Yelemiya 49:1-39
49 Yeova walanda ukulozya uku Ina Amoni wati:
“Uzye Izlaeli atakwata ana aonsi?
Uzye atakwata uwa kumupyana?
U mulandu ci uno Malikamu akaikalila umu mpanga yakwe Gadi?
Nupya u mulandu ci uno antu yakwe yakaikalila umu misumba yakwe Izlaeli?”
2 ‘Yeova walanda wati: “Fwandi manda yakwiza,Lino ndaleka ukuti congo ca mu ulwi cuvwike umu musumba wa Laba uwa Ina Amoni.
Ulononeka nu kusyala umwaula icili consi,Nupya imizi iyaya umupiipi ilociwa.”’
‘Nupya Izlaeli alapoka impanga ino yamuposile,’ avino Yeova walanda.
3 ‘Loosya we Hesyiboni, pano Ai wataononwa!
Lilini mwe mizi ya mu Laba.
Zwalini ivya kulangilamo ulanda.
Loosyangini nu kululumba umu vitata ivyapangilwa na mawe,Pano Malikamu watasendwa umu uzya,Pamwi na ya simapepo yakwe na ya cilolo yakwe.
4 U mulandu ci uno ukayuvwila pa mikonko,Pa nyika iivunde, we mwanaci aataya ni cisinka,Wemuno wataila umu vyuma vyakoNupya wemuno ukalanda uti: ‘A weni aaliza andwisye?’”’
5 ‘Yeova wa maumba, Umwene wa Papelapela walanda wati: “Nkuleta icintu ca kutiinya pali wewe,Ukufuma umu yantu yonsi aakuzinguluka,
Ulasalanganila umu ntunga zyonsi,Nupya kusi aalakolonganika aalutuka.”’
6 ‘Yeova walanda wati: “Lelo pa cisila ndakolonganika Aina Amoni aasendwa umu uzya.”’
7 Yeova wa maumba walanda pali Edomu wati:
“Uzye umu Temani mutaacili antu ya mano?
Uzye ukupanda mano ukusuma ukwa yantu aakailuka kwalowa?
Uzye mano yao yata ukuomba?
8 Utukini, swililini!
Yangini mukikale umu mikonko iizike mwemuno mukaikala umu Dedani!
Pano ndaleta intazi iipisye pali EsauLino insita ilafika iyakuti mufulule.
9 Ndi cakuti aakakulula imyangazi izile kuli wewe,Uzye yatanga yasye imyangazi imwi iya kutolelezya?
Nupya ndi cakuti aapuupu izile kuli wewe usiku,Yangonona sile vino yakulonda.
10 Lelo Esau ndamupoka vyonsi.
Nu kusokolola incende zyakwe izya kufisamako,Pakuti atakwata ukwa kufisama.
Ana yakwe, aina yakwe na inamupalamano yakwe yonsi kwene yalononwa,Nupya nawe kwene alafwa.
11 Nsilini ana inu aataakwata ya isi,Nani ndayapususya,Nupya ya mukamfwilwa yalantaila.”
12 Yeova walanda wati: “Ndi cakuti yayo aataapingulwa ukumwa muli kapu wa ukali yalinzile ukumwamo, uzye mwemo mungasyala ukwaula ukufululwa? Mutalasyala sile ukwaula ukufululwa, mulinzile ukumwamo.”
13 Yeova walanda wati “Indapa umwi zina lyane ukuti Bozila alaya ica kuseka, ica muzewanya, icononeke, nupya icitiipwe; nupya imisumba yakwe yonsi ilononwa manda pe.”
14 Inuvwa mazwi ukufuma kuli Yeova,Nupya watatuma inkombe yakwe uku yantu ya mu nko kuti ikayanene iti:
“Kolonganini nu kumulwisya;Ipekanyini uku ulwi.”
15 “Lola! Inkulenga ukuya umucepesye umu yantu ya mu nko,Wewe musuulwe.
16 Waibefile lino antu yakutiinanga,Cilumba cako icikubepa,Wemuno ukaikala umu ciliwe umucingililwe,Pa mwamba utali sana.
Nanti cakuti wapanga icinsanzo papela sana wakwe lyang’anda,Ndakwisya pansi,” avino Yeova walanda.
17 “Nupya Edomu alinzile ukuya icintu ca kuseka. Yonsi aalaapita umupiipi na aliwe yalaamuseka nu kuzunguka pa vinkunka vyonsi ivilamuponela.”
18 Yeova walanda wati: “Wakwe viivi kwene vino Sodoma na Gomola ni mizi ya mupiipi vyononyilwe, avino na Edomu alononwa nupya kusi aalatala aikalemo.
19 “Lolini! Wakwe cisama aakufuma umu mitengo ya mu Yodani umwaya sana imiti, umwi aliza nu kuzanza incende zya mulemvwe izicingililwe izya mu Edomu, lelo umu nsita sile inono ndaleka ukuti autuke ukufuma uku Edomu. Nupya ndasonta intunguluzi iyakuti yaangalila Edomu. Pano a weni uwaya wakwe nene, nupya a weni aangandwisya? A kacema ci aangimilila pa nkoleelo yane?
20 Acino mwe yantu mwe, uvwini vino Yeova akwelenganya ukucita kuli Edomu na vino akwelenganya pa yantu aakaikala umu Temani:
Utwana twa mfwele yalatukweta nu kutusenda.
Impanga yao ilasyala umwaula cimwi pa mulandu na vino yacisile.
21 Icongo ca kupona kwao icitensya insi.
Kuli ukuloosya ukukalamba!
Icongo icuvwika ukufika na kuli Yemba Muyenzu.
22 Wakwe viivi kwene vino lyang’anda akacita, nawe kwene alaya umupela nu kuwa zuwa zuwa,Nupya alakonzolwela maapa yakwe pali Bozila.
Umu wanda uuwa asilika ya mu EdomuYalaya ni ntete wa mwanaci aali pa kupaapa.”
23 Pali Damasika watapingula ati:
“Hamati na Alipadi iyazewana,Pano iyuvwa ilyasi iliipe.
Imyenzo yao yatisunguluka pa mulandu ni ntete.
Yali wakwe yemba wino maimbi iyakatuka nupya yasikulaala.
24 Damasika watatoovoka.
Akulonda ukuutuka, lelo watasakamikwa.
Akucululuka nu kuwaikaWa mwanaci aali pa kupaapa.
25 U mulandu ci uno antu aaya umu musumba wa lulumbi, umuzi umwaya ukusansamuka,Yataafumilamo?
26 Alumendo yakwe yalafwila umu ncende umukazanwa antu aingi,Nupya umu wanda uuwa asilika yakwe yonsi yalalowa,” avino Yeova wa maumba walanda.
27 Ndoca ilinga lyakwe Damasika,Ni mpungu zyakwe Beni-hadadi.”
28 Yeova watalanda pali Kedali na pa mawene ya ku Hazoli yano Nebukadineza* umwene uwa ku Babiloni ononyile, ati:
“Katukini muye uku Kedali,Nu konona antu ya ku Ufumondaka.
29 Matenti yao ni viteekwa vyao vilasendwa,Kumwi ni vintu vyao vyonsi.
Ingamila zyao zilasendwa,Nupya yalapundilila Aina Kedali yati, ‘Konsi kwene kuli vya kutiinya!’”
30 “Utukini, yangini ukutali!
Pitangini mukikale umu mikonko iizike, mwe yantu ya mu Hazoli,” avino Yeova walanda.
“Pano Nebukadineza umwene wa ku Babiloni watamupangila,Wataelenganyizizya limwi vino amacita kuli mwemwe.”
31 Katukini, yangini mukalwisye uluko ulwaya nu mutendeUlukaikala umucingililwe!” avino Yeova walanda.
Lutaakwata ivisaasa nanti imifikilo; lukaikala ukutali sana na antu yauze.
32 Ingamila zyao zilapokwa,Kumwi ni viteekwa vyao ivingi.
Ndayasalanginyizizya konsi konsi,Antu aakapela inyele umu mbali ya mitwe ndayasalanganyizizya konsi konsi,Nupya ndayaletela intazi ukufuma umu ntunga zyonsi,” avino Yeova walanda.
33 “Nupya HazoliAlasyala umwa kulaala ya nkusa,
Alononwa manda pe.Kusi aalatala aikalemo.”
34 Yeova wanenyile Yelemiya kasesema ukulozya kuli Elamu ku kutandika kwa kuteeka kwakwe Zedekiya umwene wa ku Yuda ati:
35 “Yeova wa maumba walanda wati, ‘Nkukontola ulapwa wa yantu ya mu Elamu umwaya maka yao.
36 Ndaleta imiza 4 pali Elamu ukufuma uku mpela 4 izi yulu, nupya ndayasalanganyizizya uku ntunga zyonsi. Antu ya mu Elamu yalasalanganila umu nko zyonsi.’”
37 “Ndalenga Aina Elamu ukuya ni ntete pa nkoleelo ya yalwani yao na yano yakulonda ukuyakoma; nupya ndaleta intazi pali aliyo nu ukali wane ukalamba,” avino Yeova walanda. “Ndaleta nu lupanga pali aliyo ukufikila ince njalovye.”
38 Yeova walanda nu kuti: “Ndika icilimba cane ica wene umu Elamu, nupya ndonona umwene na ya cilolo aayamo.
39 “Lelo umu manda ya kusyalikizya ndakolonganika Aina Elamu aasendwa umu uzya,” avino Yeova walanda.
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
