Yelemiya 34:1-22
34 Lino Umwene Nebukadineza* uwa ku Babiloni na asilika yakwe yonsi na mawene yonsi amu nsi yano watungululanga na antu yonsi yalwisyanga Yelusalemu ni misumba yonsi iyalimo, Yelemiya wapokelile mazwi ukufuma kuli Yeova aakuti:
2 “Yeova Leza wakwe Izlaeli walanda wati, ‘Yanga uku Mwene Zedekiya uwa mu Yuda ukamunene uti: “Yeova walanda wati, ‘Namapeela umusumba uu uku mwene wa ku Babiloni nawe alaoca umu moto.
3 Utalutuka pano ulalemwa nu kupeelwa kuli aliwe. Ulalolana nu mwene wa ku Babiloni nupya alalanda naawe ale mukulolana, ulaya uku Babiloni.
4 Lelo uvwa mazwi yakwe Yeova, we Mwene Zedekiya uwa ku Yuda, ‘Yeova walanda wati: “Utalafwa uku lupanga.
5 Ulafwa umu mutende, nupya yalakupangila umutebeto uwa koca ivinunkile wakwe vino yacisile uku vikolwe vyako, kuli kuti kuli ya mwene aakukoleliile, nupya yalakuloosya yati, ‘Iyee musambazi!’ vii vilacitika pano avino indanda ne Yeova.”’”’”
6 Lyene kasesema Yelemiya walanzile mazwi yaa yonsi uku Mwene Zedekiya uwa ku Yuda umu Yelusalemu,
7 lino asilika ya mwene wa ku Babiloni yalwisyanga Yelusalemu ni misumba yonsi iya mu Yuda iyasiileko, kuli kuti Lakisyi na Azeka, pano yali ali misumba sile iya malinga iyasiileko umu misumba ya mu Yuda.
8 Yaa ali mazwi yano Yelemiya wapokelile ukufuma kuli Yeova pa cisila cakuti Umwene Zedekiya wapangana na antu yonsi upangano umu Yelusalemu uwakuti yalekeleko aazya.
9 Yonsi kwene yaali nu kulekelako azya Aebele, aonsi na anaci, pakuti kutaaya uwa kusunga Umuyuda muze ngu muzya.
10 Fwandi ya cilolo yonsi na antu yonsi yuvwilile. Yapangine upangano uwakuti umuntu wensi alinzile ukulekelako umuzya wakwe umonsi nu mwanaci. Nupya atalinzile ukutwalilila ukuyasunga umu uzya. Yuvwilile nu kuyaleka.
11 Lelo pa cisila, yawezizye aonsi na anaci yano yalekileko nu kuyalenga ukuya azya nupya.
12 Fwandi Yelemiya wapokeliile mazwi yakwe Yeova ukufuma kuli Yeova aakuti:
13 “Yeova Leza wakwe Izlaeli walanda wati, ‘Napangine upangano ni vikolwe vinu mu wanda uno nayafumizye umu mpanga iya Ijipti, muno yaali azya, uwakuti:
14 “Pa mpela ya myaka 7, wensi muli mwemwe alinzile ukulekelako umwina wakwe Umuebele wino wakazile nupya uwamuombela pa myaka 6; mulinzile ukumulekelako.” Lelo ivikolwe vinu vituvwile nanti ukukutika kuli vino nalanzile.
15 Nupya patalengiile mwemo mwacisile icisuma ukupitila umu kulekelako azya inu nupya mwapangine upangano pa nkoleelo yane umu ng’anda iikaamilwa ukwi zina lyane.
16 Lelo mwapiliwike nu kusaalula izina lyane kupitila umu kuwezya azya inu aonsi na anaci yano mwalekileko pakuti yaye konsi kuno yakulonda, nupya mwayapatikizye ukuya azya nupya kwene.’
17 “Yeova walanda wati: ‘Mutaanguvwilile nupya mutaapezile aina inu untungwa. Fwandi ndamupeela untungwa,’ avino Yeova walanda, ‘mulakomwa uku lupanga, ku cikuko, nu ku cipowe, nupya mawene yonsi amu nsi yalaamuseka.
18 Nupya vii ivilacitikila antu aatamile upangano wane uno yapangine pa nkoleelo yane lino yaputwile kana ka ng’ombe paili nu kupita pakasi,
19 kuli kuti ya cilolo ya mu Yuda, ya cilolo ya mu Yelusalemu, aomvi ya kwi sano, ya simapepo, na antu yonsi amu mpanga aapisile pakasi ka viputulwa vya kana ka ng’ombe:
20 Ndayapeela uku yalwani yao nu ku yantu aakulonda ukuyakoma, ni vitumbi vyao vilaya ivyakulya vya vyunyi vya mwi yulu ni nyama zya mu mpanga.
21 Nupya ndapeela Umwene Zedekiya uwa ku Yuda na ya cilolo yakwe uku yalwani yao na kuli yano yakulonda ukuyakoma nu ku yasilika ya mwene uwa ku Babiloni atiyata ukumulwisya.’
22 “Yeova walanda wati: ‘Nimanena asilika ivya kucita nupya yamawela umu musumba uu, yamaulwisya nu kuupoka nu kuoca nupya imisumba ya mu Yuda ilasyala umwaula icili consi, ukwaula uwa kwikalamo.’”
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
