Yelemiya 31:1-40
31 Yeova walanda wati: “Pa nsita iiya ndaya Leza uku ndupwa zyonsi zyakwe Izlaeli, nayo yalaya antu yane.”
2 Yeova walanda wati:
“Antu aapuswike uku lupanga yapaazilwe na Leza umu lwangaLino Izlaeli wayanga uku ncende yakwe iya kupuuzilako.”
3 Yeova walolekiile kuli nene ukufuma ukutali nu kulanda ati:
“Kutemwa kuno nakukwatila u kwa manda pe.
Pa mulandu nu kutemwa kwene kuu ukwa cumi icalenga ukuti nkupalamike kuli nene.
4 Ndamuwezya namwe mulapanga uluko nupya.
We nacisungu wa mu Izlaeli ulatola utungoma twako nupya kweneNu kuya umu kucina ala uli ni nsansa.
5 Nupya kwene mulalima ivyalo vya myangazi umu myamba ya mu Samaliya;Aalalima yalaipakizya ukulya ivizao vyao.
6 Kulaya uwanda lino alinzi ya mu myamba yakwe Efulemu yalapunda yati:
‘Katukini, twapiteni uku mwamba wa Zioni, kuli Yeova Leza witu.’”
7 Yeova walanda wati:
“Pundini ni nsansa kuli Yakobo.
Pundini ni nsansa pano imucila antu ya mu nko.
Manyisyini cii; lumbanyini Leza nu kulanda muti,‘We Yeova, pususya antu yako aasyalako umu Ina Izlaeli.’
8 Ndayawezya ukufuma uku mpanga ya ku katutu.
Ndayakolonganika ukufuma uku ncende zya mu nsi izyayela ukutali.
Pali aliyo palaya impafu na alemale,Anaci aali pa ukulu na ali pa kupaapa.
Yalaya aingi lino yalawela.
9 Yaliza ala yakuloosya.
Ndayatungulula ala yakupaapata kuti njuvwile uluse.
Ndayatwala uku nguzi zya manzi,Ala yakupita umu nzila isuma muno yatanga yapumike.
Pano nene isi wakwe Izlaeli, nupya Efulemu ali iyeli lyane.
10 Uvwini mazwi yakwe Yeova, mwe yantu ya mu nko,Nupya manyisyini uku yantu ya mu vilila ivyayela ukutali muti:
“Uwasalanginye Aina Izlaeli alayakolonganika.
Alaayasakamala wakwe vino kacema akasakamala imfwele zyakwe.
11 Pano Yeova alakulula amu lupwa lwakwe Yakobo,Alayapususya kuli wino wayacila maka.
12 Yaliza nu kupunda ni nsansa pa mwamba wa ZioniNupya yalasansamuka sana pa mulandu nu usuma wakwe Yeova,Pa ngaano, waini umupya na mafuta,Na pa twana twa mfwele ni mbuzi nu twa ng’ombe.
Yalaya wa calo icikontelelwe ningo,Nupya yatalatala yayepo nu ulanda.”
13 “Pa nsita iiya nacisungu alacina ni nsansa,Kumwi na aonsi na akote.
Mu cifulo ca kuloosya ndayalenga ukuya ni nsansa.
Ndayateekezya nu kuyalenga ukusansamuka mu cifulo ca kuya nu ulanda.
14 Ndapeela ya simapepo ivyakulya ivingi,Nupya antu yane yalikuta ivintu visuma ivingi vino ndayapeela,” avino ne Yeova nalanda.
15 “Yeova walanda wati:
‘Izwi likuvwika umu Lama, ilya kuloosya ni mpooma ikulu sana likuti:
Lakeli akuloosya ana yakwe.
Watakana ukuteekeziwa pa yana yakwe,Pano iyafwa.’”
16 Yeova walanda wati:
“‘Utaaloosya nupya utaalukusya aminsozi,Pano ulapokelela icilambu pali vino ukacita,’ avino Yeova walanda.
‘Ana yako yalawela ukufuma uku mpanga ya yalwani.’
17 Nupya Yeova walanda wati, ‘Ivisuma vilakucitikila uku nkoleelo,’
‘Ana yako yalawela umu mpanga yao.’”
18 “Inuvwa ukuloosya kwakwe Efulemu ukwakuti,‘Nali wa kana ka ng’ombe akatasambiliziwa,Lelo wansalapula, nani napokelela ukusalapulwa.
Mbwezye, nani ndawela,Pano wewe Yeova Leza wane.
19 Lino nawezile nalangulwike pali vino nacitanga;Nupya lino nilwike nuvwile ulanda.
Nuvwile insonyi nu kuzewana,Pa vintu vino nacisile uku wance.’”
20 “Uzye Efulemu asi umwana wino natemwa?
Pano lyonsi lino nkukalipila Efulemu nkamwiusya.
Ali mulandu uno nkamuluukila.
Nupya ndamuvwila uluse,” ali vino Yeova walanda.
21 “Ika ivimanyililo umu museo,Ika ivipampa.
Ika mano uku nzila, inzila ino ulinzile ukupitamo.
Wela, we nacisungu wa mu Izlaeli, wela umu misumba yako.
22 Ulatwalilila ukululumba ukufika lilaci, we mwana umwanaci ataaya ni cisinka?
Pano Yeova watapanga icintu icipya umu nsi:
Umwanaci aakulondesya umonsi.”
23 Yeova wa maumba, Leza wakwe Izlaeli, walanda wati: “Nupya kwene yalalanda mazwi yaa umu mpanga ya Yuda nu mu misumba iyayamo lino ndakolonganika antu aasendwa umu uzya, yalalanda yati: ‘Si Yeova akupaale, we ncende umwaya ulungami, we mwamba wa muzilo.’
24 Nupya u mulikala antu ya mu Yuda na amu misumba yonsi, alimi na aakacema iviteekwa.
25 Ndakomya umutonte nu kupeela maka kuli wino ali nu ulanda.”
26 Lyene nazyusile, nupya naipakizye ukulaala.
27 Yeova walanda wati: “Manda yakwiza, lino ndavuzya amu ng’anda yakwe Izlaeli na amu ng’anda yakwe Yuda, ndavuzya ni viteekwa vyao.”
28 “Nupya wakwe viivi kwene vino nisileko mano pakuti njipule, kuyawisya, kuyaongolola, kuyonona, nu kuyacitila iviipe, avino ndikako mano pakuti njakuule nu kuyalemeka,” avino Yeova walanda.
29 “Mu manda yaya yatalalandapo nupya iyati, ‘Vikolwe vitu vyaliile imyangazi ikantuke, lelo amino ya yana auvwile uwizila.’
30 Lelo cila muntu alafwa pa mulandu nu luyembu lwakwe. Uwalya imyangazi ikantuke aaluvwa uwizila.”
31 Yeova walanda wati: “Lolini! Manda yaliza lino ndapangana upangano upya na amu ng’anda yakwe Izlaeli alino na amu ng’anda yakwe Yuda.”
32 Nupya Yeova walanda wati: “Upangano uu utalaya wa upangano uno napangine ni vikolwe vyao pa wanda uno nayalemile ukwi kasa nu kuyafumya umu mpanga ya Ijipti, kuli kuti upangano uno yatamile nanti cakuti nali umusambazi wao uwa cumi.”
33 Yeova walanda wati: “Uu uli upangano uno ndapangana na amu ng’anda yakwe Izlaeli pa cisila ca manda yayo. Ndika masunde yane muli aliyo, nupya ndayalemba umu myenzo yao. Ndaya Leza wao, nayo yalaya antu yane.”
34 “Nupya kusi aalasambilizya umwinamupalamano wakwe nanti umwina wakwe ati, ‘Manya Yeova!’ pano yonsi kwene yalaamanya, kutandikila uku munono kufika pa mukalamba,” avino Yeova walanda. “Ndelela imembu zyao, nupya ntalaziusyapo.”
35 Vii avino Yeova walanda,Uwapanzile ilanzi kuti lyawala umusanya,Uwikako masunde aakatungulula umwezi ni ntanda kuti vyapeela uluswepo usiku,Aakasunkanya yemba nu kulenga maimbi aayamo ukupanga sana icongo,Wino izina lyakwe a Yeova wa maumba, wati:
36 “‘Ndi cakuti masunde yaa yaatiile ukuomba,’ avino Yeova walanda,‘Lyene uluko lwa yana yakwe Izlaeli lungasila.’”
37 Yeova walanda wati: “‘Ndi cakuti mayulu yangapimwa nu mufula wa nsi umanyikwe, lyene ale ningakana Aina Izlaeli yonsi pali vyonsi vino yacita,’ avino ne Yeova nalanda.”
38 Nupya Yeova walanda wati: “Lolini! Manda yakwiza lino yalakuulila Yeova umusumba ukufuma uku Lupungu Lwa Hananeli kufika uku Mpongolo ya pa Koona.
39 Nupya intambo ya kupimilako ilalungama uku mulundu wakwe Galebu, nu kukoneka ukuya uku Gowa.
40 Nu mukonko onsi umwaya ivitumbi ni itwi ni vyalo vyonsi ukufika nu ku Mukonko wa Kiduloni, ukufika nu ku koona ya Mpongolo ya Mfwalasi lwa ku uwondaka, vilaya ivya muzilo kuli Yeova. Utalatala ononwepo nupya.”
