Yelemiya 38:1-28
38 Lyene Syefatiya mwana Matani, Gedaliya mwana Pasyuli, Yukali mwana Syelemiya, na Pasyuli mwana Malikiya yuvwile mazwi yano Yelemiya wanenanga antu yonsi aakuti:
2 “Yeova walanda wati, ‘Wensi aalatwalilila ukwikala umu musumba uu alafwa uku lupanga, ku cipowe nu ku cikuko. Lelo wensi uwazala uku Ina Kalideya alatwalilila ukuya nu umi nupya alapususya umi wakwe.’
3 Yeova walanda nu kuti, ‘Umusumba uu ulapeelwa uku yasilika ya mwene wa ku Babiloni, nupya yalaupoka.’”
4 Ya cilolo yanenyile umwene iyati: “Leka umuntu wii akomwe pano akutoovola asilika aasyala umu musumba na antu yonsi ukupitila umu kuyanena mazwi yayo. Umuntu wii asilonda antu yaa yaye nu mutende, lelo akalonda yaye ni ntazi.”
5 Umwene Zedekiya waswike ati: “Mukwai awiyo! Umwene atanga amulesye ukucita icili consi cino mukulonda.”
6 Fwandi yasenzile Yelemiya nu kuyamwingizya umu cisima cakwe Malikiya umwana wa mwene icali umu Musolo wa Yalinzi. Iingizye Yelemiya umu cisima ukuomvya imyando. Lelo mutaali manzi, mwali sile matipa nupya Yelemiya watandike ukutika.
7 Ebedi-meleki Umwina Etiopia uwaombanga ukwi sano lya mwene uvwile ukuti iika Yelemiya umu cisima. Walanga umwene wataikala umu Mpongolo Yakwe Benjamini,
8 fwandi Ebedi-meleki wafumile umwi sano nu kuyanena umwene ati:
9 “Musambazi wane, vino aonsi yaa iyacita kuli Yelemiya kasesema i viipe! Iyamusumbila umu cisima nupya amafwila mumu kwene pa mulandu ni cipowe pano mu musumba musi ivyakulya.”
10 Lyene umwene wanenyile Ebedi-meleki Umwina Etiopia ati: “Senda aonsi 30 mukafumye kasesema Yelemiya umu cisima lino atatala wafwa.”
11 Fwandi Ebedi-meleki wasenzile aonsi yayo nu kuya ukwi sano lya mwene ku ncende iyali umwisika lya cipao, nupya yatozile ivisalu ivisile ni vyakuzwala ivisile nu kuvingizya umu cisima umwali Yelemiya ukuomvya intambo.
12 Lyene Ebedi-meleki Umwina Etiopia wanenyile Yelemiya ati: “Ika ivisalu umu nkwapa umumapita imyando.” Yelemiya nawe wacisile vivyo kwene,
13 nayo yamufumizye umu cisima ukuomvya imyando. Nupya watwalilile ukwikala umu Musolo wa Yalinzi.
14 Umwene Zedekiya watumile aakuyaleta kasesema Yelemiya uku wingililo wakwe citatu wa ku ng’anda yakwe Yeova, nupya wanenyile Yelemiya ati: “Nkulonda ukukuuzyako cimwi, utamfisa.”
15 Lyene Yelemiya wanenyile Zedekiya ati: “Nga nakunena umankoma. Nupya nga nakupandako mano umakana ukuvwa.”
16 Fwandi Umwene Zedekiya walafile kuli Yelemiya umu nkama ati: “Nkulapa umwi zina lyakwe Yeova Leza wa umi, uwatupeela umi ukuti nsikukukoma nupya nsikukupeela uku yantu yaa aakulonda ukukukoma.”
17 Lyene Yelemiya wanenyile Zedekiya ati: “Yeova Leza wa maumba, Leza wakwe Izlaeli walanda wati, ‘Ndi cakuti wazala kuli ya cilolo ya mwene wa ku Babiloni ulapusuka, nupya umusumba uu utalapya, naawe kumwi na amu ng’anda yako mulatwalilila ukuya nu umi.
18 Lelo nga wakana ukuzala kuli ya cilolo ya mwene wa ku Babiloni, musumba uu ulapeelwa uku Ina Kalideya, nayo yalaoca, naawe utalapusuka.’”
19 Lyene Umwene Zedekiya wanenyile Yelemiya ati: “Nkutiina Ayuda aaya uku lusansa lwa Ina Kalideya, pano nga napeelwa kuli aliyo, yalancita iviipe sana.”
20 Lelo Yelemiya walanzile ati: “Utalapeelwa kuli aliyo. Uvwila mazwi yakwe Yeova yano nkukunena, lyene ivintu vilakuzipila nupya ulatwalilila ukuya nu umi.
21 Lelo nga wakana ukuzala, Yeova watansokolwela ukuti:
22 Lola! Anaci yonsi asyala umwi sano lya mwene wa ku Yuda yakusendwa kuli ya cilolo ya mwene wa ku Babiloni nupya yakuti,‘Aonsi yano wataaile iyakubepa nu kukucimvya.
Iyalenga ingazo zyako ukutika umu matipa.
Iyakusya.’
23 Aci yako yonsi na ana yako yakusendwa uku Ina Kalideya nupya utalapusuka, lelo umwene wa ku Babiloni alakulema, nupya pa mulandu naawe umusumba uu ulocewa.”
24 Lyene Zedekiya wanenyile Yelemiya ati: “Utaleka ali wensi amanye ivintu vii, pakuti utafwa.
25 Nupya ndi cakuti ya cilolo yuvwa ukuti indanda naawe nupya iza nu kukunena iyati, ‘Tunene vyonsi vino watunena umwene. Utatufisa icili consi, naswe tusikukukoma. I vyani vino umwene watakunena?’
26 Uyanene uti, ‘Inkulenga umwene kuti atanswilizya uku ng’anda yakwe Yeonatani pano ningaya nkafwe.’”
27 Lino papisile insita ya cilolo yonsi yaile kuli Yelemiya mu kumuuzilizya. Nawe wayanenyile vyonsi vino umwene wamunenyile. Fwandi yataamuzizye na vyuze pano kusi uuvwile vino walanzyanyizye nu mwene.
28 Yelemiya watwalilile ukwikala umu Musolo wa Yalinzi ukufika na pa wanda uno Yelusalemu waposilwe; wali mumu kwene lino Yelusalemu waposilwe.
