Yelemiya 33:1-26
33 Yelemiya wapokelile amazwi ukufuma kuli Yeova umuku wakwe ciili, ala acili wayalilwa umu cikuulwa icali pa Musolo wa Mulinzi aakuti:
2 “Vii avino Yeova uwaumvile insi, Yeova uwaipanzile nupya uwalesile kuti itwalilile ukuyako, wino izina lyakwe a Yeova walanda, wati,
3 ‘Ngame nani nimakwasuka nupya nimakunena ivintu ivikalamba ni nkama zino utamanya.’”
4 Pano vii avino Yeova Leza wakwe Izlaeli watalanda ukulozya uku mang’anda ya mu musumba uu na masano yakwe ya mwene ya mu Yuda yano yononyile pakuti yaicingilile uku vya kuzanzilako nu ku lupanga,
5 nu kulozya uku yantu aakwiza umu kulwisya Aina Kalideya na aalazuuzya ivitumbi umu ncende zii, kuli kuti ivitumbi vya yantu yano nakomile ala insoka nupya indi ni cipyu, yano iviipe vyao vyalenga ukuti imfise icinso cane uku musumba uu, walanda wati:
6 ‘Ndalenga ivintu vya mu musumba ukuya ningo nupya ndapozya antu aikalamo, ndayalenga ukuya sana nu mutende nu kumanya icumi.
7 Ndawezya antu ya mu Yuda na amu Izlaeli aasendwa umu uzya, nupya ndayalenga kuti yaye uluko wakwe vino nacisile pa kutandika.
8 Ndayasangulula uku membu zino yacisile, nupya ndelela imembu zyao nu kuluvyanya kuno yaluvyanyizye kuli nene.
9 Izina lya musumba uu lilalenga naya ni nsansa, nupya lilalenga ukuti nalumbanyiziwa nu kucindikwa uku nko zyonsi izya mu nsi iziluvwa pa visuma vyonsi vino nacitila antu yane. Nupya antu amu nko yaluvwa intete nu kuzakaza pa mulandu ni visuma vyonsi nu mutende vino ndaleta umu musumba uu.’”
10 “Yeova walanda wati: ‘Umu ncende yii ino mulaalanda ukuti mutaaya icili consi, umuntu nanti iciteekwa, umu misumba ya mu Yuda nu mu miseo ya mu Yelusalemu umwasyala ukwaula icili consi, umuntu nanti citeekwa, muluvwika nupya
11 icongo ca kusansamuka ni congo ca luzango, izwi lyakwe siwinga na lyakwe nawinga, na mazwi ya yantu aakuti: “Taizyini Yeova wa maumba pano Yeova umusuma; kutemwa kwakwe ukwa cumi kukaikalilila amanda pe.”
“Yalaleta ivya upe vya kutaizya umu ng’anda yakwe Yeova, pano ndawezya antu ya mu mpanga aasenzilwe umu uzya, nupya yalaya wakwe vino yaali pa kutandika,’ ali vino Yeova walanda.”
12 “Yeova wa maumba walanda wati: ‘Umu mpanga yii umutaaya icili consi, kuli kuti umuntu nanti iciteekwa, nu mu misumba yonsi iyayamo mulaya incende zya mulemvwe zino ya kacema yalacemelamo iviteekwa vyao.’
13 “‘Mu misumba ya mu ncende ya myamba, mu misumba ya mu mikonko, mu misumba ya ku kaeya, mu mpanga yakwe Benjamini, mu ncende izyazinguluka Yelusalemu, nu mu misumba ya mu Yuda, ya kacema yalaapendelamo iviteekwa vyao nupya kwene,’ avino Yeova walanda.”
14 “‘Yeova walanda wati: “Lolini! Manda yakwiza lino ndafikilizya ulayo uno nalavile amu ng’anda yakwe Izlaeli na amu ng’anda yakwe Yuda.
15 Mu manda yaaya, nupya pa nsita iiya ndalenga umu lupwa lwakwe Devedi mufume impyanyi ilungame, nupya ilalenga umu mpanga muye umulinganya nu ulungami.
16 Mu manda yayo, Yuda alapusuka na Yelusalemu alikala umutende. Nupya alaamwa izina lyakuti: “Yeova Ali Ulungami Witu.’”
17 “Yeova walanda wati: ‘Lyonsi umu lupwa lwakwe Devedi mulaaya uwa kwikala pa cilimba ca wene umu Izlaeli,
18 nupya muli ya simapepo Aina Levi mulaaya uwa kwimilila apa nkoleelo yane nu kupeela malambo ya koca, nu koca malambo ya vyakulya, alino nu kupeela malambo yauze.’”
19 Nupya kwene Yeova wanenyile Yelemiya ati:
20 “Yeova walanda wati: ‘Ndi cakuti mungatama upangano uno napangana nu musanya nu upangano uno napangana nu usiku, pakuti mulesye umusanya nu usiku ukuyako pa nsita ino vifwile ukuyako,
21 ale mungatama nu upangano uno napangana na Devedi umuomvi wane pakuti atakwata umwana uwa kwikala pa cilimba cakwe ica wene, nu upangano uno napangana na ya simapepo Aina Levi aomvi yane.
22 Wakwe viivi kwene vino intanda zya mwi yulu zitanga zipendwe nu mucanga wa muli yemba utanga upimwe, avino ndavuzya na ana yakwe Devedi umuomvi wane na Ina Levi aakambombela.’”
23 Nupya kwene Yeova wanenyile Yelemiya ati:
24 “Uzye watuuvwa vino antu yaa yakulanda iyati, ‘Yeova alakana indupwa ziili zino wasoolola’? Yakasaalula antu yane nupya yata ukuyalola wa luko.
25 “Yeova walanda wati: ‘Wakwe viivi kwene vino napangana upangano nu musanya nu usiku, na vino nikako masunde aakatungulula iyulu ni nsi,
26 ali vino ntalatala nkane amu lupwa lwakwe Yakobo na amu lupwa lwakwe Devedi umuomvi wane, nupya ndaasoolola ya kateeka ukufuma umu yana yakwe Devedi aalateeka amu lupwa lwakwe Abulahamu, lwakwe Isaki na lwakwe Yakobo. Pano ndakolonganika antu yao aasenzilwe umu uzya nupya ndayuvwila uluse.’”
