Yelemiya 39:1-18
39 Mu mwaka uwalenga 9 uwa kuteeka kwakwe Zedekiya umwene wa ku Yuda, mu mwezi uwalenga 10, Nebukadineza umwene uwa ku Babiloni na asilika yakwe yonsi izile uku musumba wa Yelusalemu nupya izile iyauzinguluka.
2 Mu mwaka uwalenga 11 uwa kuteeka kwakwe Zedekiya, mu mwezi uwalenga 4, pa wanda uwalenga 9, yatulwile iciumba ca musumba.
3 Lyene ya cilolo yonsi aamwene wa ku Babiloni, kuli kuti Neligali-syaleza Samuga, Nebo-selisekimu Labusali, Neligali-syaleza Labumagi,* alino na ya cilolo yonsi asyala aamwene wa ku Babiloni iingiile nu kuyaikala pa Mpongolo ya Pakasi.
4 Lino Zedekiya umwene uwa ku Yuda na asilika yakwe yonsi yayaweni, yutwike iyafuma umu musumba usiku kuomvya inzila iyapita uku calo ca mwene, yapisile pa mpongolo iyali pakasi ka viumba viili, nupya yalungime uku nzila iyaya uku Alaba.
5 Lelo asilika Aina Kalideya yayazinginye nupya yaile iyalema Zedekiya umu lwanga lwa ku Yeliko. Yamulemile nu kumutwala kuli Nebukadineza* uwa ku Babiloni uku Libula mu mpanga ya Hamati, kuno waile amupingwila.
6 Umwene wa ku Babiloni walesile ukuti ya mwana Zedekiya na antu yonsi acindame amu Yuda yakomwe kuuku kwene uku Libula ala na Zedekiya akulolako.
7 Lyene watonkwile Zedekiya amanso, nu kumunyepa na maceni yakwe koopa amusenda nu ku Babiloni.
8 Aina Kalideya yosile isano lya mwene na mang’anda yonsi aayantu nupya yawisizye iviumba vya musumba wa Yelusalemu.
9 Nebuzaladani umukalamba wa yalinzi wasenzile antu yonsi asyazile umu musumba uku Babiloni kumwi na antu autukiile kuli aliwe na antu yonsi asyala.
10 Lelo Nebuzaladani wasileko antu yamwi aali apiina sana umu mpanga ya Yuda aatakweti nanti acimwi. Pa wanda kwene uuwa wayapeezile ivyalo vya myangazi ni vyalo vyuze ivyakuti yaombamo.
11 Lyene Nebukadineza umwene wa ku Babiloni walanzile na Nebuzaladani mukalamba wa yalinzi ukulozya kuli Yelemiya ati:
12 “Musende nupya uwamusakamala; utacita iciipe cili consi kuli aliwe, nupya uwamupeela vyonsi vino walenga.”
13 Lyene Nebuzaladani mukalamba wa yalinzi, Nebusyazibani Labusali, Neligali-syaleza Labumagi, na aonsi yonsi acindame aa mwene wa ku Babiloni yatumile antu
14 aakuti yakasende Yelemiya ukufuma umu Musolo wa Yalinzi nu kumutwala uku ng’anda yakwe Gedaliya mwana Ahikamu mwana Syafani. Fwandi Yelemiya watandike ukwikala pamwi na antu.
15 Lino Yelemiya acili umu Musolo wa Yalinzi muno yamuyalile, Yeova wamunenyile ati:
16 “Pitanga ukanene Ebedi-meleki Umwina Etiopia uti, ‘Yeova wa maumba, Leza wakwe Izlaeli walanda wati: “Nimafikilizya mazwi yano nalanzile ukulozya uku musumba uu, lino natiile: “Ndaleta intazi asi visuma foo, nupya ulalolako lino yalafikiliziwa umu wanda uuwa.”’
17 “Yeova walanda nu kuti: ‘Lelo ndakupususya umu wanda uuwa nupya utalapeelwa uku yantu yano ukatiina.
18 “‘Pano umu cumi ndakupususya, nupya utalakomwa uku lupanga. Ulapususya umi wako, pano wataile muli nene,’ avino Yeova walanda.”
Mafutunoti
^ Nanti “mukalamba wakwe ya kacita ya maleele.”
^ Mu Ciebele: “Nebukadileza,” yii inzila yuze iya kulembelamo izina lii.
