Yelemiya 46:1-28
46 Lyene Yeova wanenyile kasesema Yelemiya ukulozya uku nko ati:
2 Vii avino Leza walanda pali Ijipti, pa yasilika yakwe Falao Neko umwene wa Ijipti, uwali uku luzi lwa Yufuleti nupya wino Nebukadineza* umwene wa ku Babiloni wacimvizye uku Kelikemisyi umu mwaka uwalenga 4 uwa kuteeka kwakwe Yeoyakimu mwana Yosiya umwene wa ku Yuda, wati:
3 “Pekanyini visyangu ivinono ni vikalamba,Nu kuya umu ulwi.
4 Pekanyini imfwalasi nu kukwelapo, mwe yonsi aakakwela pa mfwalasi.
Zwalini visote nu kuipekanya ukulwa.
Nyolini masumo nu kuzwala ivya kucinga ivisao.
5 ‘U mulandu ci uno yakulolekela ni ntete?
Yakuzala, asilika yao iyacimviwa.
Iyutuka ala yali ni ntete, asilika yao yasikupeepela.
Konsi kwene kuli intete,’ avino Yeova walanda.
6 ‘Aakasimulisya na asilika yatanga yutuke.
Iyapumika nu kupona uku katutu,Mupiipi nu Luzi Lwa Yufuleti.’
7 A weni wiyo aakwiza wa Luzi lwa Naelo,Aakwiza wa nguzi zizuule?
8 Ijipti akaiza wa Luzi Lwa Naelo,Wa nguzi zizuule,Akati, ‘Nimaya nu kuunzya insi yonsi.
Ndonona umusumba na antu aakaikalamo.’
9 Mwemuno mukakwela pa mfwalasi
Yangini umu ulwi!
Mwemuno mukapisya maceleta, simuzyini sana!Lekini Kusyi na Puti aakaomvya ivisyangu,Na Ina Ludi aakaomvya maulapwa yaye umu ulwi.
10 “Uwanda uuwa ulaya uwakwe Yeova wa maumba, Umwene wa Papelapela, ulaya uwanda uno alalandula pa yalwani yakwe. Lupanga lulayakoma nu kwikuta uwazi wao, pano Yeova wa maumba, Umwene wa Papelapela akupeela ilambo uku mpanga ya ku katutu umupiipi nu Luzi Lwa Yufuleti.
11 Yanga uku Gilyadi ukasende mafuta yakwe basamu,We mwana umwanaci nacisungu uwa ku Ijipti.
Milembo yako i ya sile sile nanti ingavula,Pano pasi icingakupozya.
12 Inko izyuvwa vino watuzewana,Nupya ukuloosya kwako kukuvwika umu mpanga yonsi.
Pano asilika yakupunkana,Iyawela iyaponela na pamwi.”
13 Yeova wanenyile kasesema Yelemiya pali vino Nebukadineza umwene wa ku Babiloni wali nu kwizaonona impanga ya Ijipti ati:
14 “Manyisya umu Ijipti, landa umu Migidoli.
Manyisya umu Nofu* nu mu Tapenesi.
Ulande uti, ‘Ipekanyini ukuya umu ulwi,Pano ulupanga lulakomola yonsi aamuzinguluka.
15 U mulandu ci uno asilika inu amaka yakomelwa?
Yafizilwe ukuicingilila,Pano Yeova wayacimvizye.
16 Aingi yakupumika nu kupona.
Yakulanzyanya iyati:
“Katukini! Lekini tuswilile uku yantu itu uku mpanga ituPano ulupanga ilukalipisya.’”
17 Yakulanda iyati,‘Falao umwene wa ku Ijipti akapanga sile icongo ukwaula ukucita icili consiNupya watapanya isyuko.’
18 Umwene wino izina lyakwe a Yeova wa maumba walanda wati,‘Nkulapa ukuti aliza* nu kuya wakwe vino umwamba wa Taboli wacila imyamba yuzeNa wa mwamba wa Kalimeli uwaya umu mbali yakwe yemba.
19 Pekanya ivya kusenda umu uzya,We mwana umwanaci nacisungu wakwe Ijipti.
Pano Nofu alasyala ica kuseka;Alapya nu kusyala umwaula ali wensi.
20 Ijipti waya wa kana ka ng’ombe akandama akakaloleka ningo,Lelo ya munyinyi yaliza ukufuma uku katutu nu kumulumola.
21 Nanti sile aasilika yano walipila yaya wakwe tucipambasi utwine,Lelo yutukila pamwi.
Yafilwa ukuicingilila,Pano uwanda wao uwa macuzi waizila,Kuli kuti uwanda wa kufululwa.’
22 ‘Izwi lyakwe likuvwika wa nzoka iikusimula,Pano asilika ya maka iiza umu kumulwisya ni zya mpasa,Wa yonsi aakukoma imiti.
23 Yalawisya umutengo wakwe,’ avino Yeova walanda, ‘nanti cakuti mwaya imiti ingi sana.
Pano yaya aingi wakwe ya makanta, yatanga yapendwe.
24 Antu ya mu Ijipti yalazewana.
Yalapeelwa uku yantu ya ku katutu.’
25 “Yeova wa maumba, Leza wakwe Izlaeli walanda wati: ‘Nkufulula Amoni uwa ku No,* na Falao na Ina Ijipti na ya leza yao kumwi na ya mwene yao, kuli kuti Falao na yonsi aataila muli aliwe.’
26 “‘Nupya ndayapeela kuli yano yakulonda ukuyakoma, kuli Nebukadineza umwene wa ku Babiloni nu ku yaomvi yakwe. Lelo pa cisila antu yalikalamo wakwe vino cali mpiti,’ avino Yeova walanda.
27 ‘Lelo wemo we Yakobo umuomvi wane utuvwa intete,Nupya utatiina we Izlaeli.
Ndakupususya ukufuma ukutaliNupya ana yako ndayafumya umu mpanga muno yasendwa umu uzya.
Yakobo alawela nu kwikala umutende ukwaula ica kumupumvyanya,Kusi ali wensi aalayatiinya.
28 Yeova walanda wati, ‘Utatiina we Yakobo umuomvi wane, pano indi naawe.
Ndonona inko zyonsi zino namusalanganyizizyako,Lelo mwemo ntalamonona.
Ndamusalapula icilinge,Nupya ntalalekapo sile ukwaula ukumufulula.’”
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
^ Nanti “Memfisi.”
^ Kuli kuti uwa kucimvya Ijipti.
^ Kuli kuti Tebesi.
