Yelemiya 52:1-34
52 Zedekiya wali ni myaka 21 lino watandike ukuteeka, nupya wateesile imyaka 11 umu Yelusalemu. Nyina wali a Hamutali mwana Yelemiya uwa ku Libina.
2 Wasosyanga Yeova wakwe viivi kwene vino Yeoyakimu wacisile.
3 Vintu vii vyacitike pa mulandu wakuti Yeova wasokiile antu ya mu Yelusalemu nu mu Yuda kufikila ayazinga. Nupya Zedekiya wapondokiile umwene wa ku Babiloni.
4 Mu mwaka uwalenga 9 uwa kuteeka kwakwe Zedekiya mu mwezi uwalenga 10 pa wanda uwalenga 10 umu mwezi, Nebukadineza* umwene wa ku Babiloni waile na asilika yakwe yonsi umu kulwisya Yelusalemu. Yapanzile inkambi nu kutuulika ivu ilyali wa ciumba ukuzinguluka umusumba.
5 Nupya umusumba wazingulwikwe ukufika mu mwaka uwalenga 11 uwa kuteeka kwa mwene Zedekiya.
6 Mu mwezi uwalenga 4 pa wanda uwalenga 9, mu musumba mwali sana icipowe, mutaali ivyakulya.
7 Lyene alwani iingile umu musumba, nupya asilika yonsi aali umu musumba yutwike usiku ukuomvya impongolo iyaali pakasi ka viumba viili umupiipi ni calo ca mwene, ala Ina Kalideya iyazinguluka umusumba; nupya yalungime uku nzila iyaya uku Alaba.
8 Lelo asilika Aina Kalideya yazinginye Umwene Zedekiya, nupya yaile iyamulemela uku lwanga lwa Yeliko, lyene asilika yakwe yonsi yasalangine iyamusya.
9 Yamulemile nu kumutwala uku mwene wa ku Babiloni uku Libula mu mpanga ya Hamati, nawe wamupingwile.
10 Nupya umwene uwa ku Babiloni wakomile ya mwana Zedekiya ala na Zedekiya akulolako, wakomile na ya cilolo yonsi amu mpanga ya Yuda uku Libula kwene.
11 Lyene watonkwile Zedekiya manso amunyepa na maceni yakwe koopa nu kumusenda uku Babiloni, nupya wamwisile umu cifungo ukufika na lino wafwile.
12 Pa wanda uwalenga 10 umu mwezi uwalenga 5, kuli kuti umu mwaka uwalenga 19 uwa kuteeka kwakwe Nebukadineza umwene uwa ku Babiloni, Nebuzaladani umukalamba wa yalinzi uwali umuomvi wa mwene wa ku Babiloni waile uku Yelusalemu.
13 Osile ing’anda yakwe Yeova, isano na mang’anda yonsi aali umu Yelusalemu, nupya osile na mang’anda yonsi akalamba.
14 Nupya asilika Aina Kalideya aali nu mukalamba wa yalinzi yaongolwile iviumba vyonsi ivyazingulwike Yelusalemu.
15 Nebuzaladani umukalamba wa yalinzi wasenzile antu yamwi asuulwe na antu yonsi asyazile umu musumba. Wasenzile na antu autuukile uku mwene wa ku Babiloni na antu yonsi asyala aamanyikisye ivya kupangapanga.
16 Lelo wasileko yamwi pa yantu aali apiina sana aakuti yaomba umu vyalo vya myangazi nu mu vyalo vyuze.
17 Aina Kalideya yatamozile ivipilala vyakwe koopa ivyali uku ng’anda yakwe Yeova ni vya kusendelapo ivintu ni tanki lyakwe koopa ilyali pa ng’anda yakwe Yeova, nupya yasenzile koopa wensi uku Babiloni.
18 Yasenzile ni mbeketi, ya fosyolo, ivya kuzimizyako umoto, imbale, makapu, ni viya vyonsi vyakwe koopa ivyaomviwanga api tempele.
19 Mukalamba wa yalinzi wasenzile na ya beseni, ivya kusendelapo umoto, imbale, imbeketi, ivya kuteekapo ya lampi, makapu, ni mbale izyapangilwe na goldi umwengululwe ningo na siuva.
20 Koopa uwaomviwe uku kupangila ivipilala viili, itanki, ya cipambasi 12 yano yateesilepo itanki, ni vya kusendelapo ivintu vino Umwene Solomoni wapanzile pa ng’anda yakwe Yeova, wali umwingi sana icakuti atanga apimwe.
21 Cila lucesi lwali mamita 8 ukuya umupela nupya intambo iingazinguluka ulucesi longa ingaya mamita 5, cila lucesi lwali ulutikame mupiipi na masentimita 7,* nupya lwakweti icipongo.
22 Ivyali wa ntendo ivyali papela vyali ivyakwe koopa; alino vyali ukucila pa mamita yaili ukuya umupela nupya ivyazingulwikeko na mapomegilaneti vyonsi vyali ivyakwe koopa. Lucesi lwakwe ciili na mapomegilaneti navyo kwene vyali icili cimwi.
23 Mapomegilaneti aalolekanga aali uku tupikule yaali 96; lelo yonsi pamwi yaali 100.
24 Mukalamba wa yalinzi wasenzile na Selaya simapepo mukalamba, Zefaniya inkonkanyi yakwe simapepo mukalamba, na alinzi ya pa milyango yatatu.
25 Wasenzile umuomvi wa kwi sano uwangalilanga asilika ukufuma umu musumba, ya cuza ya mwene 7 aali umu musumba, na kalemba wa mukalamba wa yasilika uwakolonganikanga asilika, na aonsi 60 ukufuma umu yantu aali umu musumba.
26 Nebuzaladani umukalamba wa yalinzi wayasenzile uku mwene wa ku Babiloni uku Libula.
27 Umwene wa ku Babiloni wayakomiile uku Libula mu mpanga ya Hamati. Vikwene avino Ayuda yasenzilwe umu uzya ukufuma uku mpanga yao.
28 Yaa ali yantu yano Nebukadineza wasenzile umu uzya: mu mwaka uwalenga 7, wasenzile Ayuda 3,023.
29 Mu mwaka uwalenga 18 uwa kuteeka kwakwe Nebukadineza, antu 832 yasenzilwe ukufuma umu Yelusalemu.
30 Mu mwaka uwalenga 23 uwa kuteeka kwakwe Nebukadineza, Nebuzaladani umukalamba wa yalinzi wasenzile Ayuda 745 mu uzya.
Antu yonsi pamwi aasenzilwe umu uzya yaali 4,600.
31 Lyene lino Eveli-melodaki watandike ukuteeka umu Babiloni mu mwaka uwalenga 37 kufuma pano Yeoyakini umwene wa ku Yuda wasendiilwe umu uzya, pa wanda uwalenga 25 mu mwezi uwalenga 12, wafumizye Yeoyakini umu cifungo.
32 Wamusakamalanga ningo, nupya wacindamike icilimba cakwe ica wene ukucila ivilimba vyakwe ya mwene yauze aali nawe umu Babiloni.
33 Fwandi Yeoyakini wazuuzile ivyakuzwala vino wazwalanga umu cifungo, nupya lyonsi lino wali nu umi waliilanga pamwi nu mwene wa ku Babiloni.
34 Cila wanda umwene wa ku Babiloni wamupeelanga ivyakulya ukufika na pa wanda uno wafwile.
Mafutunoti
^ Mu Ciebele: “Nebukadileza,” yii inzila yuze iya kulembelamo izina lii.
^ Mu Ciebele: “Kutimba kwa minwe 4 ukuika pamwi.” Lolini Ivyeo na Vyuze pa B14
