Yelemiya 37:1-21
37 Nupya Umwene Zedekiya mwana Yosiya wapyanyile Koniya mwana Yeoyakimu pa wene, pano Umwene Nebukadineza* uwa ku Babiloni u wamwisile pa wene umu mpanga ya Yuda.
2 Lelo wene na aomvi yakwe na antu ya mu mpanga yatuvwile vino Yeova walanzile ukupitila muli kasesema Yelemiya.
3 Nupya Umwene Zedekiya watumile Yeukali mwana Syelemiya na Zefaniya mwana Maaseya simapepo kuli kasesema Yelemiya kuti yakamunene yati: “Twapaapata tupepeleko kuli Yeova Leza witu.”
4 Pa nsita yii ala Yelemiya akupita ukwaula ukutiina icili consi, pano ala yacili ukumwika umu cifungo.
5 Lyene asilika yakwe Falao yakatwike ukufuma uku Ijipti, nupya Ina Kalideya aazingulwike Yelusalemu yuvwile ukuti yakwiza. Fwandi yafumile uku Yelusalemu.
6 Lyene Yeova wanenyile Yelemiya kasesema ati:
7 “Yeova Leza wakwe Izlaeli walanda wati, ‘Umwene uwa ku Yuda uwatamutuma ukuti mwize muzye kuli nene mukamunene muti: “Asilika yakwe Falao aakwiza umu kumwazwilizya yalaswilila uku Ijipti uku mpanga yao.
8 Aina Kalideya yalawela nu kulwisya umusumba uu nupya yalaupoka nu kuoca.”
9 Yeova walanda wati, “Mutaaibepa nu kulanda imuti, ‘Aina Kalideya yatalawela,’ pano nanti ciye uli yalawela.
10 Nanti mwacimvya asilika Aina Kalideya yonsi aakumulwisya mwasya sile aonsi atiyacisika, yayo kwene yalakatuka ukufuma uku matenti yao nu koca umusumba uu.”’”
11 Lino asilika Aina Kalideya yatiile ukulwisya Yelusalemu pa mulandu na asilika yakwe Falao,
12 Yelemiya wafumile uku Yelusalemu nu kuya uku mpanga yakwe Benjamini kuti yakamupeele ica upyanyi umu yantu yakwe.
13 Lelo lino wafisile pa Mpongolo Yakwe Benjamini, uwangalilanga alinzi uwi zina ilyakuti Iliya mwana Syelemiya mwana Hananiya walemile Yelemiya kasesema nu kumunena ati: “Ukulonda ukuya uku lusansa lwa Ina Kalideya!”
14 Lelo Yelemiya walanzile ati: “Awe nsikuya uku lusansa lwa Ina Kalideya!” Nomba Iliya wakanyile ukuvwa. Fwandi walemile Yelemiya nu kumutwala kuli ya cilolo.
15 Ya cilolo yasokiile sana Yelemiya nupya yamumile nu kumwika umu cifungo umu ng’anda yakwe Yeonatani kalemba ino yasangwile ukuya icifungo.
16 Isile Yelemiya umu cifungo mu miputule iya pansi nupya watwalilile ukwikala mumu kwene pa manda aingi.
17 Lyene Umwene Zedekiya watumile aakuyaama Yelemiya nupya watandike ukulanzyanya nawe umu nkama umwi sano lyakwe. Wamuzizye ati, “Uzye kuli mazwi ali yonsi yano Yeova watalanda?” Yelemiya nawe wamwaswike ati, “Ee akuno yali!” nupya watwalilile ukulanda ati, “Ulapeelwa umu minwe ya mwene uwa ku Babiloni!”
18 Nupya Yelemiya uzizye Umwene Zedekiya ati: “I vyani vino naluvyanya kuli wewe nu ku yaomvi yako nu ku yantu yaa, pakuti munjike umu cifungo?
19 Uzye lyene ya kasesema yako aakusesemile iyati, ‘Umwene uwa ku Babiloni ataliza umu ku kulwisya nu kulwisya impanga yii yali kwi’?
20 We musambazi wane uvwa kuno napaapata. Si ungala uvwe vino nkulenga ukuti unguvwile uluse, utanswilizya uku ng’anda yakwe Yeonatani kalemba, pano ndaya nkafwile kuuku kwene.”
21 Fwandi Umwene Zedekiya walanzile ukuti yasungile Yelemiya mu Musolo wa Yalinzi nupya cila wanda yamupeelanga umukate uulungane uwafumanga uku museo wakwe ya kapanga ya mikate kufikila lino umukate onsi wasizile umu musumba. Nupya Yelemiya watwalilile ukuya umu Musolo wa Yalinzi.
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
