Yelemiya 43:1-13
43 Lino Yelemiya wamazile ukunena antu yonsi mazwi yaa yonsi yano Yeova Leza wao walanzile, kuli kuti mazwi yonsi yano Yeova Leza wao wamunenyile ukuti ayanene,
2 Azaliya mwana Hosyaya, Yoanani mwana Kaleya, na aonsi yonsi aacilumba yamunenyile iyati: “Vino ukulanda ivya ufi! Yeova Leza witu atakutumile ukuti utunene uti, ‘Mutaya mukikale uku Ijipti.’
3 Lelo Baluki mwana Nelya aaliwe akukutunka ukuti utupeele uku Ina Kalideya pakuti yatukome nanti ukutusenda umu uzya uku Babiloni.”
4 Fwandi Yoanani mwana Kaleya na akalamba ya yasilika yonsi na antu yonsi yakanyile ukuvwila vino Yeova walanzile ukuti yatwalilile ukwikala umu mpanga ya Yuda.
5 Lelo yasenzile Ayuda yonsi asyazile aawezile umu kwikala umu mpanga ya Yuda ukufuma uku nko zyonsi zino yasalanganilemo.
6 Yasenzile aonsi, anaci, ana, ana ya mwene akazyana, na antu yonsi yano Nebuzaladani umukalamba wa yalinzi wasiile kuli Gedaliya mwana Ahikamu mwana Syafani kumwi na Yelemiya kasesema na Baluki mwana Nelya.
7 Nupya yaile uku mpanga iya Ijipti pano yakanyile ukuvwila vino Yeova walanzile, yaile iyafika nu ku Tapenesi.
8 Lyene Yeova wanenyile Yelemiya uku Tapenesi ati:
9 “Tola mawe akalamba, uyaziike umu musolo uwapangilwa ni njelwa pa wingililo wa mu ng’anda yakwe Falao ale na aonsi Ayuda yakulolako.
10 Lyene wayanenyile ati, ‘Yeova wa maumba, Leza wakwe Izlaeli walanda wati: “Nimaama Nebukadineza umwene wa ku Babiloni, muomvi wane, nupya ndika icilimba cakwe ica wene pa mawe yaa yano imfisa, nawe alakonzolwelapo itenti lyakwe.
11 Nupya aliza nu kuzanza impanga ya Ijipti. Wensi aalinzile ukufwa uku cikuko iciipisye, alafwa uku cikuko, na wensi aalinzile ukusendwa umu uzya, alasendwa umu uzya, nupya wensi aalinzile ukukomwa nu lupanga, alakomwa nu lupanga.
12 Ndoca na mang’anda yakwe ya leza ya mu Ijipti, nupya Nebukadineza alayoca nu kusenda antu umu uzya. Wakwe viivi kwene vino cisitalila kacema ukuzwala ivyakuzwala, avino Nebukadineza alacimvya impanga ya Ijipti nu kuipoka nupya alafumako umu mutende.
13 Nupya alakontoola incesi zya mu Beti-syemesyi* mu mpanga ya Ijipti, nu koca mang’anda yakwe ya leza ya mu Ijipti.”’”
Mafutunoti
^ Nanti “ng’anda iya kasanya,” kuli kuti Elyopolisi.
