Yelemiya 36:1-32
36 Lyene umu mwaka uwalenga 4 uwa kuteeka kwakwe Yeoyakimu mwana Yosiya umwene uwa ku Yuda, Yeova wanenyile Yelemiya ati:
2 “Tola ulupapulo ulembemo mazwi yonsi yano nakunenyile ukulozya kuli Izlaeli na Yuda nu ku nko zyonsi, ukufuma pa wanda uno natandikilepo ukulanda naawe umu manda yakwe Yosiya ukufika na ndakai.
3 Pano limwi nga amu ng’anda yakwe Yuda yuvwa intazi zyonsi zino nkulonda ukuleta pali aliyo, yangasenuka nu kuta ukucita iviipe pakuti njelele pali vino yaluvyanya na pa membu zyao.”
4 Lyene Yelemiya wamile Baluki mwana Nelya nupya wamunenyile mazwi yonsi yano Yeova wamunenyile, nawe Baluki wayalemvile umu lupapulo.
5 Nupya Yelemiya wanenyile Baluki ati: “Ntazumiliziwa ukwingila umu ng’anda yakwe Yeova.
6 Fwandi wewe ulinzile ukuyaingila umu ng’anda yakwe Leza nu kuyabelenga mazwi yakwe Yeova yano nakunenyile ukulemba umu lupapulo. Ukabelengele antu pa ng’anda yakwe Yeova pa wanda wa kufunga;* ukabelengele antu ya mu Yuda yonsi aaliza ukufuma uku misumba yao.
7 Limwi Yeova anguvwa vino yakulenga ukuti ayuvwile uluse, nupya yangasenuka nu kuta ukucita iviipe pano Yeova watalanda ukuti alafulula antu yaa ala ali ni cipyu cikalamba nu ukali.”
8 Lyene Baluki mwana Nelya wacisile vyonsi vino kasesema Yelemiya wamunenyile; waile abelenga ulupapulo umwali mazwi yakwe Yeova pa ng’anda yakwe Yeova umwi izwi lyuvwike.
9 Umu mwaka uwalenga 5 uwa kuteeka kwakwe Yeoyakimu mwana Yosiya umwene wa ku Yuda, mu mwezi uwalenga 9, antu yonsi amu Yelusalemu na antu yonsi aizile umu Yelusalemu kufuma uku misumba iya ku Yuda yatandike ukufunga pa nkoleelo yakwe Yeova.
10 Lyene Baluki wabelenzile mazwi yakwe Yelemiya aali umu lupapulo pa ng’anda yakwe Yeova mu muputule uwa kuliilamo wakwe Gemaliya mwana Syafani kalemba, mu musolo wa papela pa mpongolo ipya iya pa ng’anda yakwe Yeova ale na antu yonsi yakuvwako.
11 Lino Mikaya mwana Gemaliya mwana Syafani uvwile mazwi yonsi yakwe Yeova aali umu lupapulo,
12 waile ukwi sano lya mwene uku muputule wakwe kalemba. Nupya wazanyile ya cilolo yonsi iyikala, kuli kuti Elisyama kalemba, Delaya mwana Syemaya, Elinatani mwana Akiboli, Gemaliya mwana Syafani, Zedekiya mwana Hananiya, na ya cilolo yonsi asyala.
13 Mikaya wayanenyile mazwi yonsi yano uvwile lino Baluki wabelengelanga antu ulupapulo.
14 Lyene ya cilolo yonsi yatumile Yeudi mwana Netaniya mwana Syelemiya mwana Kusyi kuti akamunene ati: “Iza nu lupapulo luno wabelengiile antu.” Baluki mwana Nelya nawe watozile ulupapulo nu kuya kuli aliyo.
15 Nayo yamunenyile iyati: “Ikala utubelengele.” Nawe wayabelengiile.
16 Lino yuvwile mazwi yaa yonsi, yalolekesyanyizye ala yali ni ntete, nupya yanenyile Baluki iyati: “Tufwile ukunena umwene mazwi yonsi yaa.”
17 Yuzizye Baluki iyati: “Tunene, cali uli pakuti ulembe mazwi yonsi yaa? Uzye Yelemiya u wakunenyile ukulemba?”
18 Baluki wayaswike ati: “Yelemiya uwanenyile mazwi yaa yonsi, nupya nayalemvile umu lupapulo luu kuomvya inki.”
19 Ya cilolo yanenyile Baluki iyati: “Pitanga ukafisame pamwi na Yelemiya mutaleka ali wensi amanye kuno muli.”
20 Lyene yaile uku mwene umu musolo, nupya yatwazile ulupapulo umu muputule wakwe Elisyama kalemba, yaile iyanena umwene vyonsi vino yuvwile.
21 Fwandi umwene watumile Yeudi kuti akalete ulupapulo, nawe waile alutola umu muputule wakwe Elisyama kalemba. Yeudi watandike ukubelengela umwene na ya cilolo yonsi aaimi umupiipi nu mwene.
22 Umwene watenzi umu ng’anda iya kwikalamo umu nsita ya mpepo mu mwezi uwalenga 9,* ala ni mbeula ya moto ili pa nkoleelo yakwe.
23 Nga Yeudi wabelenga utuputulwa tutatu nanti 4, umwene watulepulanga ukuomvya umupeni wakwe kalemba nu kutoca pa mbeula kufikila oca ulupapulo lonsi.
24 Nupya yatuvwile intete; nu mwene kumwi na aomvi yakwe yonsi auvwile mazwi yayo yataalepwile ivyakuzwala vyao.
25 Nanti cakuti Elinatani, Delaya, na Gemaliya yapaapasile umwene ukuti atoca ulupapulo, atuvwile kuli aliyo.
26 Nupya umwene wanenyile Yelameeli umwana wa mwene, Selaya mwana Aziliyeli, na Syelemiya mwana Abideli kuti yakaleme Baluki kalemba na kasesema Yelemiya, lelo Yeova wayafisile.
27 Pa cisila icakuti umwene oca ulupapulo umwali amazwi yano Yelemiya wanenyile Baluki ukulemba, nupya kwene Yeova wanenyile Yelemiya ati:
28 “Tola ulupapulo luze nu kulemba mazwi yonsi aali umu lupapulo lwa kutandikilako, luno Umwene Yeoyakimu uwa ku Yuda wataoca.
29 Ulande ukulozya kuli Yeoyakimu umwene uwa ku Yuda uti, ‘Yeova walanda wati: “Watuoca ulupapulo nu kulanda uti, ‘U mulandu ci uno walembiile uti: “Umwene uwa ku Babiloni aliza nu konona impanga yii kumwi na antu ni nyama”?’
30 Fwandi Yeova walanda ukulozya kuli Yeoyakimu umwene uwa ku Yuda wati, ‘Atalakwata ali wensi uwa kwikala pa cilimba ca wene cakwe Devedi, nupya icitumbi cakwe cilaaya pa kasanya mu nsita ya musanya nu usiku cilaaya pa mpepo.
31 Ndamupingula kumwi na amu lupwa lwakwe na aomvi yakwe pa viipe vino yaacita, nupya ndaleta intazi zyonsi pali aliyo na pa ikazi ya mu Yelusalemu na amu Yuda zino nalanzile ukuti ndayaletela, pano yakanyile ukuvwa kuli nene.’”’”
32 Lyene Yelemiya watozile ulupapulo luze apeela Baluki mwana Nelya kalemba, nawe walemvile mazwi yonsi yano Yelemiya wamunenyile ukulemba aali umu lupapulo luno Yeoyakimu Umwene uwa ku Yuda osile. Nupya yalemvilemo mazwi na yauze aafumile kuli Leza.
Mafutunoti
^ Nanti “ukuta ukulya.”
^ Kutandika pakasi ka mwezi wakwe Novemba kufika pakasi ka mwezi wakwe Dizemba.
