Yelemiya 44:1-30
44 Yaa ali mazwi yano Yelemiya wapokeliile ukulozya uku Yayuda yonsi aikalanga umu Ijipti, mu Migidoli, Tapenesi, Nofu,* nu mu mpanga iya Patulosi, aakuti:
2 “Yeova wa maumba, Leza wakwe Izlaeli, walanda wati, ‘Mwalola intazi zyonsi zino naleesile pali Yelusalemu na pa misumba yonsi iya mu Yuda, nupya ndakai ncende zizyo zyononeka, musiikala ali wensi.
3 Nacisile vivyo pa mulandu ni viipe vino yacisile pakuti yansosye ukupitila umu kupeela malambo nu kuombela ya leza yauze yano yataamanyile, nanti sile a mwemwe kwene ni vikolwe vinu mutaayamanya.
4 Natwalilile ukumutumila ya kasesema aomvi yane cila nsita ala nkumunena ukuti: “Tiini ukucita icintu cii ca winyi cino napata.”
5 Lelo yatuuvwile nanti ukukutika pakuti yasenuke nu kuta ukupeela malambo kuli ya leza yauze.
6 Fwandi nasosile nu kuleta ukali wane uwapyanga wa moto umu misumba ya mu Yuda nu mu miseo ya mu Yelusalemu, nupya yononike nu kusyala umwaula icili consi wakwe vino yaya ukufika na ndakai.’
7 “Lyene Yeova wa maumba, Leza wakwe Izlaeli walanda wati, ‘U mulandu ci uno mukulonda ukuiletela intazi ikalamba nu kuleka umonsi wensi nu mwanaci nu mwana na kanya ukuloviwa umu Yuda, icakuti kutaya nu wa kusyalamo?
8 U mulandu ci uno mukunsosezya ukupitila umu kupeela malambo kuli ya leza yauze umu mpanga ya Ijipti muno mwaya umu kwikala? Mulalowa na antu yalaamulandapo lino yakulanda pa citiipu nupya mulazewana umu nko zyonsi zya mu nsi.
9 Uzye mwilila iviipe vino ivikolwe vinu vyacisile na vino ya mwene ya mu Yuda na aci yao yacisile, alino ni viipe vino mwacisile pamwi na aci inu mu mpanga iya Yuda nu mu miseo iya mu Yelusalemu?
10 Kufika na ndakai mutaicefya, musitiina nanti ukulondela masunde yano namupeezile kumwi ni vikolwe vinu.’
11 “Fwandi Yeova wa maumba, Leza wakwe Izlaeli walanda wati, ‘Ndaleta intazi pali mwemwe nu kulovya antu ya mu Yuda yonsi.
12 Ndalenga antu ya mu Yuda aasyalapo aalondesyanga ukwikala umu mpanga iya Ijipti ukuloviwa umu mpanga iya Ijipti kwene. Yalafwa uku lupanga nu ku cipowe; ukutandikila pa munono kufika pa mukalamba, yonsi kwene yalafwa uku lupanga nu ku cipowe. Nupya antu yalaayalandapo lino yakulanda pa citiipu, yalaayaseka, nu kuyatumfya.
13 Ndafulula antu aakaikala umu mpanga ya Ijipti ukuomvya ulupanga, cipowe ni cikuko, wakwe vino nacisile kuli yano ikalanga umu Yelusalemu.
14 Nupya antu asyalapo umu Yuda aaya umu kwikala uku Ijipti yatalapusuka nanti ukuutuka pakuti yaswilile uku mpanga ya Yuda. Yalaalondesya ukuswilila nu kuyaikala kuuku kwene, lelo yatalaswililako, suka sile anono aaluutuka.’”
15 Aonsi yonsi aamanyile ukuti aci yao yakapeela malambo kuli ya leza yauze na aci yonsi aimiliile paapa kwene, aapanzile iumba ilikalamba na antu aikalanga umu Ijipti uku Patulosi, yaswike Yelemiya iyati:
16 “Tutakutala tuvwe vino watutunenela umwi zina lyakwe Yeova.
17 Lelo twakulacita vyonsi vino itulanda, kuli kuti ukupeela malambo kuli Namwene wi Yulu* nu kumupeela ivya upe ivya vyakumwa wakwe viivi kwene vino swemo ni vikolwe vitu, ya mwene itu, na ya cilolo itu twacisile umu misumba iya mu Yuda nu mu miseo ya mu Yelusalemu, lino twakwatanga ivyakulya ivingi nu kwikala ningo nupya lino tutakwatanga intazi zili zyonsi.
18 Kufuma pano twateliile ukupelela malambo nu upe wa vyakumwa kuli Namwene wi Yulu tusikwata ivili vyonsi, nupya tukafwa uku lupanga nu ku cipowe.”
19 Anaci nayo yalanzile iyati: “Uzye lino twapeelanga malambo nu upe wa vyakumwa kuli Namwene wi Yulu, ya witu yataatuzumilizye ukuti tupange makeke ya kumupeela aalolekanga wakwe aliwe nu kumupeela upe wa vyakumwa?”
20 Lyene Yelemiya wanenyile antu yonsi, kuli kuti aonsi na aci yao na antu yonsi aalandanga kuli aliwe ati:
21 “Yeova atiilile nupya wiusyanga malambo yano mwemo ni vikolwe vinu, ya mwene inu, ya cilolo inu, na antu ya mu mpanga mwapeelanga umu misumba ya mu Yuda nu mu miseo ya mu Yelusalemu.
22 Yeova watafilwa ukutwalilila ukusuulako sile uku viipe nu ku vintu vya winyi vino mwacita, nupya impanga inu yononeka, yaya ica kutiinya nupya antu yakailandapo lino yakulanda pa vintu ivitiipwe, kutaaya aakaikalamo ukufika na ndakai.
23 Intazi yii iiza pali mwemwe ukufika na ndakai pa mulandu wakuti mwapeelanga malambo yaa nu kuyembukila Yeova, ukupitila umu kukanauvwa ukwi izwi lyakwe Yeova nu kulondela masunde yakwe.”
24 Yelemiya watwalilile ukunena antu yonsi na anaci yonsi ati: “Uvwini amazwi yakwe Yeova, mwe yantu ya mu Yuda mwensi mweyano mukaikala umu mpanga ya Ijipti.
25 Yeova wa maumba, Leza wakwe Izlaeli walanda wati, ‘Imucita vino mwalanzile, pano mwatiile: “Tulaapeela malambo nu upe wa vyakumwa kuli Namwene wi Yulu ukulingana na vino twalafile.” Cumi kwene mwe yanaci mulafikilizya vino mwalafile, nu kucita vivyo kwene.’
26 Fwandi mwe yantu ya mu Yuda mwensi mweyano mukaikala umu mpanga ya Ijipti uvwini mazwi yakwe Yeova, mukalapa imuti: “Nkulapa umwi zina lyakwe Yeova umwene uwa papelapela,” nomba Yeova walanda wati: “Nkulapila umwi zina lyane ilikalamba nkuti, ‘Kusi ali wensi aalaalumbula izina lyane pa kulapa.
27 Ndaleta intazi pali aliyo asi visuma foo; antu yonsi amu Yuda aakaikala umu mpanga ya Ijipti yalafwa uku lupanga nu ku cipowe, kufikila yace yasile yonsi.
28 Antu sile anono aalapusuka uku lupanga nu kuswilila uku mpanga iya Yuda kufuma uku Ijipti. Lyene antu yonsi amu Yuda asyala aizile umu kwikala umu mpanga ya Ijipti yalamanya ndi cakuti mazwi yane nanti mazwi yao atiyafikiliziwa!”’”
29 “Yeova walanda wati, ‘Cii ali cimanyililo kuli mwemwe icakuti ndamufulwila umu ncende yii, pakuti mumanye ukuti vino nalanzile ukuti ndaleta intazi pali mwemwe vilafikiliziwa.
30 Yeova walanda wati: “Nimapeela Falao Hofila umwene uwa ku Ijipti mu minwe ya yalwani yakwe na kuli yayo aakulonda ukumukoma, wakwe vino napeezile Zedekiya umwene uwa ku Yuda mu minwe yakwe Nebukadineza umwene uwa ku Babiloni, uwali umulwani wakwe nupya uwalondanga ukumukoma.”’”
Mafutunoti
^ Nanti “Memfisi.”
^ Ilumbo lyakwe leza mwanaci wino Aina Izlaeli ya cisanguka yapepanga; nanti limwi leza mwanaci aakapeela uvyazi.
