Yelemiya 40:1-16
40 Yelemiya wapokelile mazwi ukufuma kuli Yeova pa cisila cakuti Nebuzaladani umukalamba wa yalinzi wamusapula uku Lama. Wamusenzile ala umunyepwe makasa, nupya wali pa yazya yonsi aasenzilwe ukufuma uku Yelusalemu nu ku Yuda yano yatwalanga uku Babiloni.
2 Lyene umukalamba wa yalinzi wasenzile Yelemiya nu kumunena ati: “Yeova Leza wako wasoowile ukuti intazi yii iliza pa ncende yii,
3 nupya Yeova wataleta intazi yii wakwe vino walanzile, pano mwayembukile Yeova nupya mutuvwile vino walanzile. Ali mulandu uno vii ivimucitikila.
4 Ilelo nimakusapula. Ngu kulonda ukonke uku Babiloni twapita, nimakusakamalanga. Lelo ngu utakulonda syala. Impanga yonsi aeyi wewe muntungwa ukuya ukuli konsi kuno ukulonda.”
5 Walanga Yelemiya acili akuwayawaya, Nebuzaladani wamunenyile ati: “Swilila kuli Gedaliya mwana Ahikamu mwana Syafani wino umwene wa ku Babiloni wasonta ukuti aangalila imisumba ya mu Yuda nupya ukaikala nawe pamwi na antu asyala; nanti uye ukuli konsi kuno ukulonda.”
Lyene umukalamba wa yalinzi wamupeezile ivyakulya ni ca upe nu kuleka kuti aapita.
6 Fwandi Yelemiya waile kuli Gedaliya mwana Ahikamu uku Mizipa nu kuyaikala kuuku kwene pamwi na antu aasile umu mpanga.
7 Lino papisile insita akalamba yonsi aayasilika aali umu mpanga kumwi na asilika yao yuvwile ukuti umwene wa ku Babiloni watasonta Gedaliya mwana Ahikamu kuti aangalila impanga na aonsi, anaci, na ana, ukufuma umu yapiina aatasenzilwe uku Babiloni.
8 Fwandi yaile kuli Gedaliya uku Mizipa. Paali Isumaeli mwana Netaniya, Yoanani na Yonatani ya mwana Kaleya, Selaya mwana Taniumeti, ya mwana Efai Umwina Netofa, na Yezaniya umwana wa Mwina Maakati, na asilika yao.
9 Gedaliya walafile umulapo kuli aliyo nu ku yasilika yao ati: “Mutatiina ukuombela Aina Kalideya. Ikalini umu mpanga nu kuombela umwene wa ku Babiloni, nupya ivintu vilamuzipila.
10 Lelo nemo nimasyala uku Mizipa pakuti namwimililako uku Ina Kalideya aakwiza kuli sweswe. Kolonganikini waini, vizao vya cisanya, na mafuta nu kuvika umu nsembo nupya mwikale umu misumba ino mwapyana.”
11 Nupya Ayuda yonsi aali umu Moabu, mu Amoni, nu mu Edomu, na yonsi aali umu mpanga zyuze nayo kwene yuvwile ukuti umwene wa ku Babiloni wataleka ukuti Ayuda asyala yatwalilile ukwikala umu Yuda nupya wasonta Gedaliya mwana Ahikamu mwana Syafani kuti aayangalila.
12 Fwandi Ayuda yonsi yatandike ukuwela ukufuma umu ncende zyonsi zino yayasalanganyizizyemo, nupya yaile uku mpanga ya Yuda kuli Gedaliya uku Mizipa. Yakolonganike waini ni vyakulya vya cisanya ivingi sana.
13 Yoanani mwana Kaleya na akalamba yonsi aayasilika aali umu mpanga yaile kuli Gedaliya uku Mizipa.
14 Yamunenyile iyati: “Uzye watumanya ukuti Baalisi umwene wa Ina Amoni watatuma Isumaeli mwana Netaniya kuti aize akukome?” Lelo Gedaliya mwana Ahikamu ataazumile vino yamunenyile.
15 Lyene Yoanani mwana Kaleya wanenyile Gedaliya umu nkama uku Mizipa ati: “Nkulonda ukuya umu kukoma Isumaeli mwana Netaniya, nupya kusi aalamanya. U mulandu ci uno angakukomela, nupya u mulandu ci uno antu yonsi amu Yuda aakolongana kuli wewe yangasalanganila na Ayuda asyalako yalowe?”
16 Lelo Gedaliya mwana Ahikamu wanenyile Yoanani mwana Kaleya ati: “Utacita vivyo, pano vino ukulanda pali Isumaeli i vya ufi.”
