Yelemiya 35:1-19
-
Aina Lekabu yalangilila ukuti yaaya ni cuvwila (1-19)
35 Yelemiya wapokelile mazwi kuli Yeova umu manda yakwe Yeoyakimu mwana Yosiya umwene wa ku Yuda aakuti:
2 “Yanga uku lupwa lwa Ina Lekabu ukalande nayo nupya ukayalete umu ng’anda yakwe Yeova umu muputule wa kuliilamo; uyapeele waini pakuti yamwe.”
3 Fwandi nasenzile Yazaniya mwana Yelemiya mwana Habaziniya, aina yakwe, ana yakwe aonsi yonsi, na amu ng’anda ya Ina Lekabu yonsi
4 nu kuingizya umu ng’anda yakwe Yeova. Nayatwazile umu muputule wa kuliilamo wakwe ya mwana Hanani mwana Igidaliya umuntu wakwe Leza wa cumi uwali umupiipi nu muputule uno ya cilolo yaliilangamo uwali papela ya muputule wa kuliilamo wakwe Maaseya mwana Syalumu umulinzi wa pa mulyango.
5 Lyene nisile makapu yakwe waini pa nkoleelo ya Ina Lekabu nu kuyanena inti: “Mwini waini.”
6 Lelo yatiile: “Tutakumwa waini, pano Yeonadabu* mwana Lekabu icikolwe citu watunenyile ati, ‘Mwemo kumwi na ana inu mutalinzile ukumwa waini.
7 Nupya mutalinzile ukukuula mang’anda, kukomela imbezu, nanti ukulima ivyalo vya myangazi. Lelo mulinzile ukutwalilila ukwikala umu matenti pakuti muce mwikale manda aingi umu mpanga muno mukwikala wa yenyi.’
8 Fwandi tukauvwila vyonsi vino Yeonadabu mwana Lekabu icikolwe citu watunenyile ukuti tutalinzile ukumwa waini, kuli kuti sweswe kumwi na aci itu, na ana itu aonsi na anaci.
9 Nupya tusikuula mang’anda nanti ukukwata ivyalo vya myangazi nanti ivyalo vyuze nanti imbezu.
10 Twatwalilila ukwikala umu matenti nupya tukauvwila vyonsi vino Yeonadabu* icikolwe citu watunenyile.
11 Lelo lino Umwene Nebukadineza* uwa ku Babiloni wizile umu kulwisya impanga itu, twatiile, ‘Lekini tuye uku Yelusalemu pakuti tuutuke asilika Aina Kalideya na Ina Silya,’ nupya lyene tukwikala umu Yelusalemu.”
12 Nupya Yelemiya wapokelile mazwi kuli Yeova aakuti:
13 “Yeova wa maumba, Leza wakwe Izlaeli walanda wati, ‘Yanga ukanene antu ya mu Yuda na amu Yelusalemu uti: “Uzye ntamukomelezyanga ukulauvwila mazwi yane?” avino Yeova walanda.
14 “Yeonadabu mwana Lekabu wanenyile amu lupwa lwakwe ukuti yatalinzile ukumwa waini, nupya yasimwa waini ukufika na ndakai, fwandi yakauvwila vino icikolwe cao cayanenyile. Lelo nemo nalaanda namwe pa miku iingi, nomba musinguvwila.
15 Nupya natwalilila ukutuma aomvi yane ya kasesema yonsi kuli mwemwe pa miku iingi, ala nkuti, ‘Senukini nu kuta ukucita iviipe vino mukacita nupya mwacita ivisuma! Mutaaya kuli ya leza yauze nu kuyaombela. Lyene alino mulatwalilila ukwikala umu mpanga ino namupeezile kumwi ni vikolwe vinu.’ Lelo mutuuvwile kuli nene nanti ukukutika.
16 Amu lupwa lwakwe Yeonadabu mwana Lekabu yakacita vino icikolwe cao cayanenyile, lelo antu yaa yene yaakana ukuvwa kuli nene.”’”
17 “Fwandi Yeova Leza wa maumba, Leza wakwe Izlaeli walanda wati: ‘Ndaleta intazi zyonsi pa ya Yuda na pa yantu yonsi amu Yelusalemu zino nayanenyilepo, pano nalanzile nayo lelo yakanyile ukukutika, natwalilile ukuyama, lelo yatasukanga.’”
18 Nupya Yelemiya wanenyile amu lupwa lwa Ina Lekabu ati: “Yeova wa maumba, Leza wakwe Izlaeli walanda wati, ‘Pa mulandu wakuti mukauvwila Yeonadabu icikolwe cinu nupya mwatwalilila ukulondela vyonsi vino wamunenyile nu kucita vivyo kwene,
19 Yeova wa maumba, Leza wakwe Izlaeli walanda wati: “Lyonsi umu lupwa lwakwe Yeonadabu* mwana Lekabu mulaaya uwa kumbombela.”’”
Mafutunoti
^ Mu Ciebele: “Yonadabu” inzila iipi iya kulembelamo izina lyakuti Yeonadabu.
^ Mu Ciebele: “Yonadabu” inzila iipi iya kulembelamo izina lyakuti Yeonadabu.
^ Mu Ciebele: “Nebukadileza,” yii inzila yuze iya kulembelamo izina lii.
^ Mu Ciebele: “Yonadabu” inzila iipi iya kulembelamo izina lyakuti Yeonadabu.
