Yelemiya 50:1-46
50 Yaa ali mazwi yano Yeova walanzile ukulozya kuli Babiloni, impanga iya Ina Kalideya ukupitila muli Yelemiya kasesema, walanzile ati:
2 “Landa umu nko nu kumanyisya.
Ika icimanyililo nu kumanyisya.
Utafisa icili consi!
Landa uti, ‘Babiloni watapokwa.
Beli watazewana.
Melodaki watauvwa intete.
Ivilubi vyakwe ivizewana.
Ivilubi vyakwe ivya winyi* vili ni ntete.
3 Pano uluko ilwiza umu kulwisya Babiloni ukufuma uku katutu.
Ilulenga impanga yakwe ukuya ica kuseka;Kusi aakwikalamo.
Antu iyutuuka kumwi ni vinyama’Iyapita.”
4 Yeova walanda wati: “Umu manda yayo nupya pa nsita kwene iiya, antu ya mu Izlaeli na amu Yuda yalakolongana pamwi. Yalafuma yakulila nupya yonsi kwene yalalonda Yeova Leza wao.
5 Yaluzya ukuli inzila iyaya uku Zioni ale akuno iyalozya manso, yalati, ‘Izini lekini tupangane upangano wa manda pe na Yeova uutalililika.’”
6 Antu yane yaya wa mfwele iziponge. Ya kacema yao yayaponzya. Yayatungulwile umu myamba muno yalulumbanga, umu myamba ikalamba ni inono. Iilila ukwayela incende yao ukwa kupuuzila.
7 Wensi uwayazana akayalya, nupya alwani yao yakati, ‘Tutakweti umulandu pano yayembukila Yeova, kuli kuti intulo ya ulungami nupya Yeova uwali ali upaalilo wa vikolwe vyao.’”
8 Fumini muli Babiloni,Fumini umu mpanga iya Ina Kalideya,Nupya muye wa mfwele ni mbuzi izikutungulula izyuze.
9 Ndakatusya inko izikalamba ukufuma uku katutuIziliza umu kulwisya Babiloni.
Ziliza umu kumuzanza;Nupya alapokwa.
Inceto zyao zyaya wa nceto zya musilikaIzikakoma ana;Nupya yasiwela sile ukwaula ukucita vino iizile.
10 Aina Kalideya yalayapokolola ivintu.
Nupya yonsi alaayapokolola ivintu vivyo yaluvwa ningo sana,” avino Yeova walanda.
11 “Mwasansamukanga nu kuzangaLino mwapokololanga ica upyanyi cane
Mwatolokanga wa kana ka ng’ombe akakulya umulemvwe,Nupya mwatwalilile ukulila wa mfwalasi.
12 Mayo winu wazewana.
Uwamuviile uvwa uyi.
Aliwe wacepesya apa nko zyonsi,U lwanga umutaaya manzi.
13 Pa mulandu nu ukali wakwe Yeova kusi aalikala muli aliwe;Alasyala icitotela.
Wensi uwapita umupiipi na Babiloni cilamupezya manoNupya alaazunguka pa mulandu na vyonsi ivyamucitikila.
14 Izini muzanze Babiloni umu mbali zyonsi,Mweyano imutinta maulapwa.
Mulasini, mutasya uluceto nanti a longa,Pano Yeova awino wayembukila.
15 Pundini sana umu mbali zyonsi nu kumuzanza.
Watazala.
Incesi zyakwe izipona, iviumba vyakwe iviongoloka,Pano Yeova aakulandula pali aliwe.
Landulini pali aliwe.
Mumucite wakwe vino wamucisile.
16 Komini kakomela wa mbezu mu BabiloniNa wensi aalemile icikwakwa umu nsita ya kuzombola.
Cila muntu alaswilila uku yantu yakwe nu kuutukila uku mpanga yakwe,Pa mulandu nu lupanga ulukalipisye.
17 Antu ya mu Izlaeli i mfwele izisalangane. Ya cisama yayapasa. Inkoleelo umwene uwa ku Asilya uwayaliile; lyene Nebukadineza* umwene uwa Babiloni wakokwite mafupa yao.
18 Yeova wa maumba, Leza wakwe Izlaeli walanda wati, ‘Ndafulula umwene wa ku Babiloni nu konona impanga yakwe wakwe vino nacisile uku mwene wa ku Asilya.
19 Nupya ndawezezya Izlaeli uku mpanga yakwe iya mulemvwe, nawe alaaliila umu Kalimeli nu mu Basyani, nu mu ncende iya myamba yakwe Efulemu alino nu mu Gilyadi.’”
20 Yeova walanda wati: “Mu manda yayo,Na pa nsita iiya, yalalondelezya imilandu yakwe Izlaeli,Lelo yatalazana nanti aumwi,Nupya Yuda atalazanwa ni membu,Pano ndelela yonsi yano naleka ukuti yasyale.”
21 “Yangini mukazanze impanga iya Melataimu na antu aakaila umu Pekodi.
Muyakome nu kuyonona yonsi pyu,” avino Yeova walanda.
“Mucite vyonsi vino namunena.
22 Mu mpanga muli icongo ca mu ulwi,Muli intazi ikalamba.
23 Iyee vino inondo iikavungola inko umu nsi yonsi yatiputolwa nu kutamolwa!
Iyee vino Babiloni wataya ica kuseka umu nko.
24 We Babiloni, nakwikila iciteyo, nupya watulemya,Nupya utamanyile.
Yakuzanyile nu kukulema,Pano Yeova awino wakaanyanga.
25 Yeova watayula umuputule wakwe uwa kusungilamo ivintu,Nupya watafumya ivyanzo vyakwe ivya ukali.
Pano Yeova wa maumba, Umwene wa PapelapelaWatakwata umulimo umu mpanga ya Ina Kalideya.
26 Izini ukufuma uku ncende zya kutali mwize mumuzanze.
Yulini inkoma zyakwe.
Mukolonganikini wa mitumba ya ngaano
Mononini wensi kwene.
Mutaleka nanti aumwi asyale muli aliwe.
27 Komini ya cipambasi yakwe yonsi;Yatwalini uku ncende iya kuyakomelako.
Kalanda kuli aliyo, pano uwanda wao iwiza,Insita yao iya kupingulwa yatifika.
28 Kuli icongo ca yantu aakupuuka,Aakupuuka ukufuma uku mpanga ya Babiloni,Kuti yakamanyisye umu Zioni pa cilanduzi cakwe Yeova Leza witu,Cilanduzi cino akuleta pa mulandu ni tempele lyakwe.
29 Amini aakaomvya maulapwa kuti ize yazanze Babiloni,Yonsi aakutinta maulapwa.
Pangini inkambi mumuzinguluke, mutaleka nanti aumwi apuuke.
Citini kuli aliwe ukulingana ni vicitwa vyakwe.
Mumucite wakwe vino wacisile.
Pano wali ni cilumba kuli Yeova,Uwa Muzilo wakwe Izlaeli.
30 Aonsi yakwe yalafwila umu ncende umukazanwa antu aingi,Nupya umu wanda uuwa asilika yakwe yonsi yalalowa,” avino Yeova walanda.
31 Yeova wa maumba, Umwene wa Papelapela walanda wati: “Nene mulwani wako, we cipondoka,Pano uwanda wako uliza, insita ino ndakupingula.
32 We cipondoka we, ulapumika nu kupona,Nupya kusi aalakukatusya.
Ndoca imisumba yakoNa vyonsi ivyakuzinguluka.”
33 Yeova wa maumba walanda wati:
“Antu ya mu Izlaeli na amu Yuda yakacuziwa,Nupya yonsi aayasenda umu uzya yayalemelela.
Yasilonda ukuyata.
34 Lelo kakulula wao u wa maka.
Yeova wa maumba ali zina lyakwe.
Umu cumi alaya nu mulinganya kuli aliyo,Pakuti ayapeele impanga umwa kupuuzilaNu kulenga antu ya mu Babiloni ukuya ni ntete.
35 Yeova walanda wati: “Kuli ulupanga ulwa kulwisizya Aina Kalideya,Nu lwa kulwisizya antu aakaikala umu Babiloni kumwi na ya cilolo yao na antu yao aamano.
36 Kuli ulupanga ulwa kulwisizyako ya cilandelande,* nupya yalalanga ukuti awelewele.
Kuli ulupanga ulwa kulwisizyako asilika yakwe nupya yaluvwa intete.
37 Kuli ulupanga ulwa kulwisizya imfwalasi zyakwe na maceleta yakwe aankondo,Nu lwa kulwisizyako antu yonsi aafuma uku mpanga zyuze aakaikala nawe,Nupya yalaya wa yanaci.
Kuli ulupanga ulwa kulwisizyako ivyuma vyakwe, nupya vilasendwa.
38 Inguzi zyakwe zilononwa nupya zilapwa.
Pano i mpanga umwaya ivilubi,Nupya pa mulandu ni vilolwa vyao ivya kutiinya yakacita wakwe ya cipena.
39 Viumbwa vya mu lwanga vilikala pamwi ni nyama izikawata,Nupya umu mpanga yakwe mulikala imbuni.
Kusi umuntu aalikalamo,Nupya kusi aalatala aikalemo umu nkulo zyonsi.”
40 “Wakwe viivi kwene vino Leza ononyile Sodoma na Gomola ni mizi iya mupiipi, avino alacita na kuli Babiloni, kusi aalatala aikalemo,” avino Yeova walanda.
41 “Lolini! Antu yakwiza ukufuma uku katutu;Uluko ulukalamba na ya mwene aamakaYalakatuka nu kwiza ukufuma uku mpanga zya kutali sana umu nsi.
42 Yalasenda maulapwa na masumo.
Yaya nu unkalwe nupya yatalaya nu luse.
Icongo cao cili wakwe yemba aakukatusya maimbi,Lino yakwezile pa mfwalasi zyao.
Yali wa muntu wenga lino yakwiza umu ku kulwisya, we mwana umwanaci uwa ku Babiloni.
43 Umwene uwa ku Babiloni watauvwa ilyasi pali aliyo,Nupya makasa yakwe iyatoovoka,
Akucululuka,Nu kuwaika wa mwanaci aali pa kupaapa.
44 Lolini! Wakwe cisama aakufuma umu mitengo ya mu Yodani umwaya sana imiti, umwi aliza nu kuzanza incende zya mulemvwe izicingililwe izya mu Babiloni. Lelo umu nsita sile inono ndasonta intunguluzi iyakuti yaangalila Babiloni. Pano a weni uwaya wakwe nene, nupya a weni aangandwisya? A kacema ci aangimilila pa nkoleelo yane?
45 Acino mwe yantu mwe, uvwini vino Yeova akwelenganya ukucita kuli Babiloni na vino akwelenganya pa yantu aakaikala umu Kalideya.
Utwana twa mfwele yalatukweta nu kutusenda.
Impanga yao ilasyala umwaula cimwi pa mulandu na vino yacisile.
46 Pa mulandu ni congo iciluvwika lino Babiloni alapokwa,Insi ilatenkana nu kulila kuluvwika umu nko.
Mafutunoti
^ Izwi lya Ciebele lyakolana ni izwi ilikaomviwa uku usali. Nupya likaomviwa nu ku kulondolola icintu ca sile sile.
^ Mu Ciebele: “Nebukadileza,” yii inzila yuze iya kulembelamo izina lii.
^ Nanti “ya kasesema ya ufi.”
