Yelemiya 32:1-44
32 Yaa ali mazwi yano Yelemiya wapokeliile ukufuma kuli Yeova umu mwaka uwalenga 10 uwa kuteeka kwa Mwene Zedekiya uwa ku Yuda, kuli kuti umu mwaka uwalenga 18 uwa kuteeka kwa mwene Nebukadineza.*
2 Pa nsita iiya walanga asilika ya mwene uwa ku Babiloni yazinguluka Yelusalemu, nupya walanga Yelemiya kasesema wayalilwa umu cikuulwa icali pa Musolo wa Yalinzi api sano lya mwene uwa ku Yuda.
3 Pa mulandu wakuti Umwene Zedekiya uwa ku Yuda wamuyaliile nu kumunena ati, “U mulandu ci uno ukasesemela vii? Ukalanda uti, ‘Yeova walanda wati: “Ndapeela umusumba uu ku mwene wa ku Babiloni, nawe alaupoka,
4 nupya Umwene Zedekiya atalutuka ukufuma uku Ina Kalideya, pano alapeelwa uku mwene uwa ku Babiloni, nupya alalanda nawe ale yakulolana.”’
5 ‘Alasenda Zedekiya uku Babiloni, nawe alatwalilila ukuya kuuku kwene ukufikila lino ndapingula vino ndacita kuli aliwe,’ avino Yeova walanda. ‘Nanti cakuti mwatwalilila ukulwisya Ina Kalideya, mutalacimvya.’”
6 Yelemiya walanzile ati: “Yeova watalanda wati,
7 ‘Hanameli mwana Syalumu umwina wakwe tata wako aliza kuli wewe nu kulanda ati: “Kala impanga yane iya mu Anatoti pano wewe ukweti insambu zya kuikala cipya cipya.”’”
8 Hanameli wizile kuli nene umu Musolo wa Mulinzi, wakwe viivi kwene vino Yeova walanzile, nu kunena ati: “Kala impanga yane iya ku Anatoti mu mpanga yakwe Benjamini, pano ukweti insambu zya kuikala nu kwikalamo. Ukale impanga yii.” Lyene nilwike ukuti Yeova uwalenzile ukuti cintu cii cicitike.
9 Fwandi nakazile impanga iya ku Anatoti kuli Hanameli. Nupya namupimiile impiya, nazyo zyali masyekele* 7 ni mpiya 10 zyakwe siuva.
10 Lyene nalemvile vino twalanzyanyizye, inumapo insimbi, inama na ya kambone nu kupima impiya pa masikelo.
11 Lyene natozile ivyalembwa vino nalemvile, kuli kuti icalembwa icayazilwe ukulingana ni sunde ni citayazilwe,
12 lyene napeezile icalembwa kuli Baluki mwana Nelya mwana Maaseya ale na Hanameli akulolako, kumwi na ya kambone aasaine pa calembwa, na Ayuda yonsi aali pa Musolo wa Mulinzi.
13 Nanenyile Baluki ale nayo kwene apano yali, inti:
14 “Yeova wa maumba, Leza wakwe Izlaeli walanda wati, ‘Tola ivyalembwa vii, kuli kuti ciyalwe ni cisi ciyalwe, uvike umu nyungu pakuti vikalemo amanda aingi.’
15 Pano Yeova wa maumba, Leza wakwe Izlaeli, walanda wati, ‘Mang’anda, impanga ni vyalo vya myangazi vilakalwa nupya umu mpanga yii.’”
16 Pa cisila ca kupeela Baluki mwana Nelya ivyalembwa vino nakaliilepo impanga, napefile kuli Yeova inti:
17 “Iyee we Yeova Mwene wa Papelapela wapanzile mayulu ni nsi ukuomvya maka yako aingi ni kasa lyako ilya maka. Kusi icingakutalila,
18 wemuno ukalanga ukutemwa kwa cumi uku yantu masauzandi, lelo wemuno ukafulula ana pa membu zyakwe ya isi, we Leza wa cumi umukulu nupya uwa maka, wemuno wewe Yeova wa maumba umukulu nupya uwa maka.
19 Vino ukalonda ukucita i vikalamba, nupya ukacita ivintu vya maka, ukalola vyonsi vino antu yakacita pakuti upingule cila muntu ukulingana na vino akacita ni milimo yakwe.
20 Wacisile ivimanyililo ni vizungusyo mu mpanga iya Ijipti ivyamanyikwa ukufika na ndakai, fwandi walenzile izina lyako ukumanyikwa umu Izlaeli nu mu yantu aasyala, wakwe vino caya ukufika na ndakai.
21 Nupya wafumizye Aina Izlaeli antu yako umu mpanga iya Ijipti ukuomvya ivimanyililo, vizungusyo, ikasa lyako ilikome nupya ilya maka alino ni vintu vya kutiinya.
22 “Lino papisile insita wayapeezile impanga yii ino walafile ukupeela uku vikolwe vyao, kuli kuti impanga umwaya umukaka nu uci.
23 Nayo izile nu kwikalamo, lelo yataakuvwilile nanti ukulondela masunde yako. Yataacisile ivili vyonsi vino wayanenyile, fwandi walesile ukuti yakwate intazi zii zyonsi.
24 Aonsi iiza ni vyakuzanzila umusumba, nupya pa mulandu nu lupanga, cipowe, ni cikuko, umusumba ulononwa uku Ina Kalideya aakuulwisya; vyonsi vino walanzile ivicitika, wakwe vino ukulola.
25 Lelo we Yeova Mwene wa Papelapela watunena uti, ‘Kala impanga ukuomvya impiya, uwame na ya kambone’ nanti cakuti umusumba ulononwa uku Ina Kalideya.”
26 Lyene Yeova wanenyile Yelemiya ati:
27 “Nene Yeova Leza wa yantu yonsi. Uzye kwaya icingantalila?
28 Fwandi ne Yeova nalanda nati, ‘Nkupeela umusumba uu uku Ina Kalideya nu ku Mwene Nebukadineza* uwa ku Babiloni, nawe alaupoka.
29 Nupya Aina Kalideya aakulwisya umusumba uu yaliza nu kuoca kumwi na mang’anda aakwata mapaala pano antu yapeelelanga malambo kuli Baali nu kupeela upe wa vyakumwa kuli ya leza yauze pakuti yansosye.’
30 “‘Pano antu ya mu Izlaeli na amu Yuda yakacita sile ivya kunsosya ukufuma uku wance wao; antu ya mu Izlaeli yakansosya muli vino yakacita,’ avino Yeova walanda.
31 ‘Ukufuma pano umusumba uu wakuulilwe, antu ayamo yakansosya nu kundenga ukuya ni cipyu, pakuti njafumye uku cinso cane,
32 pa mulandu ni viipe vyonsi vino antu ya mu Izlaeli na amu Yuda yacita pakuti yansosye, kuli kuti yene, ya mwene yao, ya cilolo, ya simapepo, ya kasesema, antu ya mu Yuda na aikazi ya mu Yelusalemu.
33 Yatwalilile ukumfutatila, nanti cakuti nayasambilizya pa miku iingi, kusi ali wensi uwakutike pakuti apokelele ukusunda.
34 Nupya isile ivilubi vya winyi umu ng’anda umukacindikilwa izina lyane, pakuti yaikowezye.
35 Yapanga ni ncende izya kupepelapo Baali mu Mukonko Wakwe Mwana Hinomu,* pakuti yaocelapo ana yao aonsi na anaci pa kuyapeela kuli Moleki, cintu ica winyi cino ntatazile njanenepo nupya cino ntaatazile nelenganyapo ukuyanena ukucita, icali nu kulenga Yuda ukuyembuka.’
36 “Fwandi Yeova Leza wakwe Izlaeli walanda ukulozya uku musumba uu uno mukati ulononwa uku lupanga, uku cipowe, nu ku cikuko, nu kupeelwa uku mwene uwa ku Babiloni, walanda wati,
37 ‘Ndayakolonganika ukufuma umu mpanga zyonsi zino nayasalanganyizizyemo ala indi nu ukali ni cipyu nupya ala insoka sana, nupya ndayawezya umu ncende yii nu kuleka ukuti ikale umu mutende.
38 Yalaya antu yane, nani ndaya Leza wao.
39 Ndasenula imyenzo yao na vino yakacita pakuti yace yantiina lyonsi, na pakuti vintu vice viyazipile kumwi na ana yao.
40 Nupya ndapangana nayo upangano wa manda pe uwa kuti, ntalata ukuyacitila ivisuma; ndalenga nu ukuti yantiina, pakuti yataca yampondokele.
41 Ndazangila muli aliyo nu kuyacitila ivisuma, nupya ndalenga ukuti yatwalilile ukwikala umu mpanga yii nu mwenzo wane onsi nu umi wane onsi.’”
42 “Yeova walanda wati, ‘Wakwe viivi kwene vino naleesile intazi ikalamba pa yantu yaa yonsi, avino ndayacitila ni visuma vyonsi vino nkuyalaya.
43 Nupya imisonso ilakalwa nupya umu mpanga yii nanti cakuti mukulanda imuti: “I mpanga umutaaya umuntu ni nyama, nupya yapeelwa uku Ina Kalideya.”’”
44 ‘Yeova walanda wati: “Impanga zilakalwa ukuomvya impiya, ivyalembwa vya kukalilapo vilalembwa nu kuyalwa, vikwene ivilacitika umu mpanga yakwe Benjamini, mu ncende izyazinguluka Yelusalemu, mu misumba yakwe Yuda, mu misumba iyayela umu ncende iya myamba, mu misumba iyayela umu mikonko, nu mu misumba iya ku kaeya, pano ndawezya antu aasendwa umu uzya.”’
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
^ Syekele wenga angalingana na magilamu 11.4. Lolini Ivyeo na Vyuze pa B14.
^ Mu Ciebele: “Nebukadileza,” yii inzila yuze iya kulembelamo izina lii.
^ Lolini Ulondolozi wa Mazwi, “Gehena.”
