Yelemiya 3:1-25
3 Antu yakauzya iyati: “Uzye umonsi nga wata umuci nawe waya watwalwa uku monsi muze, uzye angamuwezya nupya?”
Uzye impanga iiyo itakowile mpiti?
Yeova walanda wati: “Wacita uzelele na antu aingi,Uzye nupya ungawela kuli nene?”
2 “Katusya manso yako nu kulolekesya pa tumyamba.
Uzye aekwi kuno yataacisile naawe ucende?
Wikazile umu mbali ya miseo ala ukuyaloleela,Wa muntu aakapitana umu lwanga.
Watwalilile ukukowezya impangaUku uzelele wako nu ku viipe vino ukacita.
3 Ali mulandu kwene uno imvula isikutoonyezya,Nupya kusi imvula umu nsita ya cisiku.
Ukaloleka umupame wa muci aakacita uzelele,Usiuvwa insonyi.
4 Nomba lyene ukunena uti,‘Tata, wewe cuza wane ukufuma uku wance!’
5 Nupya ukalanda uti,‘Uzye umuntu angatwalilila ukusoka amanda pe?
Nanti ukutwalilila ukwiusya iviipe vino umwi wacita amanda pe?’Nomba watwalilila ukucita iviipe vyonsi vino ungakwanisya ukucita.”
6 Mu manda ya Mwene Yosiya, Yeova wanenyile ati: “‘Uzye watulola vino Izlaeli aataya ni cisinka akucita? Wataya pa myamba yonsi itali nu mwisika lya miti yonsi iyembe nu kucita uzelele.
7 Na pa cisila ca kucita ivintu vii vyonsi, natwalilile ukumunena ukuti awele kuli nene, lelo ataawezile; nupya Yuda watwalilile ukulolekesya vino kaci wakwe uwaya nu ucenjezi wacitanga.
8 Lino naweni vivyo, nazinzile Izlaeli ataali ni cisinka imupeela na kalata wa kumuteelapo pa mulandu nu ucende wakwe. Lelo Yuda kaci wakwe uwaya nu ucenjezi atuvwile intete; nawe kwene wayile acita uzelele.
9 Waweni kwati uzelele uno wacisile utipiisye, nupya watwalilile ukukowezya impanga nu kucita ucende ukupitila umu kupepa mawe ni miti.
10 Asi mulandu na vii vyonsi, Yuda kaci wakwe ataawezile kuli nene nu mwenzo onsi, kuwela kwakwe kutaali ukwa cumi,’ avino Yeova walanda.”
11 Lyene Yeova wanenyile ati: “Izlaeli aataya ni cisinka wataloleka ukuya umulungami ukucila Yuda uwaya nu ucenjezi.
12 Yanga uku katutu ukalande uti:
“‘“We Izlaeli we musangu wela kuli nene,” avino Yeova walanda.’ Yeova walanda nu kuti: “Ntalakulolekesya ukali ukali pano naya ni cisinka. Ntalatwalilila ukusoka amanda pe.
13 Umanye sile vino waluvyanya, pano wapondokela Yeova Leza wako. Watwalilile ukuya kuli ya leza yauze umwisika lya miti yonsi iyembe, lelo utuvwanga ukwi izwi lyane,” avino Yeova walanda.”
14 Yeova walanda wati: “Welini mwe yana ya cipondoka. Pano nene musambazi winu uwa cumi; nupya ndasoolola wenga ukufuma muli cila musumba na yaili ukufuma muli cila musumba nu kumitwala uku Zioni.
15 Ndamupeela ya kacema aalacita ukulonda kwane, nupya yalaamusambilizya ukuya na mano nu kwiluka.”
16 Yeova walanda wati: “Mulavula nu kusandana. Mutalaalandapo nupya pa mbokosi ya upangano yakwe Yeova! Mutalaelenganya pa mbokosi iiyo, ukuiusya nanti ukuiluuka, nupya mutalapanga yuze.
17 Pa nsita iiya mulaama Yelusalemu ukuti cilimba cakwe Yeova; nupya inko zyonsi zilakolongana uku Yelusalemu uku kucindika izina lyakwe Yeova, nupya mulata ukulondela imyenzo inu iikalonda ukucita iviipe.”
18 “Mu manda yaaya amu ng’anda yakwe Yuda na amu ng’anda yakwe Izlaeli yalaapitila pamwi, nupya yalafumilila uku katutu nu kuya uku mpanga ino napeezile ivikolwe vinu.
19 Nelenganyanga inti, ‘Namupeezile impanga isuma iyalinzile sile ukupeelwa uku yana, kuli kuti impanga isuma sana umu nko!’ Nupya nelenganyanga inti, mulaangama ukuti ‘Tata!’ nupya mutalata ukundondela.
20 ‘Wakwe vino umuci uwaya nu ucenjezi akapondokela iya, avino namwe mwe ya mu ng’anda yakwe Izlaeli mwampondokela,’ avino Yeova walanda.”
21 Pa tumyamba pakuvwika icongo,Kuli kuti ukuloosya nu kupaapata kwa Ina IzlaeliPano yanyonganya inzila yao;Yilila Yeova Leza wao.
22 “Welini kuli nene mwe yana ya cipondoka.
Ndamupozya, nupya mutalatwalilila ukumpondokela.”
Namwe mulalanda muti, “Asweswe! Twiza kuli wewe,Pano we Yeova, wewe uli Leza witu.
23 Icumi kwene twaiponzizye pa kupanga imitebeto kuli ya leza yauze pa tumyamba na pa myamba.
Mu cumi Yeova Leza witu ali Kapususya wakwe Izlaeli.
24 Lelo ukufuma uku wance witu, ya leza ya sile sile yalya ivintu vino ivikolwe vitu vyaculiile,Kuli kuti imfwele ni mbuzi ni ng’ombe,Ana yao aonsi na akazyana.
25 Lekini tulaale pansi pa mulandu ni nsonyi,Nu kucinga pa manso pa mulandu nu kuzewana,Pano swemo ni vikolwe vitu twayembukila Yeova Leza witu,Kufuma uku wance witu ukufika na ndakai,Nupya tusiuvwa ukwi izwi lyakwe Yeova Leza witu.
