleelo, asi mapange ya kumuletela intazi.
12 Nupya mulangama nu kwiza kuli nene nu kupepa, nani ndakutika.’
13 “‘Mulandonda nu kunzana, pano mulandonda ni myenzo inu yonsi.
14 Nupya ndaleka kuti munzane,’ avino Yeova walanda. ‘Ndamuwezya ukufuma umu uzya nu kumukolonganika umu nko zyonsi nu mu ncende zino namusalanganyizizyemo,’ avino Yeova walanda. ‘Nupya ndamuwezya umu mpanga inu.’
15 “Lelo mukalanda imuti, ‘Yeova watusontela ya kasesema umu Babiloni.’
16 “Pano vii avino Yeova watalanda uku mwene uwikala pa cilimba ca wene cakwe Devedi nu ku yantu yonsi aakaikala umu musumba uu, kuli kuti aina inu aatasendwa umu uzya,
17 ‘Yeova wa maumba walanda wati: “Nkuyaletela ulupanga, cipowe ni cikuko, nupya ndayalenga ukuya wa masamvu aole sana icakuti yatanga yaliiwe.”’
18 “‘Ndayaletela ulupanga, icipowe ni cikuko, nupya ndalenga mawene yonsi amu nsi ukuya ni ntete pa mulandu ni vilayacitikila, nupya yalaayalandapo lino yakulanda pa muntu umutiipwe, nupya aalalolako yalapeziwa amano nu kuzunguka, nupya yalaayatumfya umu nko zyonsi zino ndayasalanganyizizyamo,
19 pano yatuuvwile amazwi yane yano nayanenanga cila nsita ukupitila muli ya kasesema aomvi yane,’ avino Yeova walanda.
“Yeova walanda wati: ‘Yakanyile ukuvwa.’
20 “Fwandi uvwini amazwi yakwe Yeova mwensi mweyano nalenga ukuti musendwe umu uzya ukufuma uku Yelusalemu ukuya uku Babiloni.
21 Vii avino ne Yeova wa maumba, Leza wakwe Izlaeli nalanda ukulozya kuli Ahabu mwana Kolaiya na Zedekiya mwana Maaseya aakusesemela ivya ufi umwi zina lyane nati, ‘Ndayapeela umu minwe yakwe Nebukadineza* umwene wa ku Babiloni, nawe alayakoma ale mukulola nako.
22 Ayuda yonsi aasendwa umu uzya uku Babiloni yalaalanda pa vilayacitikila ala yakutiipa, yalati: “Si Yeova acite kuli wewe wakwe Zedekiya na Ahabu yano umwene wa ku Babiloni osile umu moto!”
23 pano yacisile ica muzewanya umu Izlaeli, nupya yacitanga ucende na aci ya yauze nu kulandila ivya ufi umwi zina lyane vino ntaayanenyile.
“‘Ne Yeova nalanda nati: “Nene manyile nupya nene nte.”’”
24 “Uce unene Syemaya uwa ku Nehelamu uti,
25 ‘Yeova wa maumba, Leza wakwe Izlaeli walanda wati: “Pa mulandu wakuti watumiile makalata umwi zina lyako uku yantu yonsi amu Yelusalemu, kuli Zefaniya mwana Maaseya simapepo na kuli ya simapepo yonsi umwali mazwi yakuti,
26 ‘We Zefaniya, Yeova watakusonta ukuya simapepo ukupyana pali Yeoyada pakuti uwaangalila ing’anda yakwe Yeova, na pakuti uwalema umuntu wensi umuvulungane aakuicita wakwe kasesema nu kumwika mu makoli;
27 uzye lyene u mulandu ci uno utakalipila Yelemiya uwa ku Anatoti aakuicita wakwe kasesema muli mwemwe?
28 Pano watutumiile na mazwi uku Babiloni aakuti: ‘Mulikala umu uzya apa myaka iingi! Kuulini mang’anda nu kwikalamo. Limini ivyalo mulye ni vyakulya ivyayamo,—”’”’”
29 Lino Zefaniya simapepo wabelenzile kalata yii ale na Yelemiya akuvwa,
30 Yeova wanenyile Yelemiya ati:
31 “Tuma uku yantu yonsi aasendwa umu uzya amazwi aakuti, ‘Yeova walanda ukulozya kuli Syemaya uwa ku Nehelamu wati: “Pa mulandu wakuti Syemaya wasesime kuli mwemwe nanti cakuti ntaamutumile, nupya wezizye ukulenga kuti mutaile ivya ufi,
32 ne Yeova nalanda nati, ‘Ndafulula Syemaya uwa ku Nehelamu pamwi na amu lupwa lwakwe. Kusi ali wensi uwa mu yantu yakwe aalapusuka nupya atalalola ivisuma vino ndacitila antu yane,’ avino ne Yeova nalanda, ‘pano wakomelizye antu ukupondokela ne Yeova.’”’”
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
